Padziei
Praces Aksiončyka budzie začynienym
Praces pa spravie byłoha advakata siamji Zavadzkich Ihara Aksiončyka budzie začynienym. Jaho abvinavačvajuć u paklopie na hienprakurora Viktara Šejmana. I.Aksiončyku pahražaje źniavoleńnie na termin da 2 hadoŭ.
Sprava suprać Koktyš
Žurnalistka hazety “Narodnaja vola” Maryna Koktyš była vyklikanaja na dopyt u Hieneralnuju prakuraturu. Jaje chočuć pryciahnuć jak śviedku i padazronuju ŭ kryminalnaj spravie suprać eks-dyrektara MTZ Michaiła Lavonava. Śledčyja miarkujuć, što ŭ interviju z aryštavanym žurnalistka parušyła artykuł Kryminalnaha kodeksu “Ab utrymańni pad vartaj” i daviała da šyrokaha viedama materyjały śledztva.
“Vieža”
Fond rehijanalnaha raźvićcia “Naša vieža” źjaviŭsia zamiest začynienaha Bieraściejskaha abłasnoha centru padtrymki hramadzianskich inicyjatyŭ “Vieža”. Na čale fondu — Ina Kulej.
Novyja konsulstvy
Da kanca hodu Biełaruś adkryje hienkonsulstva ŭ Stambule. Na čarzie — konsulstvy ŭ Atenach, Barselonie, Miunchienie. Konsulskaja słužba Biełarusi jość u 47 krainach śvietu, vizavyja zbory kampensujuć 60% biudžetu našych dyppradstaŭnictvaŭ za miažoj.
Krainaŭ Eŭraźviazu — 25
U 2004 h. u Eŭraźviaz prymuć Kipr, Čechiju, Estoniju, Łatviju, Litvu, Maltu, Polšču, Słavaččynu, Słavieniju i Vuhorščynu. Takoje rašeńnie pryniała eŭrakamisija. Takich čynam, praz dva hady Eŭraźviaz vyjdzie da miežaŭ Biełarusi.
Vajna ź Irakam nia vyklučanaja
U štab-kvatery AAN u Ńju-Jorku praciahvajecca vypracoŭka rezalucyi, jakaja b zmusiła Irak da biezumoŭnaha supracoŭnictva ź inspektarami AAN. Pavodle apošnich źviestak, Kitaj i Rasieja ŭžo zhodnyja padtrymać žorstki prajekt rezalucyi, prapanavany ZŠA i Vialikaj Brytanijaj. Zhodna ź im, ZŠA buduć mieć mahčymaść abviaścić vajnu Sadamu, kali toj nia puścić inspektaraŭ u svaje pałacy.
Levyja suprać vajny
Paśla zakliku 370 amerykanskich intelektuałaŭ 120 ich niamieckich kaleh vystupili z adozvaj suprać raspalvańnia vajny ź Irakam i palityki Buša ŭvohule. U liku padpisantaŭ nabelist Hiunter Hras, filozaf Jurhien Habemas, kiraŭnica niamieckaha PEN-klubu Johana Štraser, pastar Frydrych Šorlemer, režyser Jurhien Flim.
Śpiavajem pa-biełarusku
Tavarystva biełaruskaj movy pastanaviła pravieści ŭ kastryčniku miesiačnik “Śpiavajem pa-biełarusku”. TBM zaklikaje słuchać, śpiavać i tranślavać pieśni pa-biełarusku!
Ciače vada ŭ jarok
Festyval biełaruskaj pieśni, pryśviečany 120-hodździu Kupały i Kołasa, adbyŭsia ŭ Vilni z udziełam i pry aktyŭnaj padtrymcy pasła U.Harkuna i kiraŭnictva horadu.
Rasiejski špijon u Litvie
Ź Litvy vysłali hramadzianina Rasiei Andreja Kubačava, jaki źbiraŭ infarmacyju ab pradpryjemstvach enerhietyčnaha kompleksu krainy, pryznačanych dla pryvatyzacyi. Jon mieŭ druhi pašpart na imia hramadzianina Halandyi Andrea Chamieiłava.
Ekstravahancyi
Za paŭhodu isnavańnia “pasolstva Miesiaca” ŭ Biełarusi žychary našaj krainy nabyli 18 učastkaŭ na spadarožniku Ziamli. Standartny zahon na bačnym baku Miesiaca pamieram 72 hiektary kaštuje 99 dalaraŭ.
Muzej Łuckieviča adnoviać
Pastanovu pra adnaŭleńnie muzeju Ivana Łuckieviča ŭ Vilni pryniaŭ kamitet litoŭskaha parlamentu pa spravach adukacyi j kultury. Inicyjatary spadziajucca atrymać pad muzej słavutyja Bazyljanskija mury la Vostraj Bramy.
Azonu prybaviłasia
Azonavaja dzirka nad Antarktydaj padzialiłasia na dźvie mienšyja. Azonavy słoj, pavodle źviestak NASA, nad paŭdniovym polusam Ziamli ciapier najbolšy z 1988 h.
Bierazoŭski pajšoŭ
pa śladach Čajki
Rasiejski aliharch Bierazoŭski vydaŭ za svoj košt knižnuju versiju ramanu Prachanava “Pan hieksahien”. U adroźnieńnie ad hazetnaje versii, kniha pazbyłasia antysemisckich vypadaŭ. Hazeta “Zavtra”, redahavanaja Prachanavym, ciapier zaklikaje kamunistaŭ pryniać padtrymku, jakuju prapanuje im apalny aliharch.
Trahičny vypadak
Na źvierafermach Finlandyi ŭ minułyja vychodnyja pamierli kali 20 tys. lisaŭ. Heta samy masavy vypadak atručańnia žyviołaŭ u krainie—ekspartery lisinaha futra. Pryčynaj zachvorvańnia stała charčovaje atručańnie.
Pavodle BiełaPAN, radyjo “Svaboda”, “Reuters” i ŭł. inf.