Mikałaj Damaškievič zastaniecca ŭ systemie kiravańnia krainaj, zajaviŭ Alaksandar Łukašenka, pradstaŭlajučy na pasadzie staršyni Mienskaha abłvykankamu Leanida Krupca.
Kiraŭnik dziaržavy skazaŭ, što ŭ svoj čas Mikałaj Damaškievič byŭ niezamienny. Jon amal dzieviać hadoŭ kiravaŭ vobłaściu, adznačyŭ prezydent. Pavodle słoŭ Łukašenki, siońnia čas patrabuje novych kiraŭnikoŭ. "U taptańni Mienskaj vobłaści na miescy niemałuju roli zhulali zahany ŭ styli pracy Mikałaja Damaškieviča", — zajaviŭ A. Łukašenka.
Pry hetym A. Łukašenka zapeŭniŭ, što były kiraŭnik vobłaści "nia budzie vykinuty na vulicu". "Kali niechta dumaje, što era Damaškieviča zakaciłasia, to vy pamylajeciesia. Takimi kadrami nie raskidajucca". M. Damaškievič "paplečnik prezydenta", — skazaŭ A. Łukašenka.
Alaksandar Łukašenka 11 červienia pradstaviŭ na pasadzie staršyni Mienskaha abłvykankamu Leanida Krupca. Kandydatura Leanida Krupca była adnahałosna zaćvierdžana 11 červienia na pazačarhovaj sesii abłsavietu deputataŭ. Kiraŭnik dziaržavy asabista ŭručyŭ hubernataru Mienskaj vobłaści słužbovaje paśviedčańnie.
Łukašenka nazvaŭ Leanida Krupca — «čałaviekam ad ziamli, sielaninam». Havoračy pra jaho, Łukašenka zajaviŭ: "Ja sychodziŭ z taho, što heta narmalny čałaviek paśla žorstkaha stylu Mikałaja Fiodaraviča Damaškieviča. Krupiec — miakčejšy, ale bolš nastojlivy".
Kiraŭnik dziaržavy rastłumačyŭ, što padstavaj dla pryznačeńnia Krupca staŭ nie ekanamičny abvał abo niejkija sacyjalnyja kanflikty. Paprostu «novyja ŭmovy haspadarańnia patrabujuć kardynalnaha pavyšeńnia efektyŭnaści kiraŭnickaj dziejnaści i adkaznaści kirujučych kadraŭ, asabliva na rehijanalnym uzroŭni».
«Mnohaje zaležyć ad asoby staršyni abłvykankamu. Jon adkazvaje za ŭsio ŭ vobłaści — ad haspadarčych spraŭ da palityčnych. Heta publičnaja fihura, pa spravach i ŭčynkach jakoj ludzi miarkujuć ab zdolnaści kiravać sytuacyjaj», — dadaŭ Łukašenka.
Łukašenka zajaviŭ: "Toj peryjad, kali Damaškievič z vykarystańniem administratyŭnaha resursu moh kiravać vobłaściu, zakončyŭsia". "Siońnia patrebnyja ludzi ŭdumlivyja, patrabavalnyja i spakojnyja".
