Na dumku aŭtaraŭ rezalucyi, heta situacyja abumoŭlena ramontna‑budaŭničaj aktyŭnaściu abłasnych (staršynia abłvykankama Uładzimir Saŭčanka) i haradskich uładaŭ (staršynia harvykankama Alaksandr Antonienka, hałoŭny architektar Uładzimir Anisimaŭ), jakija pad łozunham «rekanstrukcyi», faktyčna, rujnujuć histaryčny centr Hrodna.
Udzielniki «kruhłaha stała», što prajšoŭ 21 červienia, patrabujuć ad abłasnych i haradskich uładaŭ:
1. Dakładnaha vykanańnia Hienieralnaha płana Hrodna, zaćvierdžanaha ŭ 2003 hodzie.
2. Pryciahnieńnia da administracyjnaj i sudovaj adkaznaści tych słužbovych asobaŭ, pa zahadu jakich letam 2006 hoda byŭ źniščany archieałahičny słoj na Savieckaj płoščy i parušana jaje histaryčnaja płaniroŭka, a ŭ hetym hodzie rujnujucca histaryčnyja budynki u centry horada. Taksama pryciahnieńnia da administracyjnaj adkaznaści vinavatych u masavym śpiłoŭvańni drevaŭ u miežach horadu, jakoje adbyvałasia letam 2006‑ha i viasnoj 2007 hoda.
3. Raspracoŭki kompleksnaha płana restaŭracyi i rehienieracyi histaryčnaha centra.
4. Stvareńnia abłasnych navukova‑prajektnych i vytvorčych restaŭracyjnych struktur.
5. Šyrokaha abmierkavańnia prablemy «rekanstrukcyi» histaryčnaha centra ŭ srodkach masavaj infarmacyi z adlustravańniem roznych pohladaŭ na jaje chod i vyniki.
6. Publikacyi i hramadskaha abmierkavańnia ŭžo isnujučych prajektaŭ «rekanstrukcyi» budynkaŭ i kvartałaŭ histaryčnaha centra. Uviadzieńnie žorstkaha praviła, što pryniaćcie padobnych prajektaŭ pavinna adbyvacca tolki na konkursnaj asnovie, z zaprašeńniem niezaležnych ekśpiertaŭ, va ŭmovach hałosnaści i z ulikam mierkavańniaŭ hramadskaści.
7. Viarnucca da idei adnaŭleńnia ŭzarvanaj u 1961 hodzie «Fary Vitaŭta» (Kaścioł Uniebaŭziaćcia Maci Božaj» (XVI st.), a taksama rehienieracyi źniščanych u paślavajenny čas frahmientaŭ horadabudaŭničaha kompleksu na vuł. Zamkavaj i Savieckaj.
Udzielniki «kruhłaha stała» hatovyja arhanizavać historyka‑kulturałahičny lektoryj dla adkaznych rabotnikaŭ horadu i vobłaści, pryśviečany i prablemam restaŭracyi pomnikaŭ historyi i kultury, a taksama akazać usialakuju dapamohu ŭ spravie adnaŭleńnia źniščanych u XX i XXI stahodździach pomnikaŭ historyi i kultury Hrodna. U pryvatnaści, dapamahčy ŭ praviadzieńni navukovych (archiŭnych) daśledavańniaŭ, vyniki jakich mohuć stać asnovaj dla raspracoŭki prajektaŭ zachavańnia i revitalizacyi histaryčnaha centra.
Rezalucyju padtrymali 48 udzielnikaŭ kruhłaha stała, paviedamlaje pres‑słužba haradzienskich prychilnikaŭ ruchu «Za Svabodu».
Nahadajem, što na pasiedžańnie «kruhłaha stała» byli zaprošanyja pradstaŭniki aficyjnych strukturaŭ, niedziaržaŭnych hramadskich arhanizacyj, a taksama ŭsie žadajučyja. U vyniku sabrałasia bolej 50‑ci čałaviek, u tym liku vykładčyki Hrodnienskaha dziaržaŭnaha ŭniviersitetu, jakim nieabyjakavy los staražytnaj Horadni. Častka ź ich pradstaŭlała roznyja hramadskija arhanizacyi Haradzienščyny i palityčnyja partyi. Jak padkreślivajuć u pres‑słužbie haradzienskich prychilnikaŭ ruchu «Za Svabodu», pradstaŭniki aficyjnych strukturaŭ nie byli zaŭvažanyja. Ułady ŭ čarhovy raz praihnaravali prapanovu dyjałohu.
Na «kruhłym stale» vystupali historyki Aleś Smalančuk, Alaksandr Kraŭcevič, Viačasłaŭ Švied, Andrej Vaškievič, Ihar Łapiecha, Natalla Śliž, Iryna Kiturka, lider ruchu «Za Svabodu» Alaksandr Milinkievič, architektary Alena Parchuta i Rołand Žamojcin.
