3 krasavika ŭ Miensku adbyŭsia forum «Budučynia levych u Biełarusi». Pabyvaŭšy na im, ja narešcie zrazumieŭ pryčynu razvału SSSR.
Deficyt harełki, podstupy CRU i kałdyrny putč ni pry čym. Savok lasnuŭsia tamu, što Šuškievič, Kraŭčuk i Jelcyn byli ŭ dušy (jak heta vyśvietliłasia paźniej) sacyjał-demakratami.
Palityčnaja kultura našaj sacyjał-demakratyi zahadkava schilnaja da niematyvavanych kanfrantacyj i kanfliktaŭ. Voś i ŭ subotu: nie paśpieŭ pačacca forum, jak tav.Šuškievič začytaŭ notu pratestu suprać praniknieńnia na kanferencyju prajdziśvietaŭ, jakija prykryvajucca partkvitkami jaho BSDH. Paśla čaho jon efektna pakinuŭ zalu.
Jak i tre było čakać, levaj Antanty nie atrymałasia. Za adsutnaściu Šuškieviča, forum źvioŭsia da dziažurnaj kanstatacyi roznahałośsiaŭ pamiž dźviuma frakcyjami biełaruskich levacentrystaŭ. Partyja pracy, BSDH i PKB musolili tezys, što rašeńnie sacyjalnych prablemaŭ mahčymaje vyklučna ŭ farmacie ahulnademakratyčnych reformaŭ. Asabliva paciešyŭ Kalakin, jaki abviaściŭ, što PKB — partyja levacentrystaŭ. I ty, Brut, pradaŭsia Ebertu!
Statkievič pryarmianiŭ sacyjalnaje pytańnie da hieapalityki: jak uvojdziem u EZ — nam abłomicca sacyjalizm.
Na furšecie paśla treciaj u hałavu mnie razam z hradusam stuknuła eŭryka. Škada, što ŭ našych levych partyjach nia ŭviedzieny post «čałavieka z narodu». Niejki suhramadzianin ź nizoŭ, jaki zmoh by testavać usie akcyi na pradmiet patrebaŭ praletaryjatu. Voś balšaviki, kali jechali zaklučać Bieraściejski mir, nie zabylisia prychapić na platformie Alaksandraŭskaha vakzału niejkaha bamža jak emanacyju pracoŭnych masaŭ. Padčas pieramovaŭ ź niemcami jon siadzieŭ, žraŭ chalaŭnuju harełku i ŭvažliva hladzieŭ, kab Trocki niečaha nie napartačyŭ.
Kab taki Šarykaŭ prysutničaŭ na forumie, jon by adrazu pakłaŭ kaniec biessensoŭnym razmovam nakont abjanańnia. Narodu heta niezrazumieła i nie patrebna.
Naša sacyjał-demakratyčnaja elita nahadvaje ekipaž «Baŭnci» — miaciežnaha karabla, jaki doŭhi čas błukaŭ pa prastorach Cichaha akijanu. U vyniku vajažu matrosy nastolki abrydli adzin adnamu, što pačałasia panažoŭščyna. Toj samy psychalahičny efekt nazirajecca i na levacentrysckim flanhu, tolki zamiest kinžałaŭ i mačete ŭ chod iduć rezalucyi i demaršy.
U takoj sytuacyi levyja pavinny brać prykład z pravych. Pahladziecie na BNF. Jaho tvar usio bolš vyznačajuć «zialonyja» kštałtu Michaleviča-Janukieviča i Lalkova. U toj ža čas maładyja «ružovyja» — što tyja miltany pry dvary Hienrycha IV. Šuškievič, Statkievič i Buchvostaŭ, dajcie maładym na try dni mandat kiraŭnikoŭ, i ŭžo praz paŭhadziny jany buduć pić šampanskaje za novuju «Adzinuju Biełaruskuju Sacyjał-Demakratyju». Usich prablemaŭ.
Lolik Uškin
