Biełarusy pry kancy 1980-ch, viartajučy historyju, vyšyvali kašuli dy adnaŭlali recepty krupniku. Za dvaccać hadoŭ my pastaleli na niekalki stahodździaŭ dy pierajšli ad rodavaj abščyny da feadalnaha ładu. Ani histaryčnymi klubami, ani medyjavisckimi festami Biełaruś nia ździviš. I jašče adzin maje prajści nieŭzabavie: 3—4 lipienia ŭ Niaśvižy.
Arhanizatary — miž ich Ihar Michna — abiacajuć adnačasovyja kancerty (siaredniaviečča j folk) na dźviuch placoŭkach («Trojca», «Stary Olsa» ź Biełarusi, «Open Folk» z Polščy, «Drolls», «Laterna Magica» z Rasiei, upieršyniu — muzyki ź Vialikaj Brytanii). Kancepcyja festu — «žyvaja historyja»: uznaŭleńnie abradaŭ, ramiostvaŭ, technalohij, stravaŭ, napojaŭ, lekarstva, fechtavańnia. Pryčym usio heta — interaktyŭnaje (hledačy zmohuć prymierać stroi, za peŭnuju płatu pabicca z rycarami, śpiačy blin i da t.p.). Jašče arhanizatary abiacajuć ahniavoje šoŭ; vodnuju bitvu «Ŭziaćcie Hibrałtaru», staruju zabavu Radziviłaŭ; dabračynny fest «Muzyka zamkaŭ i vakolicaŭ» (hrošy — na restaŭracyju Niaśviskaha zamku); videapremjeru «Nastaśsi Słuckaj» (pakul pa-rasiejsku, ale paźniej abiacajuć ahučyć i pa-nasku). Jak vyžyvali ŭ Siaredniavieččy dyjabetyki, raspaviaduć (i prademanstrujuć) siabry klubu dyjabetykaŭ. A admysłoŭcy ź viadomaj kampanii, jakaja funduje prajekt, prezentujuć kalekcyju siaredniaviečnaj bializny.
Arhanizatary raźličvajuć, što aŭdytoryja festu składzie za dva dni 50 tys. čałaviek.
U pieršy dzień fest budzie ciahnucca z 12.00 da 1.00, u druhi — z 11.00 da 22.00. Dajechać da Niaśvižu ź Miensku možna aŭtobusam — u 9.00 z vuł.Družnaja (kvitok kaštuje 16 tys. rub., dla dziaciej — 10 tys.). Elektryčkaj — tańniej: da st. Haradzieja (bieraściejski kirunak), a potym rejsavym aŭtobusam da Niaśvižu. Chto jedzie na dva dni — biarycie namioty dy ježu. Pahladzim, jakija abiacanki spraŭdziacca ŭ Niaśvižy i ci prychilna sustrenie nearycaraŭ Čornaja Panna.
Krysia Pacučynskaja, Siarhiej Budkin
