Palityka izalacyjanizmu
Pasłańnie Łukašenki parlamentu było začytana ŭ atmasfery bałahanu
Sioletniaje pasłańnie A.Łukašenki nacyjanalnamu schodu mieła vyraznuju ŭnutrypalityčnuju skiravanaść. Zamiežnaj palitycy było pryśviečana ŭsiaho kala 8% času vystupleńnia. Ź ich biełaruska-rasiejskim stasunkam — 3%, adnosinam z Zachadam — trochi bolej. Adsutničaŭ navat asobny raździeł “Zamiežnaja palityka”. Usio pajšło ŭ častku “Pra ŭmacavańnie zakonnaści j pravaparadku” — vyraznaja prajava kursu na samaizalacyju i samadastatkovaść.
Pahroza ekanamičnaha kryzysu
Koratka vyznačyŭšy makraekanamičnyja pryjarytety, zahadaŭšy zatarmazić reformy sacyjalnaj sfery (u pryvatnaści, pensijnuju), Alaksandar Łukašenka pierajšoŭ na kankretnyja prykłady i niedachopy, krytykavaŭ urad i miascovyja ŭłady. Da deputataŭ i ministraŭ źviartaŭsia na “ty”, časta dapamahaŭ sabie prostanarodnymi vyrazami. Usio ž jon pryznaŭ, što biełaruskaja ekanomika ŭ kryzysnaj sytuacyi, dy zaklikaŭ da žorstkaj ekanomii. Łukašenka skazaŭ i pra niekankurentazdolnaść biełaruskich tavaraŭ, jakich naźbirałasia na składach na tryljon rubloŭ, i pra zapazyčanaść pa zarobkach u 32 młrd. rubloŭ, i pra spaźnieńni z vypłatami pensijaŭ. Vinavaciŭ jon u hetym urad i asabista premjera Navickaha, jaki pry zhadcy svajho imia pasłuchmiana ŭzdymaŭsia i słuchaŭ načalnika stojačy. Ale para zrabić z Navickaha achviarnaha kazła jašče nie pryjšła. Adnaho ž “byłoha premjera Łukašenka źvinavaciŭ u zakupcy českaha insulinu pa zavyšanaj canie biez papiarednie praviedzienaha tenderu.
Kampramat na paplečnikaŭ
Takoje ŭražańnie, što jon maje kampramat na ŭsiu svaju kamandu. Tolki kali “adnaho premjera” (majecca na ŭvazie Jarmošyn) Łukašenka hetymi faktami topić, inšych jon paprostu dražnić. “Kiraŭnica spravami prezydenta Žuraŭkova tam [u prezydenckaj lečkamisii] stvaryła… adkormačnuju bazu. 5000 kaloryj u dzień!.. Čałaviek tudy prychodziŭ z 100 kh, a vychodziŭ z 120 kh. Chiba heta lačeńnie?” Asabliva nastojliva jon šantažavaŭ biznesoŭcaŭ-deputataŭ: “Nikoli bolš nia budu padtrymlivać pradprymalnikaŭ pry vybarach u parlament”. Zatoje rabiŭ reklamu “kanstruktyŭnaj apazycyi”: “Piśmy Ivana Ivanaviča Paškieviča i hienerała Frałova buduć najuvažliviejšym čynam razhledžanyja”.
Prodaž zbroi
Łukašenka nia vydaŭ krynicaŭ finansavańnia šmatmiljardnych niebiudžetnych fondaŭ. Jašče jon skazaŭ, što dziaržava atrymlivaje vielmi ścipłyja prybytki ad prodažu zbroi: “Dachod moža być 400 miljonaŭ dalaraŭ, a prybytak u hetych miljonach — 400 tysiačaŭ”. A paśla zaznačyŭ, što prybytak ad handlu zbrojaj składaje ŭsiaho 6%.
Pra Kurapaty
Hramadzianskaja supolnaść zastajecca dahetul niečym absalutna dalokim dla ŭładaŭ. Navat jak hety termin na biełaruskuju movu pravilna pierakładajecca, nia viedajuć. “Źviazda” kasaboka piša pra “hramadzianskaje hramadztva”.
U raździele, jaki hetak nazyvajecca, Łukašenka nazvaŭ manifestacyju apazycyi 19 krasavika antyhramadzkaj akcyjaj, sypaŭ pahrozami na adras karespandenta NTV Paŭła Sielina, a taksama spyniŭsia na temie Kurapataŭ. Na jahonuju dumku, tam musić być pabudavany memaryjał, jaki adpaviadaje duchu hetaha miesca. “U Kurapatach pachavanyja ludzi. U 30-ja, 40-ja hady, niemcy rasstralali, jašče niechta, ale tam pachavanyja ludzi!” Faktu stalinskich represij, jakija zabrali žyćci prynamsi 200 tysiač biełarusaŭ i skalečyli losy miljonaŭ, Łukašenka, takim čynam, dahetul nie pryznaje.
Suprać pravasłaŭja
Kiraŭnictva pravasłaŭnaj carkvy Łukašenka abvinavaciŭ u praźmiernym budaŭnictvie chramaŭ, dla jakich, kažučy jahonymi słovami, užo nie chapaje “specyjalistaŭ”, h.zn. śviataroŭ, a akramia taho, hetaje budaŭnictva adbiraje srodki ŭ pradpryjemstvaŭ i biznesoŭcaŭ. Tym samym miascovym uładam faktyčna dali zadańnie strymlivać rost upłyvu BPC. Ale, pavodle słovaŭ Łukašenki, nia treba škadavać hrošaj na budaŭnictva spartkompleksaŭ.
200 “Mersedesaŭ”
dla vertykali
“Dy voś hetyja “mersedesy”, za jakija krytykujuć, za biascenak udałosia kupić: vuń Žuraŭkova siadzić, jeździła, viała pieramovy ŭ Niamieččynie. Kupili na siem hod dla vertykali ŭłady, inšych orhanaŭ. Mahli kupić “Vołhi”.
Ale, pa-pieršaje, raschod paliva, pa-druhoje, praktyčna toj ža košt, a ekspluatacyja ŭ niekalki razoŭ daražejšaja. Navošta mnie heta rabić?” A.Łukašenka zajaviŭ, što na pakupku “mersedesaŭ” ź biudžetu nia brali “ni kapiejki”. “Dzie ŭziaŭ — heta maja sprava. Ja zakonna ich uziaŭ”, — pahardliva zaznačyŭ jon. Paśla taho jak tranślacyja vystupu Łukašenki na BT była adklučanaja, jon vykazvaŭsia jašče bolš ščyra, u pryvatnaści paviedamiŭ, što i na jahony niadaŭni adpačynak dziaržava nia vydała ni kapiejki, a adpačyvaŭ jon koštam NAK Aŭstryi.
Słovy “siem hod”, što vylecieli, pakazvajuć: rašeńnie ab padaŭžeńni prezydenckaha mandatu moža być spravaj užo vyrašanaj. Adnak ab perspektyvach referendumu pa hetym pytańni Łukašenka havaryŭ vielmi tumanna. Adkazvajučy na pytańnie deputatki Abramavaj, jon zajaviŭ, što “heta moža ŭskałychnuć sytuacyju ŭ krainie”. Što da pašyreńnia paŭnamoctvaŭ pałatki, dyk Łukašenka miarkuje, što šyrejšym paŭnamoctvam, čym ciapier, jana prosta nia daść rady.
Samaje haračaje pytańnie hetych dzion — ci skončycca akcyjanavańnie “załatoha zapasu” Biełarusi, pradpryjemstvaŭ naftachimii ich pierachodam pad kantrol rasiejskich manapolij — zastałosia pachavanym biez adkazu ŭ vadaspadzie klatvaŭ i pryznańniaŭ.
Mikoła Buhaj
