Naviny za tydzień
Rabujuć biełaruskija asiarodki
U noč ź piatnicy na subotu abrabavali Bieraściejski centar padtrymki hramadzianskich inicyjatyvaŭ “Vieža”. Rabaŭniki vynieśli ŭsiu techniku, jakaja była ŭ karystańni centru: 6 kamputaraŭ, drukarku, madem, skaner, faks. Pry dapamozie hetaha abstalavańnia rychtavali da druku kala 46 vydańniaŭ małoha nakładu z usiaje Bieraściejščyny, pravodzili kamputarnuju škołu dla hramadzkich arhanizacyjaŭ, ładzili jurydyčnyja kansultacyi dla niefarmalnych hrupaŭ u pytańniach rehistracyi. Supracoŭniki “Viežy” pakinuli pamiaškańnie a 22-j uviečary 26 studzienia, a ranicaj (a 9.30) ofis znajšli ababranym. “Vieža” aranduje pamiaškańnie ŭ dvuchpaviarchovym damku ŭ samym centry Bieraścia — akurat nasuprać budynku znachodziacca rajsud i śledčy izalatar, jaki dzień i noč achoŭvajecca. Z budki achoŭnika dobra vidać i budynak “Viežy”.
Viaduć śledztva. Kali heta arhanizavali specsłužby, kab padarvać biełaruskuju dziejnaść, dyk šancaŭ, što rabaŭnikoŭ znojduć, vobmal. A vyhladaje na toje, bo litaralna dzień tamu, u noč z 25 na 26 studzienia, taksama abrabavali ofis Drysienskaha infarmacyjna-resursavaha centru “Rubon”. A miesiac tamu taki ž los napatkaŭ Navapołacki centar “Usiasłaŭ Čaradziej”.
Usie hetyja asiarodki zajmajucca padtrymkaj i raźvićciom hramadzianskich inicyjatyvaŭ i niefarmalnych abjadnańniaŭ roznaha kirunku: maładziovaha, žanočaha, spartovaha i h.d.
Hančaryk idzie
Prezydyjum Rady Federacyi prafsajuzaŭ padtrymaŭ prapanovu ab udziele Ŭładzimiera Hančaryka ŭ prezydenckich vybarach jak «šarahovaha hramadzianina šlacham zboru 100 tysiačaŭ podpisaŭ». Vybarčaja placforma budzie razhledžanaja paśla aficyjnaha abviaščeńnia daty vybaraŭ.
B.T.
Adzin – na 600 siemjaŭ
Ministar achovy zdaroŭja I.Zielankievič paviedamiŭ, što zaraz, finansujučy medyčnuju ŭstanovu, buduć uličvać kolkaść nia miescaŭ u špitalach, ale pacyjentaŭ, jakija prajšli cieraz ustanovu. Heta dazvolić, raźličvaje ministar, źnizić vydatki na 36%. Bo siońnia dziaržava moža adškadavać tolki 50 tys. rubloŭ na adnaho pacyjenta. Zaraz daktary buduć imknucca źmienšyć kolkaść aperacyjaŭ, dyjahnastyčnych matarjałaŭ, analizaŭ, miescaŭ u špitalach i času znachodžańnia chvorych u stacyjanary. A kali pacyjent stanie nastojvać, jamu prapanujuć zapłacić. Z hetaha hodu ŭ Biełarusi źjaŭlajecca j novaja medyčnaja specyjalnaść — lekar ahulnaj praktyki, chatni doktar. Pierakvalifikavacca ŭ siamiejnych daktaroŭ vymušanyja buduć terapeŭty. Siamiejnym, praŭda, jon budzie vielmi ŭmoŭna, bo kožny ź ich budzie absłuhoŭvać kala 2000 pacyjentaŭ. Adzin na 600 siemjaŭ.
B.T.
Ptušynaje carstva
Padviali vyniki Mižnarodnych dzion nazirańnia ptušak, jakija pravodzilisia 30 vieraśnia i 1 kastryčnika. Biełaruś brała ŭdzieł u hetaj akcyi druhi raz. U hetyja dni mnostva ludziej vyjechała na pryrodu, kab prasačyć, jakija ptuški sustrakajucca ŭ lasach, parkach, na rekach i aziorach.
U Biełarusi za dva dni amatary pryrody pabačyli 51365 ptušak 128 vidaŭ. Najčaściej sustrakaŭsia naziralnikam hrak. Zafiksavanyja taksama čorny busieł, skapa, źmiejajed, biełaja kurapatka, puhač i inšyja redkija vidy. Udzieł u nazirańni brali 457 čałaviek. Najbolej ptušak siarod usich udzielnikaŭ konkursu pabačyŭ Mikałaj Kuźmič ź Lachavičaŭ — 5744.
Radyjo Racyja
aficyjna
Premija raźjadnalniku
Adkryty list Siamiona Šareckaha patryjarchu Aleksiju
Staršynia Viarchoŭnaha Savietu Biełarusi Siamion Šarecki źviarnuŭsia z adkrytym listom da maskoŭskaha patryjarcha Aleksija ŭ suviazi z prysudžeńniem A.Łukašenku vysokaje pravasłaŭnaje premii. S.Šarecki nahadvaje, što termin paŭnamoctvaŭ A.Łukašenki zakončyŭsia i suprać stvoranaha im režymu ŭzbudžanaja kryminalnaja sprava pa fakcie zachopu ŭłady niekanstytucyjnymi srodkami. «Łukašenka, jak heta rabili i robiać usie dyktatary, raźjadnaŭ narod Biełarusi pavodle ŭsio taho ž balšavickaha pryncypu: chto nia z nami, toj suprać nas. Pry hetym “česnymi” jon ličyć tych, chto padtrymaŭ i praciahvaje padtrymlivać ździejśnieny im ŭ listapadzie 1996 h. dziaržaŭny pieravarot i ŭstalavańnie ŭ Biełarusi dyktatarskaha režymu», — piša Staršynia. «U Biełarusi siońnia ŭsia ŭłada skancentravana ŭ adnych rukach, — praciahvaje jon. — Tamu ŭ mnohich mižnarodnych arhanizacyj i palityčnych dziejačoŭ jość usie padstavy mierkavać, što paśla padzieńnia ŭ Juhasłavii režymu Miłošaviča Biełaruś zastajecca apošniaju ćvieržaju dyktatury ŭ Eŭropie. Bolš za toje, stvorany ŭ Biełarusi dyktatarski režym źjaŭlajecca ŭ adnosinach da samich biełarusaŭ pa sutnaści akupacyjnym, bo ŭsie klučavyja pasady ŭ im zajmajuć staŭleniki Maskvy».
«Što tyčycca samoha Alaksandra Łukašenki, — zaŭvažaje Staršynia, — dyk jon publična zajaŭlaŭ, što ličyć siabie “pravasłaŭnym ateistam”. Zychodziačy z hetaha, možna mierkavać, što Pravasłaŭnaja carkva jamu patrebnaja tolki dla realizacyi ŭsio tych ža ŭładalubnych pamknieńniaŭ. Tamu hetkuju ŭvahu vysokich hijerarchaŭ rasiejskaj Pravasłaŭnaj carkvy da hetaha nievylečna chvoraha na ŭładalubstva čałavieka nielha rasceńvać inakš jak padtrymku rasiejskaj šavinistyčnaj palityki ŭ adnosinach da Biełarusi», — hetkuju vysnovu robić sp.Šarecki.
