Alaksandar Dabravolski: “Labiedźka ŭmieje pracavać”
Na pytańni “NN” adkazvaje namieśnik staršyni Abjadnanaj hramadzianskaj partyi Alaksandar Dabravolski
“NN”: U krasaviku adbudziecca źjezd AHP. Ci pryniasie jon partyi pieramieny?
A.D.: Paśla prezydenckich vybaraŭ źmianiłasia kanfihuracyja apazycyjnych siłaŭ, umovy dla palityčnaj dziejnaści stali bolš abmiežavanymi, tamu niekatoryja kirunki svajoj dziejnaści my źbirajemsia karektavać istotna. Pierš za ŭsio my chacieli b adkryta pryznać svaje pamyłki. Spadziajusia, što prajekt adpaviednaj rezalucyi budzie pryniaty na źjeździe. My budziem pašyrać svaju dziejnaść u sfery ekanomiki, achovy zdaroŭja, adukacyi, vajskovaj reformy. Adpaviednyja pracoŭnyja hrupy ŭžo stvoranyja. Nam nieabchodna i bolš systemna baranić svaich prychilnikaŭ, jakich pieraśledujuć ułady. Urešcie, nam patrabujucca novyja ludzi. Ich nie abaviazkova musić być šmat, ale jany pavinny być zdolnyja paśla źmieny ŭłady kiravać krainaj.
“NN”: Na źjeździe adbuducca vybary novaha kiraŭnictva AHP. Jak by Vy acanili jahonuju dziejnaść u apošnija hady?
A.D.: Kiraŭnictva pracavała davoli aktyŭna, efektyŭna. Tamu naŭrad ci zaraz treba pravodzić niejkija radykalnyja źmieny, choć peŭnyja pierastanoŭki ŭ kiraŭnictvie, u tym liku i siarod namieśnikaŭ staršyni, mahčymyja.
“NN”: Ci budzie chto-niebudź, akramia Labiedźki, pretendavać na pasadu kiraŭnika partyi?
A.D.: Usio mahčyma. Ale ludziej, jakija pretendavali b na hetuju pasadu niebiespadstaŭna, niašmat. Alternatyŭnyja kandydaty mohuć być. Ale, dumaju, Labiedźka pakazaŭ, što ŭmieje dobra pracavać.
“NN”: Paśla vybaraŭ vy prapanavali ŭładzie niekalki ekanamičnych dakumentaŭ. Heta možna razhladać jak imknieńnie da supracoŭnictva zamiest raniejšaje rezkaje kanfrantacyi?
A.D.: U nas dva roznyja padychody da ŭłady. Tam jość ludzi (asabliva heta tyčycca miascovaha kiraŭnictva), hatovyja zrabić šmat karysnaha dla Biełarusi. Ź imi my majem namier pracavać bolš ščylna, čym raniej. Ale admaŭlacca ad kanfrantacyi z tymi, chto parušaje zakon, nie źbirajemsia.
“NN”: Jakim čynam vy źbirajeciesia ŭdzielničać u miascovych vybarach?
A.D.: Udzieł, u zaležnaści ad abstavinaŭ, moža być rozny: ad vyłučeńnia svaich kandydataŭ da infarmacyjnaje kampanii, kali vybary buduć pieratvorany ŭ fars. Ale ciapier my nie chacieli b zaklikać da bajkotu. Pierad prezydenckimi vybarami, dziela adzinstva apazycyi, my prynieśli ŭ achviaru stratehii mahčymaść pracavać ź ludźmi. Ciapier apošniaje my stavim na pieršy plan.
“NN”: Ale ci ŭ stanie AHP pieramahać?
A.D.: My hatovyja pieramahać pry bolš-mienš spraviadlivym padliku hałasoŭ. Biezumoŭna, my nia zmožam, z-za adsutnaści naležnych arhanizacyjnych strukturaŭ, vystavić kandydataŭ pa ŭsich akruhach, ale ŭ bolšaści rajcentraŭ i vialikich haradoŭ našyja kandydaty buduć. Pra našu zdolnaść pieramahać śviedčać vyniki vybaraŭ u Viarchoŭny Saviet 13-ha sklikańnia ci choć by toje, što dva siabry AHP, jakija parušyli partyjnuju dyscyplinu i ŭziali ŭdzieł u vybarach u pałatu pradstaŭnikoŭ, atrymali mandaty.
“NN”: Ci ličycie vy ichny ŭčynak apraŭdanym z punktu hledžańnia siońniašniaha dnia?
A.D.: Nie, bo tak zvanaja pałata pradstaŭnikoŭ — heta butaforyja. Adzin ź ich zastaŭsia siabram partyi, druhi vyjšaŭ. My nie supracoŭničajem z PP NS, ale my padtrymlivajem suviazi z tymi, chto vykarystoŭvaje navat takuju mahčymaść, kab zrabić dla Biełarusi niešta karysnaje.
“NN”: Usio ž taki najaŭnaść takich ludziej dla vas — plus?
A.D.: Ja nia dumaju, što ciapier heta dla niekaha plus. Bo sama pa sabie pałata pradstaŭnikoŭ — minus, jaki moža zrabicca plusam tolki paśla źmieny jejnaj sutnaści.
“NN”: Ci bačycie Vy što-niebudź karysnaje ŭ siońniašniaj ekanamičnaj, sacyjalnaj, kulturnaj palitycy ŭładaŭ?
A.D.: Jość prablema, biez vyrašeńnia jakoj nia moža być prahresu ni ŭ jakim pytańni ekanamičnaha, sacyjalnaha, kulturnaha žyćcia krainy. Heta adsutnaść u siońniašniaj Biełarusi abarony pravoŭ čałavieka, demakratyi i rynkavaj ekanomiki.
Hutaryŭ V.P.
