tydzień našaha žyćcia
Hledziačy z Babra
U ciapierašnim palityčnym žyćci vyłučajecca ŭmacavańnie niezaležnickich pamknieńniaŭ. Siem hod kiravańnia Łukašenki, kali my dumali, što jon zdaść našuju niezaležnaść i pierajedzie ŭ Maskvu, — minulisia. Uzhadavałasia biełaruskaje “łobi” — tyja, kamu niezaležnaść vyhadnaja: fermery, pradprymalniki, biznesoŭcy, zbolšaha miascovaha pachodžańnia. Ciapier ja maru pra “dysydentaŭ u pahonach” — milicyjantaŭ, vajskoŭcaŭ. Kab było bolej ludziej kštałtu Hienadzia Vuhlanicy. I jašče asabista mnie chaciełasia b bačyć pryvatnych mecenataŭ spamiž biznesoŭcaŭ, chaciełasia b bačyć kulturnych biznesoŭcaŭ. Nie staje takich ludziej, jak, naprykład, Aleś Suša. Bo ŭsie hetyja Kałuhiny, Rachmańki — ich navat i nie škada: ludzi ničoha nie zrabili dla kultury.
Samaja vialikaja niebiaśpieka na ciapierašni momant — źniščeńnie biełaruskaj adukacyi, zabarona vystavaŭ. Adbyvajecca takaja sabie filtracyja hramadzkaj dumki.
Najbolšaje ŭražańnie ad palityčnych padziejaŭ minułaha tydnia — vychad z turmy Andreja Klimava i jahony vystup na ŭračystaj asamblei 25 sakavika. Mnie zdajecca, što heta vielmi symbalična: ciapier 25 sakavika dla Klimava (čałavieka, uzhadavanaha na rasiejskaj kultury) budzie asabistym śviatam. I heta, vierahodna, padšturchnie jaho da biełaruščyny. Našyja specsłužby zrabili talenavity vychavaŭčy krok!
Aleś Puškin, Bobr
cytata tydnia
“U turmie ja vielmi dobra ŭśviadomiŭ adnu reč – čałaviek mocny ducham. Ja vielmi vieryŭ, što narešcie vyjdu na svabodu, i ja vyjšaŭ, zaraz ja baču i vieru ŭ toje, što na Biełarusi jość kamu adstojvać jaje niezaležnaść, jość kamu zmahacca za ekanamičny roskvit. Nam jość kudy iści, nam jość što vymiatać z našaha domu. Žyvie Biełaruś!”
Andrej Klimaŭ 25 sakavika na ŭračystym schodzie z nahody Dnia Voli
paciarpiełyja za Biełaruś
Na Dzień Voli ŭ Miensku byli zatrymanyja Aksana Achremčyk, Lavon Ačapoŭski, Źmicier Bandarenka, Valancina Vajušenia, Siaržuk Hvaździoŭ, Michaił Hvaździoŭ, Valery Hierasimaŭ, Cimafiej Drančuk, Taciana Jełavaja, Edvard Zajkoŭski, Juraś Ziańkovič, Uładzimier Ihnatovič, sp.Kaleśnikaŭ, Źmicier Karpienka, aŭtarka “NN” Natalla Kijko i jaje baćka Ryhor, Aleh Korban, Piatro Kšyk, Siarhiej Łysakoŭ, Andrej Lachovič, Mikoła Łavicki, Ema Niekraševič, Siarhiej Novik, aŭtar “NN” Dzianis Nosaŭ, Juraś Palčeŭski, Jaŭhien Pikul, aŭtar “NN” Anatol Prasałovič, Arkadź Piarcoŭski, Piatro Rusaŭ, aŭtar “NN” Źmicier Saŭka, Uładzisłaŭ Saŭka, Pavał Sieviaryniec, Viačasłaŭ Siŭčyk, Alaksiej Smolski, Andrej Taŭstko, Irma Tabušava, Valery Ščukin, Julija Ščukina, Iryna Šeršań, Hanna Jahorava, Andrej Jahoraŭ, sp.Jarmolenka.
Pavał Sieviaryniec atrymaŭ 15 sutak aryštu, Viktary Daškievič i Kaviešnikaŭ — pa 10 sutak; Valery Hierasimaŭ, Piatro Rusaŭ, Lavon Sadoŭski, Alaksiej Smolski, Źmicier Tarulis aštrafavanyja na 20 “taryfnych adzinak” (200 tys. rubloŭ). Siarhiej Barysaŭ, Andrej Humin, Mikałaj Ihnatovič, Alena Rašetnikava, Siarhiej Tryfanaŭ, Andrej Lachovič, Alaksandar Šavielenka, Mikoła Łavicki, Andrej Taŭstyka, Siarhiej Biaździeniežny atrymali papiaredžańni.
Sudy nad Jurasiom Palčeŭskim, Kiryłam Papkovym, Viačasłavam Siŭčykam prajšli 28 sakavika, Edvarda Zajkoŭskaha i Cimafieja Drančuka sudzili 29 sakavika. Uładzisłava Ihnatoviča buduć sudzić 1 krasavika, Źmitra Bandarenku — 2 krasavika, Lavona Ačapoŭskaha — 3-ha.
U Harodni na Dzień Voli byli zatrymanyja: Siarhiej Bachar, Mikoła Voran, Mikoła Hom, Edvard Dźmuchoŭski, Aleh Zavadzki, Źmicier Ivanoŭski, Alaksiej Kučar, Ihar Łapiecha, Maksim Lebiedzieŭ, Mikoła Lemianoŭski, Jaŭhien Łuhin, Siarhiej Malčyk, Śviatłana Niech, Michaił Patreba, Andrej Pačobut, Raman Ramaška, Viktar Sazonaŭ, Vadzim Sarančukoŭ, Alesia Sidlarevič, Alena Stankute, Alaksandar Siaŭko, Jury Chadyka, Valer Cynkal, Jaŭhien Šabuńka, Andrej Šustoŭski. Vadzim Sarančukoŭ atrymaŭ 10 sutak aryštu, Mikoła Lemianoŭski - 150 “taryfnych adzinak” (1,5 młn. rub.) za arhanizacyju niezakonnaha mitynhu ŭ Horadni, Viktar Sazonaŭ — 20 “adzinak”.
Dniom raniej u Horadni byli zatrymanyja vosiem siabroŭ ZBS ź Miensku – Volha Kuźmič, Jurka Sidun, Andruś Filipovič, Cimoch Akudovič, Alena Bandarenka, Juraś Chramy, Vasil Lepieš, Kasia Bochan, jakija pryjechali ŭ miascovy medinstytut sustrecca z kalehami. Supracoŭnica Internet-centru Valancina Suvoryna zaprasiła ich u kabinet, prymknuła i vyklikała milicyju. Maładzionaŭ pratrymali amal try hadziny ŭ Leninskim RUUS Horadni, prymusili napisać tłumačalnyja i vypuścili na svabodu. U toj samy dzień u Miensku za rasklejku nalepak ź lahatypam “Zubra” byli zatrymanyja troje siabroŭ hetaj arhanizacyi Alesi Andžyjeŭski j Atroščankaŭ dy Cimafiej Drančuk. Z treciaha kursu Mahiloŭskaha politechničnaha technikumu “za palityku” adličyli “zubra” Alaksandra Patupčyka, jaki ŭžo atrymaŭ 20 minimałak pa “škłoŭskaj spravie”, i siabra AHP Alaksandra Kalitu. U noč na 26 sakavika ŭ Mahilovie zatrymanyja zubroŭcy Maksim Dvarecki i Andrej Zajcaŭ. Jany ŭdzielničali ŭ kampanii hrafici “Tak žyć nielha”. Da ich padyšli dvoje maładych ludziej napadpitku j raspačali bojku. Milicyja zatrymała ŭsich, ale zavadataraŭ adpuściła, a zubroŭcaŭ pratrymała da ranicy.
Natalla Brel, jakuju sudziać za abrazu prezydenta Biełarusi, paprasiła palityčnaha prytułku ŭ Belhii.
“Mužyckaja praŭda” nia vyjdzie
Redaktar zakrytaj uładami “Pahoni” Mikoła Markievič pasprabavaŭ zasnavać novaje vydańnie — “Mužyckuju praŭdu”. Čym usio heta skončyłasia, jon raspavioŭ karespandentu “NN”.
“NN”: Čamu vyrašyli nazvać hazetu mienavita tak?
M.M.: Dla nas “Mužyckaja praŭda” — vielmi važnaja nazva. Pa-pieršaje, jana aznačaje, što my vymušanyja znoŭ pracavać u padpolli. Pa-druhoje, my znoŭ musim zmahacca z tymi ž antybiełaruskimi ŭładami, ź jakimi zmahaŭsia i Kastuś Kalinoŭski. Dyj asabista mnie vielmi padabajecca hety sučasny zvarot: “Mužyki!”
“NN”: A čamu pieršuju hazetu nazvali nie “Mužyckaja praŭda”, a “Pahonia”?
M.M.: Pieršuju hazetu my nazvali “Pahoniaj”, bo jana rabiłasia na chvali mahutnaha nacyjanalnaha adradžeńnia. I na toj čas hety symbal nam byŭ važniejšy. Bo heta, pa-pieršaje, była našaja pahonia za nalaciełym na nas voraham. Pa-druhoje, pahonia zaŭždy była spravaj supolnaj, svojeasablivaj tałakoj, i heta dla nas taksama było vielmi važna. I pa-treciaje, “Pahonia” — heta ruch, pastajannyja źmieny, svojeasablivaja transfarmacyja. A zaraz dla nas važniejšaja “Mužyckaja praŭda”, bo davodzicca žyć u zusim inšych umovach, davodzicca znoŭ “partyzanić”...
Miesiac tamu my padali dakumenty haradzienskim uładam, kab uzhodnić raźmiaščeńnie redakcyi (jak hetaha patrabuje Zakon ab druku). I voś 20 sakavika atrymali adkaz za podpisam staršyni Haradzienskaha harvykankamu Alaksandra Antonienki i kiraŭnika spravami harvykankamu Alaksandra Kałačova. Jany paviedamili nam, što, pakolki hazeta “Mužyckaja praŭda” jość faktam biełaruskaj historyi, pomnikam biełaruskaha narodu, dyk rehistravać vydańnie z takoj nazvaj “nieetyčna”. Faktyčna atrymałałsia tak, što nam admovili zusim nie pa toj zajavie, jakuju my padavali. Naahuł, rehistravać ci nie rehistravać vydańnie — sprava Ministerstva infarmacyi, a nie miascovych uładaŭ.
Sam pa sabie taki adkaz — heta jezuictva najvyšejšaj proby. Ludzi, jakija robiać usio, kab źniščyć biełaruskaść u Horadni, prykryvajucca “abaronaj” biełaruskaści. Im vyhadniej, kab hetaja nazva zastałasia niejkim zabranzaviełym pomnikam. A jašče dakładniej — kab usio heta pyliłasia niedzie ŭ sutareńniach i na haryščach.
I našaja hazeta — nie adzinkavy prykład. Za apošni čas u Horadni byli try amal adnolkavyja admovy: našamu vydańniu, hazecie Haradzienskaj supołki TBM “Kałoža” i hazecie demakratyčnaha abjadnańnia veteranaŭ “Recha”. “Kałožy” admovili ŭ rehistracyi na padstavie pastanovy Synodu pravasłaŭnaj carkvy, jaki zabaraniŭ vykarystańnie ŭłasnych carkoŭnych nazvaŭ i imionaŭ u kamercyjnych metach. Ale ž “Kałoža” — heta taponim, tak zaviecca rajon Horadni. A carkva nosić imia śviatych Barysa i Hleba. Demakratyčnamu abjadnańniu veteranaŭ admovili ŭ rehistracyi, bo arhanizacyja zavinavaciłasia za arendu pamiaškańnia.
Mikoła Markievič nie apuskaje ruk: u bližejšy čas jon padaść u Haradzienski harvykankam zajavu na ŭzhadnieńnie raźmiaščeńnia redakcyi hazety “Hołas”.
Hutaryŭ Arkadź Šanski
