Z usioj krainy
U Sojmie BNF
21 kastryčnika adbyŭsia čarhovy Sojm BNF “Adradžeńnie” j partyi BNF, na jakim byli stanoŭča acenienyja vyniki bajkotu vybaraŭ i dziejnaść aktyvistaŭ u rehijonach. Ciešylisia siabry Sojmu i zładžanaj pracaj Kaardynacyjnaj Rady Demakratyčnych Siłaŭ. 4 listapada projdzie Sojmavaja kanferencyja, dzie buduć akreślenyja prymalnyja dla BNF krytery adboru kandydata ŭ prezydenty ad abjadnanaj apazycyi.
Čyhirychu zasudzili
U minułuju piatnicu da 2 hadoŭ pazbaŭleńnia voli z adterminoŭkaju na hod była asudžanaja žonka eks-premjera Julija Čyhir za toje, što, abaraniajučy siabie, naniesła traŭmu majoru milicyi. Asudžanaja zajaviła, što abskardzić prysud u vyšejšaj sudovaj instancyi, i abvinavaciła sudździaŭ u zmovie ź milicyjaj dy ŭładami.
Kozak prylacieŭ
Novy pasoł ZŠA ŭ Biełarusi Majkł Kozak 20 kastryčnika prylacieŭ u Miensk, adrazu zrabiŭšy zajavu dla presy, u jakoj padkreśliŭ svaju navažanaść supracoŭničać z demakratyčnymi siłami krainy. Apošniaje Kozakava miesca pracy – misija ZŠA pry pasolstvie Švajcaryi na Kubie.
Labiedźka suprać Łukašenki
Staršynia AHP Anatol Labiedźka źviarnuŭsia ŭ sud Frunzenskaha rajonu Miensku z pazovam na Alaksandra Łukašenku. Padstava – pakazany pa BT frahment vystupu Łukašenki na vybarčym učastku, dzie lider liberałaŭ abvinavačvaŭsia ŭ adpracoŭcy nibyta atrymanych ad Zachadu 1500 dalaraŭ. A.Labiedźka choča ad A.Łukašenki dokazaŭ.
Kaalicyja 12 listapada
Moładzievyja arhanizacyi abjadnalisia ŭ kaalicyju dziela praviadzieńnia sumiesnaj palityčnaj kampanii “Pieramienaŭ!”. Pieršaja z seryi akcyjaŭ Kaalicyi maje prajści ŭ Miensku 12 listapada ŭ centry horadu, sa specefektami j mocnym hukam. U Kaalicyju ŭvajšli Małady Front, Maładaja Hramada, Biełaruskaje abjadnańnie maładych palitykaŭ, Zadzinočańnie Biełaruskich studentaŭ, Moładzievy chryścijanska-sacyjalny sajuz dy inšyja arhanizacyi. Stratehičnaja meta Kaalicyi – vyklikać u moładzi žadańnie da ŭdziełu ŭ prezydenckich vybarach 2001 hodu. Kaalicyja nie vystupaje za niejkaha adzinaha kandydata, jaje hałoŭnaja zadača – aktyvizavać moładź.
B.T.
Bajkot nia bajka
U Baranavičach vybary nie adbylisia. U Zachodniaj akruzie, pavodle aficyjnych źviestak, prahałasavaŭ 41% vybarščykaŭ, va Ŭschodniaj - 46,7%. Adnak heta nia śviedčyć pra sumlennaść “kamisaraŭ”: machlarstva było nie źličyć. Na adnym z učastkaŭ pad 8-uju viečara ŭ skryni, pad kantrolem “naziralnicy” ź miascovaj vertykali, byli zakinuty biuleteni, jakija dazvalali b rapartavać pra vybarčy anšlah. Ale padčas padliku hałasoŭ vyjaviłasia, što 5 hałasoŭ usio adno nie staje!
Rusłan Raviaka, Baranavičy
Da urnaŭ — siłkom
U Horadni vybary vymučyli: da urnaŭ pryjšło 53% vybarcaŭ. Pradstaŭniki ž BNF i BHK za realnyja ličby ŭvažajuć 40-45%. Reštu hałasoŭ vybivali pry dapamozie milicyi, jakaja jeździła pa kvaterach z pahrozami, ci pry ŭcisku načalstva: apytańnie studentaŭ zaśviedčyła, što 80% ź ich zahnali na ŭčastki proci voli. Usiaho naziralniki skłali 150 pratakołaŭ na parušeńni ŭ časie vybaraŭ.
Andrej Mialeška, Horadnia
Hramada asudžaje falsyfikacyi
18 kastryčnika Vykanaŭčaje Biuro BSDP-NH pryniało rezalucyju, u jakoj uchvalajecca dośvied, atrymany tymi siabrami partyi, što ŭdzielničali ŭ “pałatačnych” vybarach. Sami ž vybary partyja charaktaryzuje jak “sfalšavanyja na samym vysokim uzroŭni”.
B.T.
Muzej teratalohii
U Horadni adkryŭsia pieršy ŭ Biełarusi muzej teratalohii, u kalekcyi jakoha – blizu 50 uzoraŭ pryrodžanych dy nabytych čałaviečych anamalijaŭ. Čałaviek-buldoh, sijamskija bliźniuki-kranijapahi, dzicio z dvuma tvarami, na zadumu stvaralnikaŭ, źjaŭlajucca ilustracyjaj škodnaści alkaholu, narkotykaŭ dy taksyčnych rečyvaŭ.
30 000 mabiłaŭ
Tolki 0,3% biełarusaŭ majuć sotavyja telefony. Na 93 zvyčajnyja telefonnyja aparaty prypadaje 1 “sotavik”. Zaraz u Biełarusi naličvajecca 2 miljony 793 tysiačy stacyjanarnych telefonnych numaroŭ. Pavodle kolkaści telefonaŭ na 100 žycharoŭ kraina napieradzie Litvy, Ukrainy i Rasiei.
Pavodle BiełaPAN
Prafsajuznaja akcyja pratestu
U listapadzie adbudziecca akcyja pratestu prafsajuzaŭ, jakaja projdzie pad sacyjalnymi lozunhami. Hetuju inicyjatyvu padtrymali ŭdzielniki rabočaj narady Kaardynacyjnaj Rady Demakratyčnych Siłaŭ, što prajšła ŭ Miensku. Spačatku planujecca praviadzieńnie akcyi ŭ stalicy, zatym u 22 haradoch, dzie nasielnictva pieravyšaje 50 000 čałaviek, paśla čaho — va ŭsich rajonnych centrach Biełarusi.
U Varšavie dy Prazie
15 kastryčnika ŭ Varšavie Zadzinočańnie Biełaruskich Studentaŭ razam ź Biełaruskaj asacyjacyjaj studentaŭ Polščy praviało pikietavańnie biełaruskaj ambasady ŭ padtrymku kampanii “Bajkot”, a biełaruskaja hramadzkaść Prahi taho samaha dnia zarhanizavała “paradyjnyja vybary”. Arhanizatary performansu zaklikali prysutnych vybrać pamiž “Łukašenka — hut” i “Łukašenka — kaput”.
Pavodle BARC
Dapamoha
“starejšamu bratu”
U SŠ №5 Kryčava viadziecca ledź nie prymusovy zbor hrašovych achviaravańniaŭ u fond padłodki “Kursk”. Dyrektar zahadvaje vučniam zdavać hrošy na patreby rasiejskaha VMF. Z hetkim ža pośpiecham biełaruskija dzieci mahli b prafinansavać adsutnaść hazu ŭ Piarmi ci kupić aŭtamaty sałdatam u Tadžykistanie. Voś tolki chto padumaje pra nas?
Andrej Kuźmin, Kryčaŭ
Śmierć ad “kajfu”
9-hadovy chłopčyk ź vioski Izabielina Astravieckaha rajonu pamior ad taho, što zadychnuŭsia, kali nasunuŭ sabie na hałavu polietylenavy pakiet z benzynam. Baćki znajšli jaho pablizu domu, ale było ŭžo zapozna. U dušach ludziej strach – niaŭžo narkamanija dy taksykamanija z haradoŭ pierabirajucca ŭ vioski?
Marjan Vianhroŭski, Astraviec
Mahileŭskaja judaika
U Mahilevie prajšli čytańni, pryśviečanyja pamiaci Siamiona Dubnova, aŭtara pieršaj hruntoŭnaj historyi habrejskaha narodu. Navukoviec naradziŭsia ŭ Amścisłavie 140 hod tamu, a skončyŭ svoj žyćciovy šlach u Ryskim hieta.
Symon Hłazštejn, Mahiloŭ
Biełaruskaje “miescaradžeńnie”
“Biełarusi bližejšym časam budzie pieradadziena adno z naftavych miescaradžeńniaŭ u Rasiei, dzie budzie vieścisia zdabyča nafty dla biełaruskich naftapierapracoŭčych zavodaŭ”, — paviedamiŭ BiełaPAN. Majecca na ŭvazie, što biełaruskija naftaviki buduć samastojna ekspluatavać radovišča nafty pavodle damoŭlenaści miž A.Łukašenkam i rasiejskim vice-premjeram V.Chryścienkam.
B.T.
Skobła i Čarniaŭski ŭ Mahilovie
18 kastryčnika ŭ Mahilevie adbyłasia prezentacyja čarhovaje knihi “Biełaruskaha knihazboru”, pryśviečanaje tvorčaści Łarysy Hienijuš. Na viečarynie vystupiŭ składalnik zborniku Michaś Skobła, a taksama znajomiec paetki Mikoła Čarniaŭski. Pryjezd adbyŭsia dziakujučy asacyjacyi “Amatary Biełaruskaha Knihazboru”, jakaja dziejničaje ŭ Padniaproŭi.
Andruś Kavaloŭ, Mahiloŭ
Ušanavać dziadoŭ
U Kurapackim lesie ŭžo stajać piać kryžoŭ
Pazaŭčora ŭ Kurapatach adbyŭsia pieršy subotnik pa ŭparadkavańni mohilnika. Ludzi ačyścili terytoryju memaryjału ad śmiećcia, prybrali zaśmiečanyja j zarosłyja chmyźniakom mahiły. Było vykapana bolš za dvaccać jamin dla pamiatnych kryžoŭ, piać ź jakich zaŭčora ŭžo byli ŭstalavany. Kaardynuje pracu dla stvareńnia kurapackaha memaryjału Maja Klaštornaja, dačka rasstralanaha tutaka paeta Todara Klaštornaha.
Na pieršy subotnik pryjšło nia hetak i šmat ludziej: siem čałaviek ad Akademii Navuk, vosiem – ad moładzi, prychodzili ludzi ź dziećmi j navat staryja – kožny chacieŭ pryčynicca da ŭšanavańnia palehłych u Kurapatach niavinnych achviar tatalitarnaha režymu. Prychodzili siabry mienskaje Katalickaje Hramady j pradstaŭniki Źviazu Palakaŭ. Tałakoju pastavili piać kryžoŭ, na hetym tydni budzie pastaŭlena jašče niekalki. Da Dziadoŭ maje stajać blizka dvaccaci pomnikaŭ. Na nastupny subotnik, pierakanana Maja Klaštornaja, pryjdzie bolej ludziej. Usie achvočyja ŭziać udzieł u nastupnym subotniku, što adbudziecca 28 kastryčnika, abo achviaravać svoj kryž, źviazvajciesia z spn.Klaštornaj praz teł. 226-69-34.
U niadzielu 29 kastryčnika adbudziecca tradycyjny pachod da Kurapataŭ. Zajavu na jaho padali P.Znaviec, V.Viačorka i H.Bykaŭ. Maršrut maje być: Akademija Navuk – pr.Skaryny – vuł.Filimonava – vuł.Kiedyški – vuł.Siadych – vuł.Karbyšava – Łahojski trakt – Kurapaty. Zbor udzielnikaŭ – a 11:30 na placoŭcy pierad Akademijaj Navuk. Udzielniki pachodu ŭ śviaty dzień prodkaŭ chočuć pranieści praz uvieś horad try kryžy, kab, aśviaciŭšy, pastavić ich u Kurapatach.
Viktar Muchin
Spatkańnie historykaŭ
20—21 kastryčnika ŭ Biełastoku adbyłasia kanferencyja “Zmahańnie za biełaruskuju dziaržaŭnaść u XX st.”, naładžanaja Biełaruskim Histaryčnym Tavarystvam (prez. dr.Łatyšonak). Temy dakładaŭ achaplali XX st. i zakranali takija aspekty biełaruskaj historyi, jak ideja “krajovaści” na pačatku stahodździa, losy BNR i BSSR, prablemy biełarusizacyi, razhrom nacyjanalnaha ruchu, biełaruski nacyjanalny ruch u Zachodniaj Biełarusi, nacyjanalnaje žyćcio padčas niamieckaj akupacyi (1941-1944), tatalitarnaja systema, Biełaruś na sučasnym etapie i inš. Historyki dzialilisia napracoŭkami, paviedamlali raniej nieviadomyja fakty. Ihar Kuźniacoŭ ahučyŭ ličbu represavanych u Biełarusi ŭ časie stalinskich represij: 950 tys. Vykazvałasia i zaniepakojenaść siońniašnim dniom Biełarusi, pastupovaj strataj niezaležnaści. Afaryzm Ściapana Bandery “Šanujcie, chłopcy, les, jon vam jašče spatrebicca” prahučaŭ na navukovaj kanferencyi zusim nia śmiešna.
Sytuacyja z nacyjanalnaj samaśviadomaściu biełarusaŭ zastajecca ćmianaja. Adzin z vystupoŭcaŭ na poŭnym surjozie pryvioŭ źviestki daśledavańniaŭ, zhodna ź jakimi tolki 48% apytanych žycharoŭ Biełarusi ličać biełarusaŭ za samastojnuju nacyju, a 42% — uvažajuć biełaruski narod za składnik trochadzinaha rasiejskaha narodu.
A.H.
Represii suprać biełarusaŭ
21 kastryčnika za ŭdzieł u niesankcyjanavanaj akcyi suprać vybarčaha farsu ŭ Viciebsku byli zatrymanyja Siarhiej Vasienka, Siarhiej Hrodź, Jury Mielnikaŭ, Uładzimier Patocki, Siarhiej Šapira, Andrej Saŭčanka, Siarhiej Aksimovič, Janis Čučman, Marat Vołkaŭ, Alaksiej Alaksiejenka.
Za aktyŭny ŭdzieł u kampanii «Bajkot-2000» z Mahileŭskaha Dziaržaŭnaha Ŭniversytetu była adličanaja aktyvistka Maładoha Frontu Hanna Ziuzina. Dziaŭčyna vučyłasia na 4 kursie fiłfaku na damoŭnoj asnovie. 10 kastryčnika jana była vyklikanaja da dekana, jaki paviedamiŭ joj ab vyklučeńni, dadaŭšy, što treba zajmacca albo palitykaj, albo vučobaj. Na toj momant u Hanny nie było ani zapazyčanaściaŭ, ani vymovaŭ. Studentka źbirajecca padavać skarhu ŭ sud.
