Z usioj krainy
Źliva ź nieba narabiła biady
Jak paviedamili BiełaPAN u Ministerstvie nadzvyčajnych sytuacyjaŭ, praz daždžy ź vietram da 30 metraŭ na sekundu ŭ Mahiloŭskim i Škłoŭskim rajonach paškodžanyja linii elektryčnaści, abiastočanyja 47 nasielenych punktaŭ. U Karmianskim rajonie paciarpieli 52 žyłyja damy, 11 sielhasbudynkaŭ i 6 abjektaŭ sackultbytu. A jašče šmat dzie damy padtapiła i drevy na darohach narabili zavałaŭ.
Babie sto hadoŭ
Žycharcy vioski Čarniłava ŭ Mścisłaŭskim rajonie Volzie Sokał spoŭniłasia 100 hadoŭ. Žyvie staraja adna, maje aharod, dzie vyroščvaje cybulu i kapustu. Sama nie tutejšaha pachodžańnia. Pryjechała na Mścisłaŭšynu ź Sibiry jašče padčas kastryčnickaj smuty. Trymajecca dobra, bo ŭsio pracuje.
Andrej Kuźmin
A cialaty harać i harać
Zdavałasia, užo j travy navałam, i stratu hałodnaha bydła nia treba śpisvać na pažary dy ŭsiakija pryrodnyja kataklizmy. Až nie. BiełaPAN piša, što 68 cialat zhareli padčas pažaru 15 lipienia ŭ vioscy Siamierniki Vałožynskaha rajonu (heta akurat jak na Vilniu jechać). Kažuć, pažar u cialatniku kałhasu imia K.Marksa ŭspychnuŭ kala 4 hadzin ranicy. U vyniku zahinuli ŭsie cialaty, jakija tam byli. Pryčynu pažaru vyśviatlajuć.
Zamiest Lenina budzie vazon
Ź siaredziny 60-ch stajaŭ u dvoryku barysaŭskaj SŠ №12 pomnik pravadyru praletarskaje revalucyi. Vidać, mulaŭ ludziam voka svajoj alapavataściu j niazhrabnaściu, tamu j pačali źnikać z kamiennaha stodu jahonyja častki: spačatku ruka, zatym nos. Da taho ž pakryŭsia jon uvieś jołkimi nadpisami. Administracyja škoły doŭha vahałasia, pakul navažyłasia paprasić rabočych raźbić jaho na kavałki j vyvieźci niepatrebny druz na śmietnik. Tolki voś hruvastki pastament nie było jak zrušyć, tamu j vyrašyli skarystać jaho pad vazon dla kvietak.
Siaržuk Sałaš
Major pabiŭ kamandzira
Da 10 hadoŭ źniavoleńnia moža atrymać major adnoj z mahiloŭskich vajskovych častak. Jon źbiŭ svajho kamandzira, padpałkoŭnika. Jak siońnia ličyć śledztva, aficer tak ciažka «parušyŭ subardynacyju» z pryčyny svajoj niedyscyplinavanaści i niežadańnia vykonvać zahady načalnika. Praŭda, pakul nieviadoma, nakolki razumnyja byli tyja zahady.
Symon Hłazštejn
Z frontaŭcaŭ — u limonaŭcy
Na 2 minimalnyja zarobki aštrafavany Baranavickim sudom «russkij patriot» Michaś Savicki za napad miesiac tamu na štab-kvateru Baranavickaha BNF «Adradžeńnie». Nahadaju čytačam «NN», što tady try «limonaŭcy» vyklikali na leśvičnuju placoŭku staršyniu Frontu 19-hadovaha Alesia Pikułu dy, daviedaŭšysia, što jon adzin, pačali źbivać.
U poźvie, jakoj vyklikaŭsia ŭ sud Aleś Pikuła, značyŭsia cikavy nadpis «dla biesiedy». Sudździa zaprasiła ŭ kabinet na razmovu jaho j Savickaha, dy adrazu ž praz paŭhadziny vyniesła prysud. «Limonaviec» zajaviŭ, što nia viedaje svaich pa-dzielnikaŭ, dy ŭsiu vinu ŭziaŭ na siabie. Za tydzień da sudu Savicki ŭładkavaŭsia na pracu — biespracoŭnych nie štrafujuć, a sadziać na sutki. Darečy, sam jon — syn vialikaha milicyjanta ŭ adstaŭcy...
Na sudzie «russkij patriot» trymaŭsia raźviazna. Raspavioŭ pra svaju kryŭdu — pabili jaho ŭ Miensku na apazycyjnym mitynhu za toje, što byŭ apranuty jak skin — kamuflaž dy boty ź «biełymi šnurkami». Ciapieraka, jak zajaviŭ jon sudździ, jon sa svaimi siabrukami źbirajecca «začyścić Biełaruś ad nacyjanalistaŭ».
U vypadku paŭtoru parušeńnia zakonu M.Savickaha čakaje turma. Adnak škoda hladzieć na takich padletkaŭ, jakim roznaja rasiejskaja poskudź tłumić hałavu, a biełaruskija arhanizacyi ničoha prapanavać nia mohuć. Prychodziŭ ža raniej hety «limonaviec» na štab-kvateru Frontu, razmaŭlaŭ pa-biełarusku, braŭ čytać knižki, pachadziŭ dy syjšoŭ. Šukaŭ bolš radykalnuju arhanizacyju, i padčas tych pošukaŭ znajšli jaho rasiejskija balšaviki... Sam jon raspavioŭ, što staŭ «limonaŭcam» nia stolki z-za idealohii, kolki z-za taho, što nie žadaje tak bolš žyć i choča niešta źmianić u hetaj krainie. Patrapiŭ by jon ad pačatku pad upłyŭ «Biełaha lehijonu» ci «Kraju», byŭ by zusim inšy čałaviek.
Rusłan Raviaka, Baranavičy
Dvorniki nahadali, što jany – ludzi
U Babrujsku ŭpieršyniu ŭ Biełarusi pratestavali dvorniki. Na stadyjonie «Fandok» prajšoŭ dazvoleny ŭładami pikiet. Ludzi vykazvali svajo niezadavalnieńnie zarobkam, a taksama chamskimi pavodzinami niekatorych načalnikaŭ. Mahiloŭski pravaabaronca Vaładar Curpanaŭ, jaki sustrakaŭsia napiaredadni z arhanizatarami pikietu, kaža: «Babrujsk uražvaje čyścinioj svaich vulic. Heta śviedčyć pra dobruju pracu ludziej, jakija tuju čyściniu stvarajuć. Ale im prychodzicca pracavać dziela hetaha ź piaci hadzin ranku i až ceły dzień. Absłuhoŭvajuć pa niekalki ŭčastkaŭ, bo nie chapaje ludziej. I pry hetym atrymlivajuć usiaho 12-17 dalaraŭ».
Symon Hłazštejn
