Kožny dzień z 16 hadzin viełapatrul zastupaje na achovu rajonnaha centra z dapamohaj dvuchkołych siabroŭ. Da nadychodu ciemry milicyjanty dziažurać na miascovym vodaschoviščy, a zatym — u miescach adpačynku moładzi, centralnym placy i haradskim parku. Dvuchkoły transpart dazvalaje milicyjantam być bolš mabilnymi i svoječasova reahavać na paviedamleńni ab pravaparušeńniach, bo trapić na miesca zdareńnia na viełasipiedzie značna chutčej, čym piecham. Akramia mabilnaści, u tych supracoŭnikaŭ pravaachoŭnych orhanaŭ, jakija karystajucca viełasipiedami, jość realnaja mažlivaść padtrymać na dobrym uzroŭni svaju fizičnuju formu.
Na žal, finansavyja srodki, jakimi vałodaje Vaŭkavyski rajonny adździeł unutranych spraŭ, dazvolili nabyć tolki dva hornyja viełasipiedy. U svoj čas vaŭkavyskija milicyjanty paviedamili kiraŭnictvu, što siaduć na viełasipiedy tolki ŭ tym vypadku, kali jany buduć zamiežnaj vytvorčaści: vykarystoŭvać u apieratyŭnaj pracy biełaruskija viełasipiedy milicyjanty kateharyčna admovilisia, spasyłajučysia na ich niepryhladny estetyčny vyhlad i drennyja techničnyja mahčymaści.
Ciapier kiraŭnictva Vaŭkavyskaha rajonnaha adździeła ŭnutranych spraŭ šukaje sponsaraŭ, jakija b dapamahli nabyć jašče niekalki viełasipiedaŭ. Ale ich pakul nie znachodzicca, u suviazi z čym miascovyja milicyjanty dobrym słovam uspaminajuć viadomaha biznesoŭca i miecenata Mikałaja Aŭtuchoviča, jaki zaŭsiody padtrymlivaŭ razumnyja inicyjatyvy, ale zaraz adbyvaje termin źniavoleńnia ŭ kałonii ŭzmocnienaha režymu. U svoj čas pradprymalnik sprabavaŭ vykryć fakty chabaru z boku staršyni padatkovaj inśpiekcyi, za što i patrapiŭ za kraty.
