Tydzień našaha žyćcia
ZŠA nie pryznajuć vybaraŭ
Dziarždepartament ZŠA ŭ svaim presavym relizie zapeŭniŭ, što Ameryka nie pryznaje vynikaŭ parlamenckich vybaraŭ u Biełarusi i nia budzie nakiroŭvać na ich svaich nahladalnikaŭ, bo vybary demakratyčnymi nia buduć. Heta ž paćvierdziŭ namieśnik dziaržsakratara ZŠA Stroŭb Tełbat u razmovie ź lideram “Chartyi-97” Andrejem Sańnikavym.
Lavonaŭ na voli
6 kastryčnika vyjšaŭ na volu z Aršanskaj kalonii były ministar sielskaj haspadarki Biełarusi Vasil Lavonaŭ. Vypuścili pa amnistyi tamu, što sp.Lavonavu ŭžo za 60, jon užo adbyŭ pałovu terminu dy nie parušaŭ režymu. Nahadajem, što jaho abvinavačvali ŭ kradziažy dy chabary. Sam Lavonaŭ ličyć, što pryčynaju ŭsiamu jahonyja sproby refarmavać sielskuju haspadarku.
Dražyn choča ŭ adstaŭku
6 kastryčnika padaŭ u adstaŭku staršynia Mahiloŭskaha abłvykankamu Michaił Dražyn. Alaksandar Łukašenka daručyŭ Dražynu “vyvieści ekanomiku vobłaści na jakasna novy ŭzrovień”, a toj ličyć, što nia zdoleŭ dać hetamu rady. Kažuć, Łukašenka toj adstaŭki moža j nie pryniać.
“Volnaja scena” žyvie
Teatar “Volnaja scena” vychodzić z padparadkavańnia Ministerstvu kultury. Pra heta abvieściŭ na adkryćci teatralnaha sezonu na “Volnaj scenie” niaźmienny kiraŭnik teatru Valery Mazynski. Častka aktoraŭ pry hetych słovach raspłakałasia prosta na scenie. Pałova aktoraŭ sychodzić razam ź im, zabirajučy z saboju znajomuju nazvu. “Volnaja scena” budzie isnavać samastojna, arandavać sceny. Mahčyma, teatru dapamoža ŭ pracy znany dramaturh Alaksiej Dudaraŭ, a ačolvany im Sajuz teatralnych dziejačaŭ voźmie volny teatar pad svajo kryło.
900 hod Davyd-Haradku
Na minułym tydni Davyd-Haradok śviatkavaŭ svajo 900-hodździe. Padfarbavali fasady damoŭ, padramantavali vulicy.
Pracoŭny dzień čynoŭnikaŭ – z 9 da 18
Z 2 kastryčnika 2000 hoda ministerstvy i inšyja orhany dziaržaŭnaha kiravańnia Biełarusi pierajšli na raniejšy režym pracy: z 9-j da 18-j hadziny, pierapynak na abied — z 13-j da 14-j hadziny. Ź listapada 1999 h. pracoŭny dzień čynoŭnikaŭ sprabavali pierasunuć na paŭhadziny (8.30—17.30), ale heta stvarała vialikija pierahruzki na transparcie.
Bank “Biełbałtyja” pazbaŭleny licenzii
Papularnamu siarod pryvatnych układčykaŭ banku “Biełbałtyja” nie pradoŭžanaja licenzija na pryciahnieńnie pryvatnych układaŭ. Pakul nieviadoma, ci adabjecca heta na intaresach tych, chto trymaŭ u im hrošy. Kiraŭnik Nacbanku Piatro Prakapovič zajaviŭ, što bank nie parušaŭ zakonaŭ, ale apynuŭsia ŭ sytuacyi, kali jahonyja zamiežnyja aktyvy nie ŭdajecca pradać i viarnuć hrošy ŭ Biełaruś. Sp.Prakapovič zaklikaŭ medyi strymana pastavicca da sytuacyi, kab siarod układčykaŭ nia ŭźnikła paniki.
Biełaruski supertank
Tank, jaki zmajstravali na biełaruskim pradpryjemstvie “Minator-servis”, moža navieści žach na kaho zaŭhodna. Mašyna-zabojca pad nazovam 2T nia maje analahaŭ u śviecie. Jana zroblenaja pavodle technalohii “stełz”, a tamu amal niabačnaja dla radaraŭ, ruchajecca z chutkaściu 100 km u hadzinu (zvyčajny tank redka kali raźvivaje 70), maje zapas chodu 1000 kilametraŭ (sučasnyja tanki — kala 600). Dziejničaje aŭtanomna, pryznačany dla hłybokaj vyviedki i dyversijnych aperacyjaŭ. Heta pieršy tank, całkam zbudavany ŭ Biełarusi. Dy tolki i nam, i našym susiedziam nabyvać takija tanki zadoraha. Ale na mocnuju zbroju pakupnik zaŭždy znojdziecca. Niezdarma viadziecca raspracoŭka madyfikacyjaŭ 2T dla haračaha i chałodnaha klimataŭ.
Pavodle paviedamleńniaŭ ahienctva BiełaPAN
