ekanamičnaja chronika

23 studzienia

Suprać pahadzinnaj staŭki

Urad źbirajecca ŭvieści pahadzinnuju taryfnuju staŭku apłaty pracy zamiest pamiesiačnaj, Federacyja prafsajuzaŭ Biełarusi pracivicca hetamu. Jana ličyć, što pahadzinnaja apłata zrobić pracaŭnikoŭ sacyjalna biezabaronnymi. Pracadaŭcy pačnuć masava pieravodzić supracoŭnikaŭ na niapoŭny pracoŭny dzień, źnižać zarobki dy pierastanuć płacić za vymušanyja prastoi. Ciapier taryfnaja staŭka vyznačajecca z raźliku na miesiac.

Kamercyjny špijanaž u «Paleśsi»

Pinskaje AAT «Paleśsie», što vyrablaje trykataž, zasakreciła ŭsiu infarmacyju pra svaju dziejnaść. Letaś adna z ukrainskich karparacyjaŭ pasprabavała nabyć kantrolny pakiet pradpryjemstva, karystajučysia nielehalnymi kserakopijami dakumentaŭ, atrymanych ad niekaha z supracoŭnikaŭ «Paleśsia». Ciapier źviestki pra štat, vytvorčaść, kantrakty, vydatki dy prybytki pradpryjemstva — kamercyjnaja tajamnica. Spryjać jaje zachavańniu budzie słužba ekanamičnaj biaśpieki «Paleśsia».

Akcyi naftachimii — za hrošy

[] 21 studzienia ŭrad zaćvierdziŭ prajekt ukazu prezydenta, zhodna ź jakim nabyvać akcyi «Naftanu», «Palimiru», «Biełšyny», «Azotu», «Chimvałakna» možna budzie vyklučna za hrošy. Pracaŭniki pradpryjemstvaŭ zmohuć kupić akcyjaŭ na sumu, nia bolšuju za 100 bazavych vieličyniaŭ (kala 1,2 młn. rubloŭ). Čeki «Majomaść» mianiacca na hetyja akcyi nia buduć.

Bujnyja zamovy

«Babrujskmebla» vypraŭlaje ŭ Niamieččynu bujnuju partyju mebli ź biarozy na sumu 200 tys. eŭra. «Kamunarka» rychtuje da prodažu ŭ ZŠA 20 tonaŭ cukierak. Kansorcyjum «Nike» zamoviŭ babrujskamu AAT «Słavianka» pašyŭ formy dla rasiejskaha čempijanatu pa futbole — niekalki tysiačaŭ futbołak dy šortaŭ.

Elektravietraki

AAT «Aeroła» sumiesna z polskimi investarami buduje elektraviatrak mahutnaściu ŭ tysiaču kVt. Pałova detalaŭ dla hetaha vietraka, jaki pradaduć u Polšču, — biełaruskija. U kałhasie «Mir» na Kojdanaŭščynie ŭžo staić elektraviatrak na 250 kVt, pabudavany «Aerołaj». U Biełarusi jość kala 1560 punktaŭ, u jakich možna ŭstalavać elektravietraki. Siaredni košt vietraka — 500—600 tys. dalaraŭ.

«Pryjor» plus «Raiffeisen»

17 studzienia schod akcyjaneraŭ «Pryjorbanku» zaćvierdziŭ prodaž 50% svaich akcyjaŭ aŭstryjskamu «Raiffeisen». Aŭstryjcy nabyli pakiet akcyjaŭ za 31,4 młn. dalaraŭ. «Raiffeisen» praciahvaje skupku. Jon prapanavaŭ inšym akcyjaneram pradać jamu akcyi «Pryjorbanku» pa košcie, u 4,5 razu bolšym za naminał. Ciapier tolki «Biełarusbank» dy «Biełahraprambank» majuć kapitał, bolšy, čym u «Pryjorbanku».

AK