U Miensku zatrymany namieśnik Radujeva
U najbližejšyja dni Ministerstva ŭnutranych spraŭ Biełarusi departuje ŭ Rasieju Sajpudzi Ŭmchajeva, byłoha pieršaha namieśnika Sałmana Radujeva. Čačencu, jaki žyŭ tut apošnija miesiacy, vielmi spadabałasia Biełaruś, bo “tut nia chodziać ludzi z aŭtamatami, nie praviarajuć na kožnym kroku dakumenty”.
Sajpudzi Ŭmchajeŭ byŭ zatrymany kadebistami ŭ Miensku 29 žniŭnia. Pavodle infarmacyi specsłužbaŭ, čačeniec byŭ pieršym namieśnikam Sałmana Radujeva, kamandujučaha “armii hienerała Dudajeva”. Dyj Umchajeŭ nie chavaŭsia — pradstaŭniki pašpartna-vizavaj słužby jaho navat papiaredžvali, kab zarehistravaŭsia ŭ našaj krainie. Specsłužby čačenca nie čapali, adno ŭstalavali aperatyŭnaje sačeńnie.
Pavodle słovaŭ kiraŭnika Centru infarmacyi j hramadzkich suviaziaŭ KDB Fiodara Kotava, pry kancy žniŭnia stała vidavočna, što Ŭmchajeŭ “źbirajecca raspačać kryminalny biznes”. I KDB vyrašyŭ departavać čačenca. Paśla zatrymańnia S.Umchajeŭ byŭ pieradadzieny ŭ jurysdykcyju MUS, bo nia ździejśniŭ dziaržaŭnych złačynstvaŭ, a tolki administracyjnaje.
Mahčyma, Umchajeŭ nie adziny čačenski kamandzir, jaki chavajecca ŭ Biełarusi. Jašče pry kancy 90-ch u zamiežnym druku źjaviłasia infarmacyja, što ciažka paranieny ŭ Čačenii Sałman Radujeŭ jechaŭ lačycca ŭ Niamieččynu praz našu krainu. Fiodar Kotaŭ, adnak, pra taki fakt ničoha nia čuŭ. Jon ličyć, što “lehiendaŭ takoha kštałtu jašče źjavicca niamała”.
Departacyja byłoha čačenskaha kamandzira ŭ Rasieju va ŭmovach abvastreńnia adnosinaŭ pamiž aficyjnym Mienskam i Maskvoj maje i palityčny padtekst. Kamentatar radyjo “Svaboda” miarkuje, što režym Łukašenki ciškom zrabiŭ svajho rodu padarunak rasiejskim uładam. Ale Ŭmchajeŭ Rasiei nie patrebny: pravaachoŭnyja orhany jaho nie šukajuć. KDB dapuskaje, što ŭ Rasiei čačeniec moh trapić pad amnistyju. Ci heta tak, na sto pracentaŭ nie paćviardžajuć. U centry hramadzkich suviaziaŭ FSB Rasiei prakamentavać sytuacyju admovilisia, spasłaŭšysia na “niepadrychtavanaść”. Tym nia mienš, nie paźniej za 15 vieraśnia były paplečnik Sałmana Radujeva, rasiejski hramadzianin Sajpudzi Ŭmchajeŭ pakinie Biełaruś.
Aleh Tačony
