U čaćviorty raz biełaruskija muzyki paŭdzielničali ŭ mižnarodnym konkursie vykanaŭcaŭ-amataraŭ na XIV festyvali «Noc Bluesowa» ŭ polskim horadzie Rava Mazaviecka. I druhi hod zapar nie zastalisia biez uznaharod: maładziutki hitaryst i vakalist Alaksandar Bondaraŭ z Homielu zdabyŭ specyjalny pryz žury.
Hetym razam biełaruskaja delehacyja składałasia z kankursantaŭ — duetu «1 bluz 1» i haściej — znanaj hrupy «Mojo Blues», uzmocnienaj lideram hrupy «Svet Boogie Band» Śviatasłavam Chadanovičam.
U konkursie ŭdzielničali 10 kamand z Polščy, Čechii, Vuhorščyny, Słavaččyny, Niamieččyny j Biełarusi. Pry hetym biełarusam daviałosia na chadu mianiać skład: zamiest adnaho z udzielnikaŭ duetu musiŭ ihrać nastaŭnik praktyčna ŭsich homielskich bluzmenaŭ hitaryst Alaksandar Cyhanok. Alaksandar Bondaraŭ — adzin ź jahonych vučniaŭ, jakomu jašče nia spoŭniłasia 17 hadoŭ. Adnak staić jon u bluzie tryvała i hruntoŭna, zajmajučysia vykanańniem pieravažna karennaha repertuaru z delty Misysypi. Niahledziačy na biezumoŭnuju maładość i adsutnaść u bijahrafii niejkich uzrušeńniaŭ, jakija j dazvalajuć pieratvaryć bluzavaje vykazvańnie ŭ svojeasablivy manaloh pra los i pra siabie, jon vydatna adčuvaje specyfiku hetaj muzyki, jaje ŭnutrany śviet, maje dobraje adčuvańnie stylu. Śpiavaje, vykarystoŭvaje słajd i, što najbolš istotna, litaralna žyvie hetaj muzykaj. Usio heta ŭ sukupnaści i pradyktavała vybar mižnarodnaha žury, jakoje adzin z dvuch specyjalnych pryzoŭ i prysudziła budučyni biełaruskaha bluzu. A miascovaja FM-stancyja «RSC» adaryła jašče i navaročanaj mahnitołaj.
Poŭny varyjant artukułu čytajcie ŭ hazecie "Naša Niva"
Dźmitry Padbiareski
