Listy ŭ redakcyju
Kaladny padarunak
Niezvyčajny padarunak biełaruskim chryścijanam vyrašyli zrabić ułady pad śviata Božaha Naradžeńnia — začynili “Hołas dušy”. Biełteleradyjokampanija pazbaŭlaje naš narod takoj patrebnaj duchoŭnaj padtrymki. Karyść radyjopieradačy vidavočnaja — heta kłopat ab chvorych i tych, chto znachodzicca ŭ źniavoleńni j fizyčna nia moža naviedvać chramy. Apošni eter “Hołasu dušy” my pačuli 30 śniežnia. Treba, kab jaje adnavili!
Alaksiej Kalada, Kuncaŭščyna
Dapamažycie, dobryja ludzi!
Ja – invalid ź dziacinstva. Maci j baćka pamierli. U mianie niama srodkaŭ na pakupku samaha nieabchodnaha: ježy, vopratki, lekaŭ. Chacia j soramna pra heta prasić, ale prašu: dapamažycie mnie, dobryja ludzi, i vyšlicie dla mianie panošanuju vopratku j abutak (pamier vopratki 52, abutku letniaha 42—43, zimovaha 44, šapak – 59).
Mieluch Anton, vuł.Kamsamolskaja, dom 7. v.Bahdanaŭka, Łuniniecki rajon, Bieraściejskaja vobłaść, 225658.
Na asobnaj staroncy
Kali ŭsio ž taki drukujecie prahramu, to zrabicie, jak “Pahonia” rabiła, na asobnaj staroncy, kab možna było biez škadavańnia vykinuć, bo ja źbiraju “NN” u padšyŭku. Na chaleru mnie ŭ padšyŭcy taja prahrama? Biełaruś źmianiajecca – niachaj i “Naša Niva” źmianiajecca, ale ŭ lepšy bok.
Tvorčych pośpiechaŭ Vam, ščaścia, zdaroŭja i ŭsiaho najlepšaha.
Piatro Dyrynda, Vialikaje Siało (Śvisłaččyna)
Nijakich prahramaŭ!
Ja kateharyčna suprać raźmiaščeńnia prahramy telebačańnia ŭ Vašaj hazecie. Navošta? Ciapieraka ŭ kožnaj hazecie jość hetaja prahrama. Tamu kali jana kamuści patrebnaja, jon jaje znojdzie. “NN” nie taho kštałtu hazeta, kab vykidać ceły arkuš na hetuju spravu. Lepš raźmiaścić tamaka jakuju-niebudź razmovu z čałaviekam, nadrukavać cikavyja listy čytačoŭ. Budzie bolš karyści ŭsim. Tamu, kali ŭ Vas jość mahčymaść, uličycie i moj hołas. Nijakich prahramaŭ!
Siaržuk, Miensk
Kaladnaje pasłańnie ajca Ivana (Spasiuka)
Pavažanyja braty, siostry, lubyja sercu biełarusy!
Napiaredadni Vialikaha śviata Naradžeńnia Chrystovaha dazvolcie pavinšavać vas i vašych blizkich z hetym śviatam.
Siońnia našyja malitvy radasnyja i pieradśviatočnyja. Biełaruskaja Aŭtakiefalnaja Pravasłaŭnaja Carkva molicca, kab Hospad sahreŭ ciapłom našyja damy, umacavaŭ našaje zdaroŭje, vylačyŭ našyja spustošanyja dušy. Niachaj z Naradžeńniem Chrystovym u dušy kožnaha z nas narodzicca luboŭ i mir — carkoŭny, nacyjanalny j siamiejny. Sapraŭdy, chto maje ŭ dušy luboŭ, toj sam robicca čałaviekam praŭdy i spraviadlivaści. Na žal, u naš čas ludzi źbirajuć materyjalnyja bahaćci, a nie duchoŭnyja spažytki. Navat chryścijanin, što pryniaŭ śviaty chrost i daŭ zarok žyć pa zapavietach Božych, časta nie vykonvaje svajho pryznačeńnia. Naradžeńnie Chrystova daje mahčymaść bačyć Boha ŭ śviatle dabryni, mudraści i viečnaści. Niachaj Hospad schilić nas da chryścijanskaj lubovi, jednaści j miru. Na hetym šlachu niachaj Betlejemskaja zorka aśvietlić naš rozum. U hetyja pieradśviatočnyja dni Naradžeńnia Chrystova sardečna vitaju Vas, darahija braty j siostry, ź Vialikim śviatam i Novym 2002 hodam.
Vinšuju sa śviatam usich našych ziemlakoŭ-biełarusaŭ, pa ŭsim śviecie raskidanych. Ad ščyraha serca vitaju z Naradžeńniem Chrystovym našaha prezydenta Alaksandra Łukašienku i malitoŭna prašu ŭ Boha jamu dapamohi, kab jon apraŭdaŭ davier biełaruskaha narodu j vyvieŭ biełaruskuju dziaržavu na eŭrapiejski šlach raźvićcia. Vinšuju sa śviatam urad, usich pravicielaŭ našych i Biełaruskaje vojska.
Prasłaŭlajučy Naradžeńnie Chrystova, dziakujma Jamu za ŭsie jahonyja dobryja dziei, za radaść i smutak. Niachaj Hospad budzie litaścivy da nas u vyprabavańniach našaj viery i lubovi i praniasie mima nas čašu hnievu Svajho za hrachi i biezzakońni našyja.
Niachaj dabrasłavieńnie Božaje pierabyvaje ź Biełarusiaj i narodam jaje.
Łaska Hospada Isusa Chrysta niachaj budzie z usimi nami.
Chrystos naradziŭsia!
Słaŭma jaho!
Pratajarej Jan Spasiuk
