Niadaŭna Biełaruś naviedaŭ deputat ukrainskaha parlamentu, siabra frakcyi V.Juščanki «Naša Ŭkraina» Ŭładzimier Bondar. Jon braŭ udzieł u mižnarodnym moładzievym seminary «Stratehija źmienaŭ» i naviedaŭ redakcyju «NN». Pavodle słovaŭ deputata, va Ŭkrainie siońnia adčuvajecca niedachop infarmacyi pra padziei ŭ Biełarusi. My ž paprasili U.Bondara raspavieści pra sytuacyju va Ŭkrainie napiaredadni prezydenckich vybaraŭ 2004 h.
«NN»: Ci pojdzie Leanid Kučma na treci termin?
U.B.: Naŭrad ci. Kanstytucyja nie dazvalaje, a kab jaje źmianić, Kučma nia maje padtrymki 2/3 parlamentu. Prezydent rychtuje pieranos vybaraŭ. Ale, znoŭ ža, parlament jaho ŭ hetym nie padtrymaje.
«NN»: Nakolki mocnyja ŭpłyvy Rasiei na palityčnuju sytuacyju va Ŭkrainie?
U.B.: Bolšaść našych surjoznych pradpryjemstvaŭ siońnia naležać rasiejskamu kapitału. Jon upłyvaje na palityku praz łabiravańnie svaich intaresaŭ. Aproč taho, Kučma mocna zaležyć ad Rasiei, šukaje tam parazumieńnia. Kab praciahnuć termin svajho prezydenctva, jon pastupajecca ekanamičnymi intaresami Ŭkrainy.
Dyj mnohija palityčnyja siły Ŭkrainy karystajucca pasłuhami rasiejskich pijar-ahiencyjaŭ dla raspracoŭki ŭłasnaj stratehii. Rasiejskija palittechnolahi pracujuć na ŭkrainskim palityčnym rynku i peŭnyja svaje idei zakładajuć praź dziejnaść hetych partyj.
«NN»: Jak «Naša Ŭkraina» źbirajecca supraćstajać hetamu ŭpłyvu?
U.B.: Nastupnym krokam u baraćbie z prarasiejskimi ŭpłyvami budzie vyłučeńnie kandydata ŭ prezydenty — Viktara Juščanki. Jon, kali byŭ premjeram, staviŭ na pieršy plan intaresy Ŭkrainy, a nie jakoj inšaj dziaržavy. Naš blok jakraz i vyznačajecca tym, što zajmaje nie prarasiejskuju, nie prazachodniuju, a praŭkrainskuju pazycyju.
«NN»: Čyj bok voźmuć levyja siły na vybarach? Ci buduć jany pravodzić svajho kandydata?
U.B.: Levyja siły va Ŭkrainie nieadnarodnyja. Kamunistyčna aryjentavanyja ludzi, jakich va Ŭkrainie ćviordyja 20%, nie prahałasujuć u pieršym tury za V.Juščanku. Bolš pamiarkoŭnyja prychilniki partyi Alaksandra Maroza, ludzi nacyjanalna śviadomyja, jakija trymajucca klasyčnych sacyjał-demakratyčnych pohladaŭ. Jany mohuć padtrymać našaha kandydata, a heta kala 10% vybarcaŭ Ukrainy.
«NN»: Ci mahčymyja falsyfikacyi na vybarach?
U.B.: Pierad minułymi vybarami my pryniali novaje vybarčaje zakanadaŭstva. Jano zrabiła niemahčymymi falsyfikacyi na ŭzroŭni vybarčych kamisijaŭ, što ciapier farmujucca z pradstaŭnikoŭ palityčnych partyj.
«NN»: Jaki ŭpłyŭ majuć ułada i apazycyja na elektronnyja ŚMI va Ŭkrainie?
U.B.: Ułada maje vielmi vialiki ŭpłyŭ — praz pasiarednictva finansavych strukturaŭ, jakija kantralujuć tyja ŚMI. Tamu havaryć pra prysutnaść apazycyi na ekranach nie davodzicca. Toje samaje možna skazać i pra bujnyja hazety. Apazycyja pracuje tolki z peŭnymi rehijanalnymi kanałami, vydaje rehijanalnuju presu.
«NN»: Ź jakimi palityčnymi siłami ŭ Biełarusi Vy kantaktujecie?
U.B.: My sustrakalisia z pradstaŭnikami BNF, ale heta adna apazycyjnaja palityčnaja siła, choć i samaja surjoznaja z našaha punktu hledžańnia. Inšyja palityčnyja siły, jakija mieli b upłyŭ i byli prazachodnija, praeŭrapiejskija i prademakratyčnyja, nam nieviadomyja. A my chacieli b ź imi mieć kantakty, u tym liku i na rehijanalnym uzroŭni.
«NN»: Jak by Vy acanili takija kantakty ŭ ramkach prajektu eŭrarehijonu «Buh»?
U.B.: Eŭrarehijon «Buh» stvaryli Vałynskaja vobłaść Ukrainy, Bieraściejskaja vobłaść Biełarusi i Lublinskaje vajavodztva Polščy. Dziejnaść hetaha abjadnańnia ciapier nabyvaje asablivaje značeńnie, bo da našych miežaŭ padychodzić Eŭropa.
Hutaryŭ Siarhiej Jorš
