Čyhiru dali try hady

U aŭtorak, 23 lipienia, eks-premjer-ministar Biełarusi Michaił Čyhir byŭ asudžany Frunzenskim rajonnym sudom Miensku na 3 hady pazbaŭleńnia voli z kanfiskacyjaj majomaści. Vykanańnie prysudu adterminavanaje na dva hady. Ale Čyhira mohuć pasadzić i adrazu, kali nia spłacić padatkovaj inspekcyi 8 młn. rubloŭ, jakija jon “vinavaty” joj. Akramia taho, były premjer nia maje prava źmianiać miesca žycharstva.

Sudździa Natalla Varenik bolš za try hadziny čytała prysud u pierapoŭnienaj zali. Siarod prysutnych byli žurnalisty, palityki Anatol Labiedźka, Stanisłaŭ Bahdankievič, Vasil Šłyndzikaŭ, Alaksandar Dabravolski, Siarhiej Kalakin, Viačasłaŭ Siŭčyk dy inšyja, pasoł ZŠA ŭ Biełarusi Majkł Kozak. Słuchać suchi tekst, u jakim uvieś čas paŭtaralisia adny i tyja ž detali, było ciažka, tym bolš słuchać stojačy. Nia prosta było jaho i čytać: sudździa inšy raz zapinałasia, šukała patrebnuju staronku, a, abviaściŭšy prysud, adrazu ž pakinuła zalu pad vokličy “Hańba!”

Čyhira nia prosta asudzili, źvinavaciŭšy ŭ niavypłacie padatkaŭ, jaho na 5 hadoŭ pazbavili prava zajmać adkaznyja i kiroŭnyja pasady. Cikava, što prakuror patrabavaŭ tolki 3 hady!

Vystupajučy pierad žurnalistami, M.Čyhir skazaŭ, što abskardzić prysud u Mienskim haradzkim sudzie, choć spadziavańniaŭ na stanoŭčy vynik niama. Ale jość i inšyja instancyi, u tym liku mižnarodnyja.

Aleh Tačony

Maleńkaja achviara samahonki

Žycharka Ivacevič hnała samahonku. Kala jaje kruciłasia siamihadovaja ŭnučka. Zdaryłasia niepradbačanaje: vybuchnuŭ čan, u jakim bulkała sivucha, i haračaje varyva trapiła na cieła dziaŭčynki. Medyki nia zdoleli vyratavać joj žyćcio — maleńkaja pakutnica ad mocnych apiokaŭ pamierła ŭ bolnicy.

Siakieraj pa hałavie

Rabočaha Kosaŭskaha meblevaha vytvorčaha abjadańnia K. aryštavali prosta na pracy. Jon adrazu pryznaŭsia milicyjantam, što zabiŭ svajho 57-hadovaha adnaviaskoŭca, invalida ź dziacinstva. Biadak nie pazyčyŭ K. tysiačy rubloŭ, za što atrymaŭ siakieraj pa hałavie. Schavaŭšy trup za piečkaj, K. vypraviŭsia na pracu.

Aleś Łaŭraniuk, Ivacevičy

Napad na taksista

Pozna ŭviečary da salihorskaha taksista padyšli dvoje — mužčyna i žančyna. Paprasili advieźci ŭ viosku Bałotčycy Słuckaha rajonu. Na šašy Mikaševičy—Miensk, pablizu vioski Młynka, pasažyr niečakana ŭdaryŭ taksista nažom u šyju, ale toj zdoleŭ niejak spynić mašynu, vyskačyć i pabiehčy. Złačynca dahnaŭ jaho i ŭdaryŭ nažom u śpinu. Usčałasia bojka. Paranienamu taksistu ŭdałosia vybić zbroju z ruk złačyncy, i toj ź miesca zdareńnia źbieh. Taksista i žančynu spadarožnaja mašyna zaviezła ŭ Salihorsk. Milicyja naładziła pošuki złačyncy. Nieŭzabavie ŭ vioscy Łučniki pablizu Słucku byŭ zatrymany hramadzianin M., raniej asudžany za chulihanstva, jaki adbyvaŭ pakarańnie na volnym pasialeńni. Viadziecca śledztva.

Za apošnija dva miesiacy heta druhi načny napad na taksistaŭ u Słuckim rajonie. Pieršy adbyŭsia ŭ kancy traŭnia: nočču la vioski Klapčany kiroŭca byŭ zabity ŭ mašynie. Złačyncy dahetul nia znojdzienyja.

Fermery im jak nia ludzi

Słucki rajvykankam niadaŭna vyrašyŭ zanieści na Došku honaru 32 miascovych pieradavikoŭ vytvorčaści. Dziŭna, što nia byŭ ušanavany nivodzin z 14 fermeraŭ rajonu. Choć by Lina Šuba ź vioski Sorahi, jakaja ŭziała ŭ arendu 250 hiektaraŭ ziamli, trymaje małočnuju fermu na 40 karoŭ, troch koniej, śviniej, maje nieabchodnuju dla apracoŭki ziamli techniku. Letaś kabieta atrymała z hiektara pa 27 centnieraŭ zbožža, ad kožnaj karovy nadaiła pa 3600 kh małaka — pakaźniki ŭdvaja bolšyja za dasiahnieńni miascovaha kałhasu “III Internacyjanał”.

Michaś Kutniaviecki, Słucak

“Adnarukija bandyty”
zamiest studyi

U Bieraści začyniłasia dziciačaja mastackaja studyja pry zavodzie “Koleratron”. Administracyi pradpryjemstva zrabiłasia ekanamična niavyhadna zdavać joj u arendu pamiaškańnie. Ciapier jano pieraabastalavanaje pad zalu hulniovych aŭtamataŭ.

I.Chviedarovič, Bieraście

Zakanservavany zavod

Zahadam hieneralnaha dyrektara Babrujskaha šynnaha kambinatu časova likvidavany zavod zvyšbujnahabarytnych šynaŭ. Zvolniena 49 pracaŭnikoŭ kiravańnia, planujecca skaračeńnie dapamožnych rabočych mechaničnaj i enerhasłužbaŭ. Astatnich pieraviali na inšaje pradpryjemstva. Zavod zvyšbujnahabarytnych šynaŭ zakanservavany, ale pa miery pastupleńnia zakazaŭ pačnie pracavać znoŭ. Kalektyŭ pradpryjemstva sprabavaŭ byŭ zładzić kanferencyju, adnak nie ŭdałosia sabrać kvorum: papracavała administracyja šynnaha kambinatu.

Aleś Asipcoŭ, Mahiloŭ

Adužali tysiaču kilametraŭ

Siabry turystyčnaha hurtka Hłuskaha dziciača-junackaha klubu fizpadrychtoŭki pad kiraŭnictvam Uładzimiera Tupicy ździejśnili sioleta pachod pa Biełarusi. Vyjšli z Hłusku 23 červienia. Da 29-ha, praź Lubań, Salihorsk, Słucak, Kapyl, Niaśviž i Mir, dabralisia da Navahradku, kab dva dni pabyć na rycarskim feście. 3 lipienia jany byli ŭžo ŭ Miensku, 5-ha — u Barysavie, dzie prachodziła respublikanskaje velarali “Biełaja Ruś”. Maryna Tupica z hłuskaj kamandy stałasia pieramožcaj u svajoj hrupie. U apošni dzień joj daviałosia ŭdzielničać u dvuch etapach: zranku na 37 kilametraŭ i ŭviečary na 32 km. U jakaści ŭznaharody Maryna atrymała kryštalovuju vazu i rovar. Samy małodšy ŭdzielnik, piaciklaśnik Juraś Tupica, pieraadoleŭ usie etapy rali na zvyčajnym “Arlaniaci”, tady jak bahata chto mieŭ supersučasnyja rovary. Natchnionyja pośpiecham na spabornitcvach, turysty rušyli dalej. Jany pabačyli Biarezina, Kličaŭ, Usakin, Kiraŭsk, Babrujsk, paznajomilisia z tamtejšymi skaŭtami. I narešcie, adužaŭšy za dzieviatnaccać dzion tysiaču kilametraŭ, 12 lipienia viarnulisia dadomu.

Ihar Kiryn, Hłusk

Čarnicy j lisički

Mnohija ludzi na Astravieččynie zarablajuć na žyćcio zboram jahad — u asnoŭnym čarnicaŭ. Ich prymajuć pa 700 rubloŭ za kilo. Možna abmieńvać jahady na cukar — kilahram za kilahram. A za lisički kamersanty, jeździačy pa vioskach, płaciać 4000 rubloŭ za kilahram. Hryboŭ biez daždžu ŭ lesie niašmat, voś jany i padaraželi.

Błaha schavali

Dva žychary Rasiei, što jechali ciahnikom “Maskva—Karalaviec”, schavali ŭ svaim kupe 20 tys. dalaraŭ, kab nie paznačać hetych hrošaj u deklaracyjach. Ale mytniki ŭ Hudahai ŭment znajšli dalary. Los hrošaj i ich uładalnikaŭ vyrašyć sud. Rasiejcam, vidać, daduć štrafu, a hrošy pojduć u biudžet našaj krainy.

Mały dy ŭdały

Nia prosta tak chadziŭ na siało da siabruka pieršaklaśnik adnoj z astravieckich škołaŭ. Idučy damoŭ, jon prychapiŭ z saboju dyplamat z hrašyma j załatymi vyrabami. “Razbahacieć” vučniu nie dazvolili milicyjanty.

Marjan Vianhroŭski, Astraviec

Płatnaja medycyna

Cikavym sposabam zarablajuć u Pinskaj haradzkoj bolnicy. Ciapier tyja, chto pryjaždžaje mašynaj naviedać chvoraha, musiać płacić 250 rubloŭ za prajezd na terytoryju bolnicy. Ale ž ludzi nia vielmi achvotna dajuć hrošy, i ciapier na ich ciśnie svaim aŭtarytetam namieśnik hałoŭnaha lekara, jaki asabista źbiraje myta.

Vasil Mackievič, Pinsk

paciarpiełyja za Biełaruś

“Zubroŭcaŭ” Źmitra Kobrusieva, Jurja Vajciachoviča j Volhu Łančakovu zatrymali ŭ Miensku 17 lipienia za rasklejvańnie ŭlotak. Na ŭsich “zubroŭcaŭ” byli składzienyja pratakoły za vyviešvańnie ŭlotak u niepraduhledžanych dla hetaha miescach. Źmitra Kobrusieva i Volhu Łančakovu adpuścili praz hadzinu. Da 17-hadovaha Jurja Vajciachoviča vyklikali baćkoŭ, ź jakimi praviali hutarku. 19 lipienia, u dzień adkryćcia “Słavianskaha bazaru”, u Viciebsku, “za niesankcyjanavanaje pikietavańnie” zatrymali Ŭładzimiera Pleščanku i Barysa Chamajdu. Apošni byŭ zatrymany ź plakatam, na jakim byŭ nadpis “Biasieda padčas čumy” i vyjava karykaturnaha persanažu, u jakim milicyjanty paznali Alaksandra Łukašenku. Sp.Pleščanka byŭ zatrymany padčas raspaŭsiudu partyjnaj litaratury KCHP-BNF.

Bolš niaŭčasny

Prezydyjum rady Federacyi prafsajuzaŭ biełaruskaj razhladaje pytańnie pra zvalnieńnie hałoŭnaha redaktara svajho drukavanaha orhanu — hazety “Biełaruski čas” — Alaksandra Starykieviča. Jaho źbirajucca adstavić “zhodna z rašeńniem najmalnika”. Pryčyna — razychodžańni ŭ palityčnych pohladach z novym kiraŭnictvam FPB. Na pieršaj staroncy “Biełaruskaha času” za 19 lipienia — adzinaha, padpisanaha A.Starykievičam paśla źmieny kiraŭnictva FPB, — vialiki fatazdymak A.Łukašenki na rovary z nadpisam: “Dziakuj ščaślivamu Alaksandru Ryhoraviču za naša darahoje žyćcio!”

Dzień Niezaležnaści — 2002

Sioleta 27 lipienia projdzie biez palityčnych akcyjaŭ. U parku Čaluskincaŭ adbudziecca futbolny turnir pamiaci Hienadzia Karpienki, jaki ładzić Abjadnanaja hramadzianskaja partyja. U im voźmuć udzieł kamandy roznych apazycyjnych partyj i arhanizacyj. A “Małady front” sumiesna ź Biełaruskaj asacyjacyjaj žurnalistaŭ zładzić 27 lipienia ŭ Miensku niesankcyjanavanuju akcyju “Dzień niezaležnaj presy”. Pačniecca jana a 12-j na Kastryčnickaj płoščy. Aktyvisty moładzievych arhanizacyjaŭ buduć trymać zamiest partretaŭ źnikłych palitykaŭ asobniki niezaležnych vydańniaŭ. Pavodle słovaŭ Paŭła Sieviarynca, meta mierapryjemstva — pryciahnuć uvahu da stanu niezaležnych ŚMI ŭ Biełarusi. Prezydent BAŽu Žanna Litvina adznačaje, što takoj składanaj sytuacyi z svabodaj presy, jak ciapier, nie było za ŭvieś čas kiravańnia Łukašenki.

Aleh Tačony

Redakcyja vinšuje čytačoŭ z Dniom Niezaležnaści i zyčyć viasiołych piknikoŭ.