Apytańnie “NN”
Ci pahadzilisia b mieć ziaciem kadebista?
Maryja Paŭłaŭna, 44 hady, nastaŭnica:
— Tak, ja chacieła b, kab maim ziaciem byŭ kadebist. Jany dobra adukavanyja, padciahnutyja, sumlennyja, pry kvatery j hrašoch. Heta stabilnaja prafesija. Ja b i sama pajšła za jakoha pałkoŭnika.
Aleh, 36 hod, juryst:
— Paru hod tamu addaŭ by dačku za heboŭca, a ciapier nie. Tam nia moža być čystych ludziej. Vielmi brudnyja spravy tvoracca. Palityki źnikajuć, vyšuk palityčny viadziecca. Jany vymušanyja vykonvać lubyja zahady. Moj ziać pavinien być narmalnym čałaviekam.
Hary Pahaniajła, pravaabaronca:
— Ja svajoj dačce daŭ zrazumieć, što jana samastojnaja ŭ svaim vybary. Zakachałasia ŭ čekista — idzi za čekista. U samych kiepskich strukturach jość ludzi prystojnyja! Sam fakt prynaležnaści da peŭnaj struktury jašče ni pra što nia kaža.
Dyj złačynnyja zahady jany jurydyčna mohuć nie vykonvać. Ale na praktycy ŭsio zaležyć ad prystojnaści načalstva, u jakoha šmat sposabaŭ “abjeździć siŭku”. U krajnim vypadku, zastajecca mahčymaść pakłaści na stoł zajavu i syści. Hvałtam ciapier nie trymajuć. Ale kali čałaviek vykonvaje złačynnyja zahady z pačućcia samazachavańnia, jon usio adno miarzotnik.
Śviatłana Hryharovič, 40 hod, handlarka, dačce 16 hod:
— Treba viedać, čym jon tam zajmajecca. Jany, mabyć, usie adnolkavyja. Vysočvajuć ludziej i ŭ turmu sadziać. Dyk kali złych ludziej sadziać, narkadyleraŭ — to chaj maja dačka jdzie za jaho, a jak prostaha jakoha niebaraku za miech muki — dyk heta hrech, i žyćcia z takim nia budzie. Zrešty, kali jana jaho pakachaje, što ž zrobiš, chaj tady idzie. Ale ja b chacieła znać, što jon robić na pracy. Pahavaryć ź im treba było b, pryhledziecca. A raptam jon rasstrelvaje kaho ŭ padvale?
Tofik, biznesoviec, 38 hod:
— U mianie try syny. Ale kab była dačka, to nie addaŭ by, choć by płakała. Nie padabajucca mnie hetyja “šcirlicy”. Ale znajomstvy tam mieć karysna.
Nina F.:
— Maja dačka siem hadoŭ tamu vyjšła zamuž za lejtenanta KDB. Ja nia viedaju, čym jon zajmaŭsia j zajmajecca. My pra heta nikoli nie razmaŭlali. Niejkich piarečańniaŭ suprać jahonaj prafesii ni ja, ni dačka nia mieli. Ja nia viedaju, ci z-za słužby ŭ KDB Saša pačaŭ pić, zrabiŭsia žorstki, ździekavaŭsia fizyčna j maralna z dački j unučki i ŭrešcie vyhnaŭ ich z kvatery biez alimentaŭ. Jahonaje kiraŭnictva byccam stała na bok majoj dački, praź niekatory čas budzie sud, pabačym, ci adsudzim žyllovuju kvotu j alimenty.
Ci pahadzilisia b Vy vyjści zamuž za kadebista?
Ania, 16 hod, maryć stać madelkaj:
— Nizavošta nia vyjšła b, bo chaču źjechać za miažu, a z-za jaho nia vypuścili b.
Nataša, supracoŭnica turbiuro, 23 hady:
— Tak, vyjšła b. Za luboha aficera, nia tolki KDB. U ich jość kodeks honaru, jany strojnyja, nia pjuć, nia kurać, i ŭvohule, heta mužnaja prafesija.
Palina, maładaja mama, 18 hod:
— Napeŭna, nie. Heta strašna. Jany niejak źviazanyja sa złačynnym śvietam. Z-za jaho i ja b mahła atrymać udar nažom. Lepiej tudy nia leźci.
Ludmiła, 25 hod, vykładčyca:
— Jany nie adpaviadajuć maim unutranym adčuvańniam i pierakanańniam. Ichnaja reakcyja na śviet mnie čužaja. Iści tudy mohuć tolki ludzi, jakija adpaviadajuć peŭnym normam, a ja takich normaŭ bajusia.
Volha Maciušonak, 29 hod, medyk:
— Ja b nia vyjšła zamuž ani za čekista, ani za aficera. Jany vymušanyja vykonvać zahady. Heta słužby amaralnyja ad pačatku. “Radzimu abaraniać” — heta mit. Sapraŭdnaja ichnaja zadača — achoŭvać intaresy ŭładnych asobaŭ, najvyšejšych ešalonaŭ dziaržavy. Mahčyma, heta patrebnaja słužba, ja dapuskaju. Adnak mnie ŭsio roŭna nie padabajucca podłaść i žorstkaść, apraŭdanyja jany ci nie.
Apytvała Śviatłana Kurs
