Unitarnyja pradpryjemstvy «Ŭprava transpartu i suviazi Mienharvykankamu», «Mienskpasažyraŭtatrans», «Mienskhar-elektratrans», «Mienski metrapaliten» buduć abjadnanyja i ŭtvorać novaje transpartnaje kamunalnaje pradpryjemstva «Miensktrans».
Abhruntoŭvajecca takoje rašeńnie tym, što na novym pradpryjemstvie možna budzie aptymizavać pracesy kiravańnia i, značyć, skaracić administracyjny aparat. U najbližejšyja hady budzie zvolniena ad 25 da 35% kiraŭnikoŭ siaredniaha źviana i specyjalistaŭ, što dazvolić dasiahnuć značnaj ekanomii srodkaŭ. Ciažka sabie ŭjavić, jak dla absłuhoŭvańnia adnoj hihanckaj struktury moža patrabavacca mienš kiraŭnikoŭ, čym dla čatyroch mienšych. Efekt maštabu, jaki zaklučajecca ŭ źmianšeńni administracyjnych vydatkaŭ z pavieličeńniem pamieru firmy, pracuje tolki da peŭnaj miažy. Potym hetyja vydatki pačynajuć iznoŭ raści dziela składanaściaŭ u kamunikacyi, što ŭźnikajuć na zanadta bujnych pradpryjemstvach. Jość niebiaśpieka, što mienavita takaja sytuacyja ŭźniknie i na novym «Miensktransie».
Mienharvykankam svaim rašeńniem paćvierdziŭ niezacikaŭlenaść u refarmavańni haradzkoha transpartu. A jano nieabchodnaje: dziaržava mocna subsyduje transpartnyja pradpryjemstvy, bo ŭsie jany stratnyja. Dyj uzrovień servisu zastajecca nieprymalna nizkim. Taryfy na prajezd rastuć chutčej za inflacyju — a transpart tak i chodzić pierapoŭnienym, mašynny park u žachlivym stanie, parušajucca ekalahičnyja normy.
Dla reformy ž zvyčajna patrabujecca advarotnaje abjadnańniu — restrukturyzacyja, padzieł na drabniejšyja struktury, pieravod na haspraźlik, častkovaja pryvatyzacyja (akcyjanavańnie). Ciapier Mienharvykankam stvaraje hihanta, refarmavać jaki paśla budzie amal niemahčyma. A isnavać jon budzie za tyja ž hrošy padatkapłatnikaŭ — i tych, što buduć kuplać adziny prajazny, i tych, što ŭ tralejbusach nia dušacca.
Daminik Michajłovič
