22.01.2004
Supiarečlivyja viestki pra bałtyjski hazapravod
Premjer-ministar Rasiei Michaił Kaśjanaŭ padpisaŭ pastanovu ab pabudovie Paŭnočnaeŭrapiejskaha hazapravodu praz Bałtyjskaje mora ŭ Niamieččynu. Košt prajektu — kala $6 młrd. Tym časam pradstaŭnik Eŭrakamisii vykazaŭ padtrymku prajektu pabudovy druhoj čarhi «Jamału—Eŭropy» praz Polšču j Biełaruś. Faŭzi Bensarsa, vysokapastaŭleny čynoŭnik u viedamstvie kamisara EZ pa enerhietycy j transparcie, zrabiŭ heta ŭ Varšavie ŭ časie cyrymonii zaćviardžeńnia ŭradami Polščy j Ukrainy ŭhody ŭ spravie naftapravodu Adesa—Brody. Arhument — druhi «Jamał» kaštavaŭ by ŭ 6 razoŭ tańniej za bałtyjski hazapravod.
Rekordnyja prybytki «Hazpromu»
Zyski «Hazpromu» ŭzraśli ŭ 2003 na 25% — da $16,5 młrd. Heta najlepšy pakazčyk za 30 hadoŭ, dasiahnuty dziakujučy nadzvyčaj vysokamu ŭzroŭniu cenaŭ.
Aryštavany zasnavalnik Łahojskaje vinakurni
Prakuratura abvinavaciła hramadzianina Izrailu Ihara Turka ŭ tym, što jon u 2001 h. u časie pracy namieśnikam dyrektara Łahojskaha likiora-harełačnaha zavodu razam z adnym z zasnavalnikaŭ pradpryjemstva Česłavam Skaržynskim uziali kredyt u «Biełaruskim industryjalnym banku» ($300 000), skarystaŭšysia falšyvymi dakumentami. Paśla hetaha hrošy pieraličyli praz padstaŭnych asobaŭ na rachunak pradpryjemstva-adnadzionki ŭ adzin z maskoŭskich bankaŭ. Sp.Turak paśla zvolniŭsia z Łahojsku i ŭładziŭsia inžyneram u adnu mienskuju firmu. Jon pracavaŭ tam da 6 śniežnia, pakul mienskaja prakuratura jaho nie aryštavała.
«Dažynki» ŭ Vaŭkavysku
Sioletnija «Dažynki» projduć u Vaŭkavysku. Fest prynosić rajonu-arhanizataru miljardnyja investycyi ŭ paradkavańnie i ramont.
Kandytary hurtujucca
Čatyry najbujniejšyja vytvorcy łasunkaŭ — «Spartak» (Homiel), «Kamunarka» (Miensk), «Čyrvony mazyranin» (Naroŭla), «Słodyč» (Miensk) abaviazalisia pracavać na ajčynnym rynku ŭ roŭnych umovach. Rašeńnie pryniataje na naradzie ŭ Homieli. Hetyja čatyry zavody vyrablajuć kala 75% usich słodyčaŭ krainy. Uhoda praduhledžvaje ŭnifikacyju adterminovak u płaciažach i kamisijnych uznaharodaŭ.
«Volva» ŭ Horadni?
Skončylisia kansultacyi ab raźmiaščeńni ŭ Haradzienskaj SEZ vytvorčaści detalaŭ dla «Volva» i «Skanii» na bazie zavodu aŭtaahrehataŭ «Minciažlohmaš» i «Radyjochvala». Vynik niajasny.
Prafsajuzy chočuć palavać
FPB prahnie ŭziać u arendu na 30 hadoŭ palaŭničyja ŭhodździ ŭ Łahojskim i Barysaŭskim rajonach dla stvareńnia «ŭzornaje palaŭniča-rybackaje haspadarki FPB». Sprava vyjšła na pavierchniu paśla taho, jak zabiła tryvohu hrupa siabroŭ Tavarystva palaŭničych i rybakoŭ.
Atroščankavu abłamiłasia
Brytanskija miljardery braty Barkłai kuplajuć kampaniju «Hollinger Int.», jakaja vałodaje hazetaj «Daily Telegraph». Košt hiešeftu składzie $468 młn.
Šery rynak žyvie hadami
Abaroty «čornaha rynku» ŭ Italii składajuć amal 550 młrd eŭra. Takija vysnovy robiać italjanskija daśledčyki. Prybytak nielehalnych pradpryjemstvaŭ aceńvajecca ŭ 200 młrd eŭra. Prychoŭvańnie prybytkaŭ ciahnie niedapłatu padatkaŭ na 210 młrd u hod. 15 młrd daje vypusk tavaraŭ padrobnych firmovych marak. 55 młrd eŭra składajuć abaroty pirackaha aŭdyjovidearynku. 18 młrd eŭra prynosić niezakonnaja bukmekierskaja dziejnaść. Narešcie, za skambinavanyja aŭtamabilnyja avaryi krucialam udajecca spahaniajuć 305 młn eŭra ŭ hod. Ci nia toje samaje ŭ praporcyjach adbyvajecca i ŭ siniavokaj baćkaŭščynie?
Hihanckaja soniečnaja ES
Najbolšaja soniečnaja elektrastancyja śvietu paŭstanie ŭ Lajpcyhu, jaki znachodzicca trochi paŭdnioviej Homielu ci Bieraścia. Jaje buduje «Royal/Dutch Shell» za 22 młn eŭra. Stancyja mahutnaściu 5 mVt budzie zabiaśpiečvać tokam 1800 kvateraŭ u navakolli Lajpcyhu — adnaho z najbujniejšych haradoŭ Uschodniaj Niamieččyny.
«Kodak» pierachodzić na ličbu
Fotakancern «Eastman Kodak» spyniŭ prodaž zvyčajnych aparataŭ na rynkach ZŠA, Kanady i Zachodniaj Eŭropy. Zvyčajnuju fatahrafiju adusiul vyciskaje ličbavaja.
MB; BiełaPAN; radyjo «Svaboda»
