Zinaida Hančar,
žonka źnikłaha biełaruskaha palityka, źviartajecca pa dapamohu da Staršyni Rady Biełaruskaj Narodnaj Respubliki Ivonki Surviłły.
Zinaida Hančar,
žonka źnikłaha biełaruskaha palityka, źviartajecca pa dapamohu da Staršyni Rady Biełaruskaj Narodnaj Respubliki Ivonki Surviłły.
Pavažanaja spadarynia Surviłła!
16 vieraśnia 1999 hodu ŭ Miensku źnik moj muž Viktar Hančar. Biezumoŭna, Vam nia varta raspaviadać pra toje, jakuju rolu jon adyhryvaŭ u biełaruskaj palitycy i čamu A.Łukašenka ličyŭ Viktara samym niebiaśpiečnym svaim palityčnym praciŭnikam. Moj muž pierš za ŭsio šanavaŭ intaresy svajoj krainy, svajho narodu. Jon zaŭsiody byŭ niepadkupnym i pryncypovym, nikoli nie išoŭ na kampramisy sa svaim sumleńniem, nikoli nie šukaŭ drobiaznych vyhodaŭ.
Na žal, mnie amal niama da kaho źviarnucca ŭ rodnaj krainie: namahańni biełaruskaj hramadzkaści nie dajuć plonu. A na ščyraść i dapamohu ciapierašniaj ułady niama sensu raźličvać, pakolki z abnarodavanych dakumentaŭ vynikaje, što da źniknieńnia majho muža majuć dačynieńnie A.Łukašenka, ciapierašni hieneralny prakuror V.Šejman i były ministar unutranych spravaŭ Ju.Sivakoŭ. Viadoma, ja nie sudździa i nie biarusia sudzić, ale pavodziny ŭłady j aficyjnaha śledztva tolki paćviardžajuć, na čyim sumleńni los majho muža.
Spadarynia Surviłła! Vy majecie vialiki aŭtarytet u biełarusaŭ va ŭsim śviecie, i ja vielmi prašu Vas davieści da viedama našych suajčyńnikaŭ sapraŭdnuju infarmacyju pra toje, što adbyvajecca na ich histaryčnaj radzimie. Ja vielmi prašu Vas asabista i biełaruskija dyjaspary ŭźniać prablemu palityčnaha teroru ŭ Biełarusi pierad uradami tych krainaŭ, dzie jany žyvuć. Siońnia tolki mižnarodnaja hramadzkaść moža prymusić A.Łukašenku skazać praŭdu pra toje, što zdaryłasia z maim mužam i inšymi źnikłymi ludźmi.
Ja chaču z Vašaj dapamohaj źviarnucca da ŭsich biełarusaŭ śvietu: dapamažycie! Parajcie, što možna zrabić u hetaj sytuacyi.
Nielha maŭčać, kali na pačatku XXI stahodździa našaja kraina znoŭku abryniecca ŭ biezdań teroru i kryvi, jak u 1937 hodzie...
Z pavahaj i nadziejaj,
Zinaida Hančar
1 lutaha 2002 h.
Šanoŭnaja i darahaja Spadarynia,
ź vialikim sumam čytała Vaš list ad 1 lutaha hetaha hodu, jak čytaju ad vieraśnia 1999-ha ŭsie viestki ab losie Vašaha pavažanaha muža Viktara Hančara. Razumieju Vaš bol, bo ŭ dziacinstvie i mnie daviałosia pieražyć takuju trahiedyju, kali enkavedysty “zabrali” baćku i mama ceły hod płakała i starałasia davieści ŭsiamu śvietu, što jon ničym nie praviniŭsia.
Historyja na našaj biednaj Baćkaŭščynie, na žal, paŭtarajecca, a ludzi abo nia chočuć, abo nia zdolnyja heta sabie ŭśviadomić. Kłapociacca tolki pra kavałak chleba i nie zdajuć sabie spravy, što zaŭtra, mahčyma, nastanie čarha i na ich i nia budzie ŭžo kamu ich baranić.
Dazvolcie pieradusim Vam skazać, darahaja Spadarynia Hančar, što Vašyja vysiłki bačym my ŭsie i bačyć ich uvieś volny śviet. Vaš pieršy adkryty list Barysu Jelcynu, jašče ŭ vieraśni 1999 h., ja sama pierakłała na anhielskuju movu i vysłała razam z majoj asabistaj prośbaj tahačasnamu ministru zamiežnych spravaŭ Kanady Łojdu Aksuorty. Mnie dakładna viadoma, što pradstaŭniki kanadzkaha ŭradu ŭzdymali hetaje pytańnie na mižnarodnych forumach. Siabry Rady BNR u ZŠA i ŭ krainach Eŭropy taksama pisali svaim uradam. Na žal, dyktaturu, jakaja dziaržycca pry ŭładzie siłaj, pierakanać možna tolki siłaj. Tym bolej kali joj abyjakavy los narodu.
Uvažaju, adnak, słušnymi Vašyja listy prezydentu Rasiejskaj Federacyi Ŭ.Pucinu, bo ŭ vialikaj miery dziakujučy jahonaj padtrymcy, “dziela stratehičnych intaresaŭ Rasiei”, Łukašenka jašče znachodzicca pry ŭładzie. Na žal, “stratehičnyja intaresy Rasiei” dla sp.Pucina važniejšyja za ŭsie parušeńni ludzkich pravoŭ u Biełarusi.
Zastajecca naš narod. Ihnaravańnie złačynstvaŭ i ździeku sa svaich ludziej, sa svaich susiedziaŭ j svajakoŭ, sa svajho kraju, sa svajoj kultury i movy, nia jość hodnym nijakaha cyvilizavanaha narodu. Častka hramadztva, i asabliva moładzi, heta zrazumieła. Kali b moładź i žančyny, jakija Vam spačuvajuć, kali b usie ludzi dobraje voli źjadnalisia i mužna vyjšli na vulicy haradoŭ Biełarusi, damahajučysia adkazu na pytańni adnosna losu źnikłych, — tak, jak ludzi ŭ inšych krainach śvietu vychodziać u abaronu svaich pravoŭ — pieramahli b i my dyktaturu biaz zbroi i bitvaŭ.
Rada BNR i biełaruskaje nacyjanalnaje hramadztva buduć i nadalej damahacca dapamohi ad volnaha śvietu, kab raskryć praŭdu ab losie Vašaha muža.
Žadaju Vam, darahaja Spadarynia, nadziei i vytryvałaści.
Z hłybokaj pašanaj,
Ivonka Surviłła,
Staršynia Rady Biełaruskaj Narodnaj Respubliki
