Naviny haspadarskija
BIEŁARUSY ŹJELI, u paraŭnańni ź minułaj viasnoj, bolej krupaŭ, makarony, ryby, majanezu i sadaviny. Zatoje sioleta ŭ krainie spažyvajuć mieniej miasa, małaka, syru, cukru, muki j aleju.
SVAJE POLISY “Zialonaja karta” pačnie vypuskać Biełaruś z 1 studzienia. Dahetul hramadzianie krainy karystałasia zamiežnymi. Strachoŭka “Zialonaja karta” daje prava na kampensacyju ŭronu aŭtamabilistam u vyniku avaryi za miažoj.
AVIJAREJS MIENSK—KRASNADAR adnaviła z 4 červienia kampanija “Biełavija”. Lotać majuć da 7 vieraśnia ŭ aŭtorki dy suboty. Bilet u adzin bok kaštuje 143 dalary.
URAD ZABARONIĆ bankam davać hrošy na zarobki tym pradpryjemstvam, što vinavatyja pensijnamu fondu. Ciapier ichnaja zapazyčanaść pierad fondam pieravyšaje miesiačnuju patrebu na vypłatu pensijaŭ.
NIA MAJE LICENZIJAŬ pałova firmaŭ, što prapanujuć hramadzianam Biełarusi pracu za miažoj. Tamu niama nijakich harantyjaŭ, što padpisanyja z takimi firmami kantrakty buduć vykananyja.
urad zabaraniŭ adklučać elektryčnaść za daŭhi. Ciapier pradpryjemstvy vinavatyja enerhietykam 470 młn. dalaraŭ. Z pačatku hodu hetaja ličba pavialičyłasia na tracinu.
NA 2,7% PADVYSILISIA niekatoryja kamunalnyja taryfy — techničnaje absłuhoŭvańnie kvateraŭ, haračaja i chałodnaja vada, kanalizacyja, lifty i vyvaz śmiećcia.
ABLIHACYI na 100 tys. rubloŭ vypuściła Ministerstva finansaŭ. Pa ich buduć spłačvać 50% hadavych dy inflacyjnuju indeksacyju. Kali značna nie padvysicca kurs dalara, hety pracent daść bolšy prybytak, čym u bankach. Adno što pradać ablihacyi dziaržavie možna nie raniej za 31 traŭnia 2003 h.
NA 10% PAMIENIEJE pracaŭnikoŭ rajvykankamaŭ. Zvalniać čynoŭnikaŭ buduć da 1 žniŭnia.
AD UŁASNYCH DZICIAČYCH SADKOŬ vyrašyła pazbavicca “Biełšyna”. Ciapier ich budzie ŭtrymlivać haradzki biudžet Babrujsku. Letaś na ŭłasnuju sacyjalnuju majomaść šynny kambinat vydatkavaŭ 6 młn. dalaraŭ.
BIAZ KASAVYCH APARATAŬ dazvoliŭ pracavać pradprymalnikam Kanstytucyjny sud. Mienharvykankam skasuje svajo rašeńnie, pavodle jakoha handlary musili “prapuskać” praz aparaty ŭsiu hatoŭku.
“ZAŁATY ŠLAHIER” nia buduć ładzić sioleta ŭłady Mahilova, bo niama hrošaj. Na “feście savieckaj pieśni” biudžet Mahiloŭščyny zekanomić pad miljon dalaraŭ.
KONKURSY PAMIŽ INVESTARAMI “Naftanu”, “Palimiru”, “Azotu” i “Biełšyny” projduć da 23 žniŭnia. Prapanovy ab pryvatyzacyi mahiloŭskaha i śvietłahorskaha abjadnańniaŭ “Chimvałakno” ŭrad razhledzić uvosień.
ZBOR Ź BIEŁARUSKICH HRUZAVIKOŬ skasavała Polšča. Raniej z adnaje mašyny na miažy brali 150 dalaraŭ.
S.I.
