U čynoŭnikaŭ MZS było dosyć času, kab adšlifavać farmuloŭki zajavy z nahody straty preferencyjaŭ. Dla ajčynnych spažyŭcoŭ aficyjozu sakret Pališynela (dakładniej, Mandelsana:-) afišavali akurat 21 červienia.
Zajava strymanaja. Z akcentam na ŭronie intaresam prostych hramadzianaŭ. Biez taje bravady, što demanstravałasia na vysokim uzroŭni paŭhodu tamu, kali faktyčna j było pryniataje rašeńnie Eŭraźviazu: "Što my takoje stracili? Ci to $100 młn., ci to $200 młn., heta my nie zaŭvažym. Heta nie zapazyčanaść Rasiei za haz dy naftu. Pieražyviem, abydziemsia!".
Procipastaŭlać adnyja straty inšym pavodle vektaru naŭrad ci lahična. Bo z usich bakoŭ u minusie, i heta suma z narastajučym vynikam.
Darečy, što da sumy ŭronu ad vyletu z Abahulenaj systemy preferencyjaŭ, dyk arytmetykaj dla pieršaje klasy tut nie abydziešsia. Kali mechanična vyličyć, kolki składajuć 3% padvyšeńnia myta, nibyta j sapraŭdy nia strašna. Ale ž tut najbolej paciahnuć uskosnyja straty, jakija buduć raści śniežnym kamiakom, kali niepryjemnaja historyja zaciahniecca. Kraina z "čornaj mietkaj" — nia lepšy partner dla zaklučeńnia novych biznes-kantraktaŭ.
Z apazycyi (u šyrokim sensie) na hetym pytańni pakul što zrabiŭ sabie całkam piśmienny pijar Alaksandar Jarašuk. Zaŭvažcie: jon i jahony BKDP prymusili siabie pavažać. Ź im sustrakałasia Piatkievič, jaho starajucca nie čapać majstry brudnaj prapahandy.
Miž tym mahli b vyjavić siabie i lidery palityčnaj apazycyi. Vo kali byŭ by darečy adkryty list navierch, naprykład, ad Milinkieviča! Vy, maŭlaŭ, źmiakčycie zakon ab prafsajuzach dy vypuścicie Kazulina, a ja, vykarystoŭvajučy svaje suviazi ŭ Eŭropie, pakłapačusia pra najchutčejšaje adnaŭleńnie status-kvo!
Jak možna zrazumieć sa słoŭ taho ž Jarašuka, pravadyry partyjnaj apazycyi nia rvucca hulać na hetaj palanie praź niuansy asabistych dačynieńniaŭ. Dyj uvohule vostryja chatnija prablemy (preferencyi, ilhoty, pytańnie AES i h.d.) adsoŭvajuć na potym (uvosień udarym maršam pa režymie!), zatoje pałymiana dyskutujuć na mižpartyjnych forumach u Maskvie.
Darečy, nakont Maskvy. Čarhovy žorstki analityk ad Suzdalcava. Kamu ciažka adoleć usie zyhzahi metafaraŭ, vierstavyja słupy epihrafaŭ dy płyni sarkazmu :-), adrazu dakładaju pra suchuju astaču.
Sens taki: nadziei biełaruskaha boku na vyratavalnuju sustreču z Pucinym raźviejalisia, z "asymetryčnym adkazam" taksama nia śviecić. Maskva praciahvaje trymać na ekanamičnym kručku. Uvachod u jašče bolej žorstkaje cenavaje pole 2008 hodu moža być dla biełaruskaj ekanomiki pahibielnym.
Reziume: "U vypadku kali A.Łukašenka navažycca iści napierad biez Maskvy, ciaham nastupnych 4-8 tydniaŭ biełaruski prezydent musić vyłučyć novuju ekanamičnuju palityku (NEP) dla Biełarusi, jakaja b zabiaśpiečyła histaryčna imhniennaje ŭvachodžańnie krainy ŭ rynkavy farmat dačynieńniaŭ ź jaje asnoŭnym ekanamičnym partneram". Adlik pajšoŭ :-)
Kaniešnie, nakont imhniennaści, navat histaryčnaj, jość sumnievy. Ale niesumnienna toje, što vysokaje biełaruskaje kiraŭnictva siońnia sapraŭdy zacisnutaje ŭ kut rynkavymi imperatyvami. I adnym prodažam "błakitnych fišak" stanovišča nie ŭratuješ.
