Ab usim patrochu
Pieraplunuła “Internacyjanał”
Na sustrečy fermeraŭ Mienščyny, jakaja prajšła niadaŭna ŭ abłvykankamie, jahony staršynia Mikałaj Damaškievič uručyŭ hanarovuju hramatu Linie Šubie ź vioski Sorahi (Słuččyna). Jejnaja haspadarka “Spadčyna” pradaje dziaržavie štohod zvyš 40 tonaŭ małaka i 8—10 tonaŭ miasa. Siaredni nadoj na karovu tut — 4100 kiłahramaŭ — udvaja bolšy, čym u miascovym kałhasie “III Internacyjanał”. Utraja vyšejšyja ŭ spadaryni Liny i ŭradžai: zbožžavych jana atrymlivaje pa 30—35 centneraŭ z hiektaru, bulby — 350—400.
Michaś Tyčyna, Słucak
Upalavali palaŭničych
Supracoŭniki Ašmianskaha RUUS zatrymali dvuch ašmiancaŭ, jakija naładzili niezakonnaje palavańnie pablizu vioski Hardzijeŭcy. Kanfiskavany dźvie ŭpalavanyja kunicy, babior, zajac i cieciaruk. Brakańjery zapłaciać štraf.
Zhon za 5 chvilinaŭ
Piać chvilinaŭ spatrebiłasia 25-hadovamu žycharu Połacku, kab skraści pakinutuju la restaracyi “Rezanans” u Smurhoniach “Aŭdzi-80”. Adrazu ž na terytoryi rajonu pačałasia aperacyja “Pierachop”. Praz paŭhadziny ŭ Vialejcy supracoŭniki DAI ŭbačyli ŭhnany aŭtamabil i pačali nazirańnie za im. Jašče praz hadzinu aŭtamabil spynili, a zhonščyka zatrymali.
Marjan Vianhroŭski, Astraviec
Žyvuć z vaŭkami
Jašče ŭletku smurhonskija palaŭničyja znajšli voŭčaje łohava, dzie było piaciora vaŭčaniat. Traich zabili, a dvaich uziaŭ “na vychavańnie”laśnik Uładzimier Lach. I voś užo 8 miesiacaŭ Voŭk i Čypa žyvuć u vioscy Arechaŭka. Vaŭčaniatami ŭžo cikaviŭsia Maskoŭski cyrk, što pryjaždžaŭ siudy na hastroli. Ale laśnik kaža, što z dapamohaj jahonych vychavancaŭ možna było b adnavić papulacyju vaŭkoŭ u Anhlii, dzie apošni źvier byŭ zabity 170 hod tamu.
Taciana Skarynkina, Smurhoni
Suvoraŭ na adnu noč
U niadaŭna adčynienym hateli “Suvoraŭ” u Kobryni prapanujucca numary-“luks” u śviatočnym ubrańni dla maładych, što rehistrujuć šluby. Achvočych skarystacca z pasłuhi nia duža bahata.
Biełuju viežu padnoviać
Sioleta na restaŭracyju Kamianieckaje viežy budzie dadatkova nakiravana ź dziaržaŭnaha biudžetu kala 90 młn. rubloŭ. Restaŭracyja ciahniecca ŭžo niekalki hod. Vieža pakul začynienaja dla naviednikaŭ.
Skrali butsy
Paśla apošniaje hulni bieraściejskaje futbolnaje kamandy “Dynama” sa “Źviazdoj-VA-BDU” (Miensk) u hulca-bieraściejca Źmitra Strački skrali butsy. Mahčyma, da spartovaha abutku futbalista “dabieh” niechta z fanaŭ.
Zakońniki bjucca
U Kobryni ŭ pracoŭny čas pabilisia rabotniki mižrajprakuratury. Incydent adbyŭsia z-za taho, što pamočnik prakurora admoviŭsia pakinuć kabinet, kali tam išoŭ prahlad videazapisu śledčaha eksperymientu kryminalnaje spravy, da jakoj jon nia mieŭ dačynieńnia. Pamočnik prakurora, jaki ŭdaryŭ staršaha śledčaha kułakom pa tvary, zvolnieny z orhanaŭ.
Aleni na ekspart
Kobrynski lashas pradaŭ sioleta 10 aleniaŭ u Kałuhu (Rasieja). U siarednim kožny ź ich kaštuje 200—250 dalaraŭ. Hadujuć aleniaŭ na admysłovaj fermie ŭ Braševickim laśnictvie, što na Darahičynščynie.
Vyjhraŭ kvateru
Adnapakajoŭku ŭ abłasnym centry płoščaj 54 kv.m. i koštam 16 młn. rubloŭ vyjhraŭ u rehijanalnuju latareju “Bieraście” baćka piaciarych darosłych dziaciej Ryhor Nalivončyk. Žyvie jon u vioscy Botava, što pad Pinskam. Razam z žonkaj-dajarkaj pracuje na fermie.
Internet začynieny
Adziny ŭ Bieraści internet-klub, što mieściŭsia pa vuł.Nahanava, 10, časova začyniŭsia. Jahonaja haspadynia Natalla Šaŭčuk kaža, što šukaje pamiaškańnie ŭ centry horadu, dzie naviednikaŭ budzie bolej.
I.Chviedarovič, Bieraście
Śmierć na mitynhu
1 sakavika padčas mitynhu, pryśviečanaha Dniu haradzienskaj milicyi, pamior pensijaner Michaś Płatonaŭ, staršynia Rady veteranaŭ MUS. Jon vyjšaŭ, kab pavinšavać maładych milicyjantaŭ, što pryniali prysiahu, skazaŭ kolki słovaŭ, straciŭ prytomnaść i pavaliŭsia kala pomnika voinam-vyzvalicielam. Načalstva praciahvała pramaŭlać, kab nie spyniać uračystaści. Chutkaja, što pryjechała praz 12 chvilinaŭ, kanstatavała śmierć.
Andrej Mialeška, Horadnia
Chto nia kuryć i nia pje
Pa prapanovie staršyni praŭleńnia kałhasu “Radzima” Alaksandra Łapacientava schod kałhaśnikaŭ hetaj haspadarki pryniaŭ admysłovuju pastanovu. Kožny pracaŭnik “Radzimy”, jaki nia palić, budzie atrymlivać 10%-ju nadbaŭku da zarobku. A toj, chto ŭvohule trymajecca zdarovaha ładu žyćcia, moža pretendavać i na 15%.
Nadbaŭki abyducca haspadarcy prykładna ŭ 40 byčkoŭ štohod. “Radzima”, jakaja siarod białynickich kałhasaŭ vyłučajecca adnosnaj stabilnaściu, pakul moža sabie dazvolić takoje zaachvočańnie.
Bazyl Lićvinovič, Białyničy
Siamiejnaje zachapleńnie
U Baranavičach na ŭliku ciapieraka znachodziacca 174 narkamany. Ź ich 139 — mužčyny. Viek vahajecca ad 13 da 68 hadoŭ. Samaje žachlivaje, što 9 siamiejnych paraŭ razam spažyvajuć narkotyki.
Rusłan Raviaka, Baranavičy
Laŭreaty “Pszeglądu Wschodniego”
9 sakavika ŭ Varšavie ŭručali ŭznaharody, zasnavanyja časopisam “Przegląd Wschodni”. Pavodle tradycyi, uračystaść adbyvajecca ŭ pieršuju subotu paśla dnia śv.Kazimiera (4 sakavika) u Załatoj zali Kazimieraŭskaha pałacu Varšaŭskaha ŭniversytetu.
Siarod laŭreataŭ premii ažno troje biełarusaŭ. Anatol Kułahin atrymaŭ dyplom za knihi “Katalickija chramy ŭ Biełarusi” i “Pravasłaŭnyja chramy ŭ Biełarusi”. Historyk, urbanist i redaktar “Spadčyny” Zachar Šybieka ŭhanaravany za “Narys historyi Biełarusi (1795-2000)”, a Hienadź Sahanovič — za “Narys historyi Biełarusi ad staražytnych časoŭ da 1795 h.”, jakija vyjšli pa-polsku raniej, čym pa-biełarusku.
Uł.inf.
Čyścinia kryvi
Ja pasłužyŭ by trochi pad bieł-čyrvona-biełym ściaham, kali b paśla škoły pajšoŭ cierabić nie studenckija, a žaŭnierskija ściežki. Dziakujučy adterminoŭcy daviałosia słužyć zusim pad inšym štandaram dy nasić na hałaŭnym ubory cešku z hierbam. Spadzievaŭ sutyknucca ŭ vojsku ź biełaruščynaj było vobmal, tamu kožnaja drabniutkaja sustreča była padstavaju dla ŭciechi.
Baranavičy. 8-y kanvojny bataljon. Nas, maładniak, vyhnali prybirać śnieh. Ja apynuŭsia la haražoŭ. Pałova varotaŭ była pračynienaja, i na joj z unutranaha boku visieŭ čyrvony varaski ščyt z vyjavaju “muža zbrojnaha miečam na biełym kani”. U Vaŭkavysku ž, dzie ja praciahvaŭ słužbu, etalonnaja vyjava “Pahoni” visieła na bakavoj ściency šafy ŭ kapciorcy staršyni. Dziela čaho tyja pierachovy? Mahli ž biez cyrymonijaŭ “utylizavać”. Trymajuć, adnak.
Pra apazycyju nam nahadvali jašče ŭ baranavickaj “vučebcy”. Niejak siarod nočy dali kamandu “Padjom!” Heta była nie tryvoha, prosta pjany tavaryš major nadumaŭsia pahutaryć z “maładymi”. Śpič byŭ biazładny. Kułamiesa słovaŭ kruciłasia vakoł adnaho spałučeńnia — “Maršu Svabody”. Pieršy Marš narabiŭ va ŭnutranych vojskach šorhatu. Adčuvałasia žadańnie kamandziraŭ uziać revanš. Na placy “dziady” j “čarapy” adpracoŭvali praktykavańni pa razhonie “skoplenij ludiej”: adny ŭ šałomach, sa ščytami dy humavymi “rehulatarami”, druhija — u štodzionnaj formie sa śniežkami zamiest kamianioŭ.
Sutykajučysia ŭ vojsku z łukašenkaŭskaj symbolikaj, ja adciemiŭ dziŭnuju nieadnastajnaść abrysaŭ Biełarusi na roznych vyjavach hierbu — tut tabie j kontury Aŭstralii, Antarktydy, Hrenlandyi ŭ ciarnovym vianku z čyrvona-zialonaj stužkaj. Zredku na voka traplali ekzemplary z mapaj Biełarusi ŭ miežach to 1925, to 1939 h., a to i ŭ adpaviednaści z kartaju Jaŭchima Karskaha. U kožnaj rocie byŭ stend “Biełaruś — maja Ajčyna”, aformleny pa-svojmu. U baranavickaj vučebcy visieła mapa našaj krainy (niesamarobnaja!), na jakoj vioski byli padpisanyja, a harady — nie. Nibyta čakali viartańnia spradviečnych imionaŭ. U vaŭkavyskaj vajskovaj čaści na hetkim stendzie byŭ šykoŭny kalaž: mienskaja Katedra na fonie abrysaŭ Biełarusi dy ščyty-hierby biełaruskich haradoŭ. Pobač tuliŭsia saplivy vieršyk:
Ja łovlu eti pieśni i dumy, i snova
Budto pju iz krynic i v oziora hlažuś.
Ty navieki vošła v mojo sierdcie i słovo,
Biełaruśsija, pieśnia, siestra Biełaruś!
Dzień unutranych vojskaŭ — 18 sakavika. U hety dzień u 1918 h. utvaryŭsia atrad, jaki staŭsia asnovaju Biełaruskaha pałka — kanvojnaha padraździełu ŭ BSSR. Taja data źviazvajecca i ź Mienskam, u jakim na toj čas stajali niemcy j rabili sproby dziaržaŭnaha budaŭnictva BNR. Ale pra niemcaŭ i BNR palitruki nam skazać zabylisia. Moža, sami niadobra viedali biełaruskuju historyju. “Tavaryšy aficery i praparščyki, zirnicie na Biełaruś inakš!” Dobry byŭ by zaklik, kab nie pieravaha alkaholu ŭ kryvi mnohich ź ich. To ž jość padstava zmahacca za čyściniu kryvi. A tam — załunaje naš štandar, dajcie viery.
Siarhiej Bałachonaŭ, Homiel
in memoriam
Pamior zarana
Pamior Vasil Daŭhaloŭ, žurnalist, redaktar hazety “Biełaruski Ŭschod”, jakaja była najvialikšaj spravaju jahonaha žyćcia. Bolš za 10 hadoŭ sp.Vasil vydavaŭ svaju hazetu u vioscy Markaŭka, što pad Chocimskam, baroniačy najśviaciejšyja niezaležnickija ideały. Śmierć zaśpieła jaho raptoŭna, i chaŭtury byli da zvyčajnaha prykrymi. Tak chavali tysiačy biełaruskich patryjotaŭ: pobač z trunoju byli tolki rodnyja.
S.H., Mahiloŭ
Stomlenaść Alimpijadaj
Jak kaho, a mianie dyk stamiła hetaja skandalnaja Alimpijada ŭ Sołt-Łejk-Syty.
Až da taho, što apošnija chakiejnyja matčy našaj kamandy davieryŭ hladzieć dačce (jana asabliva ŭpadabała Dudzika i raz-poraz kryčała na ŭsiu kvateru: “Dudzik! Dudzik!”), a sam padychodziŭ tolki na vostryja momanty dy zakinutyja šajby. Rehlament chakiejnaha turniru praduhledžvaŭ, što kamandy praviaduć sama bolej pa siem sustrečaŭ. Chto ž viedaŭ, što paśla čverćfinału zastaniecca hulać kamanda, jakaja pryniała start z kvalifikacyi. Ciapier, mahčyma, budzie źmienieny farmat chakiejnych spabornictvaŭ.
Prahrama zimovych Alimpijadaŭ vyhladaje pierahružanaj. Heta adčuvajuć nia tolki hledačy j spartovyja žurnalisty. Z-za vialikaj kolkaści skandałaŭ i apelacyjaŭ kiraŭnik Mižnarodnaha antydopinhavaha ahienctva Ryčard Paŭnd, były vice-prezydent MAK, atrymaŭ zadańnie raspracavać reformy, jakija, mahčyma, pryviaduć da taho, što vidy sportu, dzie vystaŭlajucca subjektyŭnyja acenki (fihurnaje katańnie, synchronnaje płavańnie, skački z tramplinu i h.d.), buduć vyklučanyja z prahramy Alimpijadaŭ. U hetuju hrupu moža trapić i frystajł, choć hetym razam niejkich pretenzijaŭ da pracy sudździaŭ mienavita ŭ frystajle nie było.
...A tym časam adbyłasia vielmi značnaja dla nas padzieja u lohkaj atletycy.
Na čempijanacie Eŭropy ŭ pamiaškańni (Viena, 1—3 sakavika) našyja Kaciaryna Stankievič, Iryna Chlustava, Hanna Kozak dy Śviatłana Ŭsovič zdabyli “zołata” ŭ estafecie 4ch400 metraŭ. Nikoli raniej my nia mieli aficyjnych pieramoh u estafetnym biehu! Mahčyma, kryšačku stavić pad sumnieŭ vartaść hetaj pieramohi toje, što ŭ rehlamencie hetych spabornictvaŭ była vystaŭlenaja adna dosyć ekzatyčnaja umova: u zajaŭcy estafetnych kamandaŭ abaviazkova pavinny byli prysutničać dźvie najlepšyja biahuchi krainy pa vynikach minułaha hodu. Praz heta nia vystupiła kamanda Rasiei, jakaja mahła b być favarytam. Ale ž — čytajcie rehlament, jon adnolkavy dla ŭsich i dastupny zahadzia! A kab nichto nie sumniavaŭsia, našyja słaŭnyja dziaŭčaty ŭstanavili rekord čempijanataŭ Eŭropy — 3,32.24 chviliny. Jany pieraŭzyšli rekord rasiejskaj kamandy, jaki taja ŭstanaviła dva hady tamu ŭ Hiencie. Jašče my majem dźvie bronzy — Alesi Turavaj u biehu na 1500 metraŭ dy Alaksandra Hłavackaha ŭ trajnym skačku. Takim čynam, pa medalach my zaniali 10-je miesca. Cikava, što ŭ Vienu vypravilisia 12 čałaviek, i roŭna pałavina z hetaha składu atrymali medali.
A.U.
