z usioj krainy
Karova ŭ studni
Biada zvaliłasia na hałavu žychara vioski Aziarco, što na Ivaceviččynie, Vasila Šašuka. Jaho karova paśviłasia na zakinutaj biezhaspadarnaj siadzibie i pravaliłasia ŭ niehłybokuju pustuju studniu, prykrytuju listami šyferu. Viaskoŭcy, uzbroiŭšysia viaroŭkami, sprabavali vyzvalić žyviolinu z pastki, ale jakaja tam siła ŭ pensijaneraŭ. Tady vyklikali vyratavalnikaŭ z MNS. Tyja spačatku adkapali kałodiežnaje kolca, a potym z dapamohaj bandažnych pajasoŭ vyciahnuli cełuju i zdarovuju pałońnicu na pavierchniu.
Bunt na fermie
Stracili ciarplivaść pracaŭniki centralnaj fermy kałhasu “Bycienski” (Ivaceviččyna). Dajarki admovilisia ranicaj daić karoŭ, bo ad žniŭnia nia bačyli zarobkaŭ. Statak vyhnali na pašu niadojenym. Dla dušeŭnaj hutarki z rašučymi žyviołavodami pryjechaŭ staršynia kałhasu. Nie abiacajučy im hrošaj, jon dachodliva i natchiona havaryŭ pra ciažkaje finansavaje stanovišča haspadarki. Voś apošnim razam zavieźli na miasakabinat cełuju “Kałchidu” žyvioły, atrymali čatyry miljony rubloŭ, dyk patracili ich na salarku i zapčastki, apraŭdvaŭsia kiraŭnik. Vypuściŭšy paru ŭ śvistok, dajarki na viačerniuju dojku pryjšli: karovy ž nia vinnyja.
Aleś Łaŭraniuk, Ivacevičy
Vosiem biespracoŭnych nastaŭnikaŭ
U smurhonskim Centry zaniataści na ŭliku stajać 8 nastaŭnikaŭ. Šaściora ź ich — nastaŭniki pačatkovaj škoły, jakich skaracili tamu, što ŭsio mieniej dziaciej idzie ŭ pieršuju klasu. Adna nastaŭnica anhielskaj movy, jakoj prapanavali pracu pa specyjalnaści, nie zhadziłasia iści ŭ škołu, bo choča być pierakładčycaj. Maje racyju, dy ŭ nas u Smurhoniach takija naahuł nie patrabujucca. Jašče adzin nastaŭnik rasiejskaj movy nie pažadaŭ jechać u viosku. Siadzić choć biaz pracy, ale ŭ horadzie.
Žyvaja ryba
Centralny hastranom “Jubilejny” vyrašyŭ viarnuć byłoha pakupnika, jaki apošnim časam usio bolš pa pryvatnych kramach šastaje. Dyk pastavili vializny akvaryjum na 330 litraŭ z karasiami i karpami, što pastaŭlaje Solski rybchoz. Nidzie ŭ horadzie takoha niama. Chodziać ludzi, dziviacca i kuplajuć z achvotaj. Bo kaštuje tanna — 3100 rubloŭ za kilu. Rybu buduć pradavać až da listapada. Uvieś astatni čas akvaryjum budzie ŭpryhožvać interjer adnoj z najstarejšych smurhonskich kramaŭ.
Harelica-viesiałucha
Alkaholikaŭ u Smurhoniach štohod bolšaje. Kali ŭ 2001-m za try letnija miesiacy na ŭlik u narkalahičny kabinet trapiła 39 pituščych, dyk sioleta — amal udvaja bolej: 71 čałaviek zapisaŭsia da miascovaha narkolaha Siarhieja Čykina. I tolki dva ź ich pryjšli “zdavacca” dobraachvotna, biez prymusu. Z pryčyny pobytavaha pjanstva pastaŭlena na ŭlik 7 padletkaŭ 14—18 hadoŭ (letaś było zarehistravana čaćviora).
Čystyja veterany
Pryjemnaja navina dla veteranaŭ druhoj suśvietnaj vajny — dniami smurhonskija ŭłady vyrašyli brać ź ich tolki 50% hrošaj za naviedvańnie dziaržaŭnych cyrulniaŭ i łaźni. Patrebnaja sprava, bo nia tak šmat ich zastałosia: 218 na rajon, ź jakich u samich Smurhoniach — 118.
Novy ksiondz
U smurhonskim kaściole Michała Archanioła słužyć ciapier ksiondz Ździsłaŭ Veder. Jon pryjechaŭ z Maskvy, dzie 10 hadoŭ pracavaŭ adkaznym nastajacielem usich pradstaŭnikoŭ Ordena Saleźjancaŭ na terytoryi byłoha Sajuzu. Da hetaha vykonvaŭ svaje abaviazki ŭ Varšavie, Łodzi, Lublinie. Jamu 67 hod, 40 ź jakich jon — śviatar. Ajciec Hienryk Kulaševič, jaki słužyŭ u Smurhoniach dahetul, stamiŭsia. Stan zdaroŭja vymusiŭ jaho pakinuć pasadu ŭ jahonyja 73 hadoŭ. Jon viarnuŭsia ŭ Polšču.
Taciana Skarynkina, Smurhoni
Vakoł Kałožy pačyścieła
Haradzienskaja moładź prybrała śmiećcie vakoł Kałožy. Sabrali 40 pakietaŭ šklanych i plastykavych butelek, niedapałkaŭ i inšych “śladoŭ” naviednikaŭ Novaha parku, što pobač z chramam. Śviatar Barysahlebskaj carkvy paabiacaŭ znajści mašynu dla vyvazu śmiećcia. Moładź zmajstravała i ŭstalavała la Kałožy śmietnicu. Dahetul nivodnaje pablizu nie było. Miž tym, Novy park — papularny ŭ amataraŭ adpačynku na pryrodzie rajon miesta. Voś i traplajuć pustyja butelki j niedajedki nie ŭ pieraapracoŭku ci na zvałku, a na ziamlu ci ŭ Nioman.
Valery Rusielik, “Chronika Haradzienščyny”
Exegi monumentum
Na Paškoŭskich mohiłkach ustalavany nadmahilny pomnik z vyjavaj, a taksama imiem i proźviščam jašče žyvoha dyrektara Mahiloŭskaha haradzkoha pradpryjemstva rytualnych pasłuhaŭ. Złaviesnaja pradbačlivaść, naviejanaja pracoŭnymi abaviazkami, ci viernaje ŭkładańnie kapitału, ci…
“Viačerni Mahiloŭ”
Kožny vośmy
Kožny vośmy žychar Białyničaŭ, pavodle źviestak DAI, maje lehkavy aŭtamabil. Za apošnija 5 hadoŭ kolkaść ułasnych “lehkavikoŭ” u rajonie pavialičyłasia na 35% i składaje kala 3000 adzinak. U asnoŭnym heta staryja tannyja “inšamarki”.
Kaplička śviatoha Jurja
Na mohiłkach vioski Karytnica (Białyniččyna) aśviacili pravasłaŭnuju kapličku ŭ honar śviatoha Jurja. Amal try dziesiacihodździ jana była zakinutaja. Viaskoŭcy adramantavali śviatyniu, jakoj, pavodle tutejšych padańniaŭ, nia mienš za trysta hadoŭ, na ŭłasnyja srodki. Dapamahło j miascovaje laśnictva.
Bazyl Lićvinovič, Białyničy
Hłusk u Siecivie
U Hłuskim rajonie naličvajecca z 20 karystalnikaŭ Internetu. Naŭrad ci ŭ najbližejšy čas ich kolkaść pavialičycca, bo na telefonnym pieramoŭnym punkcie, niahledziačy na adpaviednuju abviestku, pasłuhi karystańnia Internetam i elektronnaj poštaj nie pradastaŭlajucca.
“Radzima”, Hłusk
Haradzienski vernisaž
U pieršyja dni kastryčnika ŭ vystaŭnaj zali Haradzienskaha Sajuzu mastakoŭ (vuł.Ažeški) adkryłasia vystava “Vosieński viernisaž”, na jakoj možna pabačyć novyja tvory kavala Jurasia Macka, mastakoŭ Feliksa Januškieviča, Uładzimiera Skamaroščanki (aŭtar “NN”) i inšych. Vernisaž možna pabačyć ciaham miesiaca.
Andrej Mialeška, Horadnia
Kabelnaje TB ŭ Astraŭcy
Tydzień tamu ŭ troch damach astravieckaha mikrarajonu Vaładarskaha ŭklučyli kabelnaje telebačańnie. Praŭda, pakul što ŭ jakaści eksperymentu. Abanenckaj płaty za jaho nie biaruć, i pra padklučeńnie astatnich damoŭ u rajcentry havorka nia jdzie, bo na heta niama hrošaj u astravieckaj kamunalnaj haspadarki.
Sabaka i śpirt
U lesie ŭ zonie dziejańnia Astravieckaj pamiežnaj kamendatury byŭ znojdzieny śpirt. Pamiežniki vyjavili schavanyja ŭ polietylenavych butelkach 150 litraŭ śpirtu pry dapamozie słužbovaha sabaki. Miarkujecca, što kantrabandysty sprabavali pierapravić pradukt u Litvu. Śpirt pieradadzieny ŭ milicyju.
Marjan Vianhroŭski, Astraviec
paciarpiełyja za Biełaruś
11 vieraśnia “za abrazu honaru i hodnaści” načalnika milicyi Astravieckaha RUUS Uładzimiera Kobrynca byŭ asudžany pradstaŭnik Biełaruskaha respublikanskaha klubu vybarcaŭ u Astraŭcy Ivan Kruk. 15 sutak aryštu za ŭdzieł u pikiecie kala rasiejskaha pasolstva atrymaŭ maładafrontaviec Źmicier Daškievič. 12 vieraśnia sudździa Čyhunačnaha sudu Viciebsku Śviatłana Tufan vyniesła prysudy siabram AHP: Alaksandar Kabiak, Jaŭhien Kanstancinaŭ, Aksana Kraŭcova, Nadzieja Šakalis i Aleh Šulhin atrymali administracyjnyja papiaredžańni, Vadzim Kraŭcoŭ i Alaksandar Bakulin – pa 150 bazavych adzinak štrafu. 16 vieraśnia za niesankcyjanavanaje pikietavańnie Administracyi prezydenta byli zatrymanyja Hieorhi Sałamienik, Michaił Tarasiuk, Źmicier Filipovič. Im vynieśli papiaredžańni. 29 vieraśnia ŭ Miensku zatrymanyja ŭdzielniki niesankcyjanavaha mitynhu ŭ abaronu niezaležnaści Biełarusi: Ździsłaŭ Abremski, Juraś Bieleńki, Valery Bujvał, Kastuś Kašel i Ŭładzimier Płotnikaŭ. Usie zatrymanyja byli asudžanyja na 3 sutak administracyjnaha aryštu.
