Vybary deputataŭ u Bieraściejski abłasny saviet u Baranavičach sioleta projduć jak u savieckija časy. Usie siem akruhaŭ bezalternatyŭnyja. Usie kandydaty — vyłučency ŭładaŭ. Usie jany sprabujuć taksama patrapić u miascovyja saviety.
|
| Aleś Hrycaviec — 1970 h.n., kiraŭnik terma-halvaničnaha ŭčastku Baranavickaha aŭtaahrehatnaha zavodu, svajak lotčyka-hieroja Hrycaŭca. |
Siaredni viek kandydataŭ u miascovyja saviety — 48 hadoŭ. Samamu maładomu — 19 (biespartyjny navučeniec kaledžu lohkaj pramysłovaści), najstarejšamu — 77 hadoŭ (metadyst haradzkoha ŭpraŭleńnia adukacyi, idzie ad KPB). Kiraŭnikoŭ, namieśnikaŭ, kamandziraŭ čaściej — 16, nastaŭnikaŭ — 18 (ź ich 15 dyrektaraŭ škołaŭ, kaledžaŭ, VNU), daktaroŭ — 10 (tych, što zajmajuć kiroŭnyja pasady, — 8). Iduć va ŭładu tolki 2 pradprymalniki. Taksama abirajucca vajenkam horadu i ciapierašni staršynia harsavietu Ŭładzimier Stachnoŭ (hetyja — biezalternatyŭna).
Partyi razam zdoleli zarehistravać 19 čałaviek: BNF — 2, BSDP (NH) — 7, AHP — 3, PKB — 3, KPB — 4. «Ad AHP ŭ Baranavičach išło 6 čałaviek, zarehistravana tolki 3.
|
| Viktar Karlinski — 1955 h.n., staršynia ŽSK-38, staršynia baranavickaj BSDP (NH). |
Miascovyja filii demakratyčnych partyj nia zdoleli padzialić akruhi. Tolki vypadkova ich kandydaty nie sutyknulisia. «Papadańnie» adbyłosia tolki adnojčy — pa akruzie №7 iduć Aleś Kisiel ad AHP i staršynia baranavickaj BSDP (NH) Viktar Karlinski. Heta adno dadaje šancaŭ treciamu supierniku, Alaksandru Razumavu, namieśniku dyrektara ZAT «Atlant».
Usie partyjcy majuć u akruhach kankurentaŭ. Najbolš pretendentaŭ na ŭčastku №17 — 4 čałavieki. Mienavita tam balatujecca staršynia baranavickaj Rady BNF Aleś Hrycaviec. Ale jon zdavacca nie źbirajecca. «Chadžu ad dźviarej da dźviarej, — kaža Hrycaviec. — Ludzi złyja na ŭładu — za rost kvartpłaty».
Na pratestnyja nastroi raźličvajuć usie apazycyjnyja kandydaty.
Rusłan Raviaka, Baranavičy
