Budsłaŭski kaścioł maje status Nacyjanalnaha sanktuaryju Biełarusi. Miastečka na Miadzielščynie maje značeńnie, paraŭnalnaje z Vostraj Bramaj u Vilni ci Čanstachovaj u Polščy. Fest u Budsłavie pravodzicca štohod 2 lipienia ŭ honar abraza Božaj Maci. Sioleta adznačałasia 500-hodździe kaściołu. Jak zaŭždy, u Budsłaŭ išli piešyja pilihrymki z usich kutkoŭ Biełarusi. Z adnaho Bieraścia vyjšła 400 čałaviek. Jechali j na dyzelach, mašynach, rovarami. Šlach ad stancyi Budsłaŭ da miastečka idzie praz Paleśsie. Takuju nazvu maje viosačka, paŭź jakuju prajšli šmatlikija vierniki, čyja piešaja pilihrymka składała čatyry kilametry ad čyhunačnaj stancyi da śviatyni.
Paśla biednaj viosački ŭražvaje hmach kaściołu, kirmaš ź vielizarnym natoŭpam śviatočna apranutych ludziej, mastacki plener.
Dziŭna, ale na kirmašy najbolš prykmietnymi byli pravasłaŭnyja šapiki, dzie išoŭ handal i zbor srodkaŭ na chramy dy pravasłaŭnuju adukacyju. Zatoje na nabaženstvach pravasłaŭnaja carkva prykmietnaja nie była.
Śviatkavać pa tradycyi pačali 1 lipienia. U śviatočnaj imšy ŭziali ŭdzieł, akramia kardynała Śviontka, bolš za 100 śviataroŭ z usioj Biełarusi, u tym liku ŭnijaty. Prysutničali pradstaŭniki miascovych uładaŭ, ale nie było nikoha z uładaŭ nacyjanalnych, navat kiraŭnika kamitetu pa relihijach i nacyjanalnaściach. Ksiondz, što vioŭ imšu, zaklikaŭ katalikoŭ i pravasłaŭnych žyć jak braty, jak kaścioł i carkva, što stajać u kožnym miastečku razam i hladziać adno na adnaho jak brat i siastra. Ale vučeńnie Lutara nazvaŭ jeraśsiu, u spynieńni raspaŭsiudu jakoj značnuju rolu adyhraŭ Budsłaŭ. Karani teraryzmu, alkahalizmu, narkamanii vyvieŭ z ateizmu. Malilisia za Biełaruś, kaścioł i ŭłady Biełarusi.
Jak zvyčajna na Budsłaŭski fest, usio nabaženstva jšoŭ doždž, ale pieraškodzić jon nia moh. Tolki šerahi śviataroŭ u biełym z zołatam adzieńni byli padkreślenyja čornymi parasonami. Busła, jaki pralacieŭ nad kaściołam padčas imšy, usie ŭspryniali jak dobry znak.
Pry takoj kolkaści ludziej nie było šturchaniny i vialikaha śmiećcia. Zusim nie było pjanych, chacia pracavali kaviarni na ŭsiu moc. Čyhunka taksama pavinšavała katalikoŭ, puściŭšy dadatkovy dyzel, zručny dla pilihrymaŭ. A viaskovaja babka, jakaja pry pasadcy ŭ dyzel abaviazkova chacieła «vahon z kabinetam», vyklikała dadatkovyja dobryja ŭśmieški na tvarach.
Ihar Łasica
