sprava “Pahoni”
Markievič spadziajecca na padtrymku
pałaty i rehistruje hazetu “Hołas”
15 žniŭnia Haradzienski abłasny sud pačaŭ razhlad kasacyjnaj skarhi na rašeńnie Leninskaha rajonnaha sudu Horadni pa spravie Mikoły Markieviča i Paŭła Mažejki. Nahadajem, što 24 červienia jany byli zasudžanyja na “chimiju” (na 2,5 i 2 hady abmiežavańnia pravoŭ adpaviedna) za “abrazu honaru i hodnaści” Alaksandra Łukašenki. Ciapier abłasny sud moža albo admianić prysud, albo pakinuć jaho biaź źmienaŭ.
Mikoła Markievič, adkazvajučy na pytańni karespandenta “NN” napiaredadni razhladu kasacyjnaj skarhi, pryznaŭsia, što ŭ hłybini dušy spadziajecca na stanoŭčaje rašeńnie abłasnoha sudu. Adnak zaznačyŭ: “Viedajučy sytuacyju, pry jakoj Łukašenka asabista kantraluje sudy ŭ Biełarusi, viedajučy, što adbyvajecca ŭ sudach usich uzroŭniaŭ, razumieju, što spadziavacca niama na što. Faktyčna, razmova idzie pra toje, što hety sud — abaviazkovaja farmalnaja ŭmova dla taho, kab źviarnucca ŭ mižnarodnyja sudovyja instancyi”.
Kali kalehija pa kryminalnych spravach Haradzienskaha abłasnoha sudu pakinie prysud biaź źmienaŭ, Markievič i Mažejka źbirajucca inicyjavać zbor podpisaŭ za admienu artykułu 367 Kryminalnaha kodeksu Biełarusi (“Paklop na prezydenta Respubliki Biełarusi”). Markievič havoryć, što ŭ Kryminalnym kodeksie dastatkova artykułu 188, jaki abaraniaje ad paklopu ŭsich hramadzianaŭ Biełarusi, i stvarać asabista dla hałoŭnaha ŭradoŭca inšy artykuł było vialikaj dla jaho pryvilejaj. “Samaje hałoŭnaje, — kaža redaktar zabaronienaj “Pahoni”, — hety artykuł u rukach zaŭziatych pamočnikaŭ Łukašenki pieraŭtvaryŭsia ŭ dubiec, z dapamohaj jakoha ŭ Biełarusi metanakiravana źniščajecca inšadumstva, svaboda słova”.
Inicyjatyvu Markieviča padtrymała Biełaruskaja asacyjacyja žurnalistaŭ, jakaja ŭžo hatovaja raspačać zbor podpisaŭ.
Markievič upeŭnieny: kali zboram budzie zajmacca tolki Haradzienskaja filija BAŽ, podpisaŭ budzie za 50 tysiačaŭ. Asnoŭnuju ich častku Mikoła Markievič planuje sabrać u Horadni j na Haradzienščynie. Pa-pieršaje, žurnalistaŭ “Pahoni” tut bolš viedajuć, tut Markievič abiraŭsia deputatam u Viarchoŭny Saviet 12-ha sklikańnia. Pa-druhoje, jość raźlik na deputataŭ pałaty pradstaŭnikoŭ ad Horadni j Haradzienščyny. Kali ich vybarcy dziasiatkami tysiačaŭ podpisaŭ zaśviedčać svajo žadańnie vydalić artykuł 367 z Kryminalnaha kodeksu, deputaty pavinny buduć da ich prysłuchacca. Jak viadoma, mienavita pałata pradstaŭnikoŭ moža pryniać rašeńnie pra admienu nazvanaha artykułu.
Mikoła Markievič peŭny, što “ŭvosień u łukašenkaŭskaj pałatcy znojdziecca nieabchodnaja kolkaść deputataŭ, jakija pastaviać hetaje pytańnie”. Markievič pryznaje, što ŭžo sustrakaŭsia z deputatami pałaty pradstaŭnikoŭ. Zrazumieła, što proźviščy hetych deputataŭ pakul nie nazyvajucca. Ale varta zhadać, što adzin z pałatnych “apazycyjaneraŭ” hienerał Frałoŭ byŭ abrany jakraz u Horadni.
Tym časam Mikoła Markievič sprabavaŭ zarehistravać u Horadni novaje biełaruskamoŭnaje vydańnie “Hołas”, adnak haradzienski harvykankam nie zachacieŭ uzhadniać miesca raźmiaščeńnia ŚMI. Nieabchodnaść takoha “ŭzhadnieńnia” źjaviłasia ŭ 1999 h. U artykuł 10 Zakonu ab ŚMI byŭ uniesieny adzin skaz, jaki patrabavaŭ uzhadniać ź miascovymi ŭładami raźmiaščeńnie srodkaŭ masavaj infarmacyi. Hetaje ŭdakładnieńnie da zakonu (u padrychtoŭcy jakoha, darečy, jak deputat Viarchoŭnaha Savietu 12-ha sklikańnia braŭ udzieł Markievič) stałasia biadoju dla rehijanalnych žurnalistaŭ. U toj ža Horadni miascovyja ŭłady kaliści admovilisia ŭzhodnić raźmiaščeńnie hazety “Rieportior”, prablemy byli ŭ niezaležnych žurnalistaŭ u Pinsku, Mahilovie, Astraŭcy, Ašmianach dy inšych haradach.
Haradzienskija ŭłady vyrašyli, što razhledziać pytańnie z “Hołasam” tolki paśla rašeńnia sudu pa spravie Markieviča i Mažejki. Ichnaja pazycyja zrazumiełaja: kali abłasny sud zachavaje raniejšaje rašeńnie biaź źmienaŭ i jano ŭvojdzie ŭ siłu, redaktar zabaronienaj “Pahoni” na praciahu dvuch hadoŭ nia budzie mieć prava rehistravać ŚMI.
“Da mianie prychodziać dziasiatki listoŭ, prychodziać naviedniki, ludzi pytajucca prosta na vulicy: kali vyjdzie “Pahonia”? — kaža M.Markievič. — Ludzi jaje patrabujuć. Chaj sabie i pad inšaj nazvaj. Jaje ž infarmacyjnaja niša dahetul nie zaniataja. Tuju funkcyju, jakuju vykonvała “Pahonia”, siońnia ŭ Biełarusi nie vykonvaje nivodnaja hazeta”.
Aleh Tačony
