Mocnaha biskupa vysłali ŭ Sibir

Papa Jan Pavał II pryznačyŭ novaha katalickaha jararcha ŭ Rasieju. Biełarus Kiryła Klimovič zamienić jepiskapa Ježy Mazura ŭ Irkucku. Faktyčna, užo hod dyjacezija była «abiezhałoŭlenaja», bo ŭ krasaviku 2002-ha polski hramadzianin Mazur, biez tłumačeńnia pryčynaŭ, byŭ pazbaŭleny rasiejskaj vizy j vydaleny za miežy Rasiei. Ciapier jon pryznačany biskupam Ełckaj japarchii ŭ Polščy. Paśla hetaha i inšych skandałaŭ z zabaronaj polskim śviataram ujezdu ŭ Rasieju, Vatykan zmušany stavić na rasiejskuju dyjaceziju biełarusa, jaki nia maje takich prablemaŭ ź pierajezdam miažy.

Biskup Klimovič byŭ dapamožnym biskupam kardynała Śviontaka. Jon naradziŭsia ŭ 1952 h. u Kazachstanie. Dziciem razam z baćkami vyjechaŭ u Polšču. Vyšejšuju duchoŭnuju adukacyju atrymaŭ u Olštynie (Polšča), tamsama słužyŭ vikaryjem kala dziesiaci hadoŭ. U lipieni 1990 h. Klimovič byŭ pryznačany ŭ Biełaruś, nastajacielem i dekanam u Hłybokaje. Dapamožnym biskupam K.Klimovič staŭ u kastryčniku 1999-ha. Jon absłuhoŭvaŭ Mienska-Mahiloŭskuju archidyjaceziju. Klimovič volna havoryć biełaruskaj, polskaj, rasiejskaj dy italjanskaj movami. Jon z tych maładych ryma-katalickich śviataroŭ-biełarusaŭ, jakija atrymali dobruju adukacyju j prychilna staviacca da biełaruščyny. Kamuści jon bačyŭsia pierajemnikam Kazimiera Śviontaka.

Presavaja słužba Vatykanu raspaŭsiudziła paviedamleńnie, što pryznačeńnie «biskupa Kiryły Klimoviča dazvolić dyjacezii Śv.Jazepa ŭ Irkucku praciahvać duchoŭnaje i carkoŭnaje raźvićcio ŭ śviatle Evanhiella Chrystovaha». Dyjacezija Śv.Jazepa achoplivaje ŭsiu uschodniuju Sibir i składajecca ź piaci dekanataŭ: Irkuckaha, Krasnajarskaha, Jakuckaha, Uładzivastockaha i Mahadanskaha. Jana abjadnoŭvaje 43 zarehistravanyja prychody, dvanaccać dziejnych kaściołaŭ i dvaccać adnu kaplicu. Asablivaść dyjacezii — vielizarnaja addalenaść asobnych prychodaŭ (naprykład, Tuvy i Čukotki). Tamu praca dla biskupa va ŭschodniaj Sibiry davoli ciažkaja, choć i perspektyŭnaja ŭ planach rostu ŭ kaścielnaj jararchii. Adoleć jaje moža tolki sapraŭdy mocny biskup.

Aleh Tačony