Partyja źjadnałasia vakoł adnaje mety — pieramahčy Buša
Demakratyčnaja partyja prademanstravała na kanvencie niezvyčajnuju zhurtavanaść svaich partyjnych šerahaŭ. Partyja źjadnałasia vakoł adnaje mety — pieramahčy Buša.
Dapamahać u hetym musili «veterany» — takija, jak Albert Hor, Džymi Karter i, viadoma, ulubioniec publiki Bił Klintan z žonkaj-senatarkaj Chiłary. Padtrymka starejšych demakrataŭ musiła nadać imidžu Džona Kiery bolej samavitaści. A pra toje, što šancy na pieramohu 60-hadovaha veterana vijetnamskaje vajny varta razhladać surjozna, śviedčać sacyjalahičnyja apytańni, pavodle jakich padtrymka Džona Kiery na ciapierašni momant roŭnaja albo navat pieraŭzychodzić kolkaść prychilnikaŭ Buša. Praŭda, ciapierašni haspadar Avalnaha kabinetu Buš svaju pieradvybarnuju kampaniju jašče tolki pačynaje. Uśviedamlajučy, što jaho čakaje niaprostaja praca, Buš navat skaraciŭ svoj adpačynak na ranča ŭ Techasie.
Miž tym, da vybaraŭ zastałosia ŭsiaho try miesiacy. My jašče staniem śviedkami šmat jakich jaskravych palityčnych šoŭ i hučnych zajaŭ. Ale ž samaje cikavaje — što abiacaje Amerycy i śvietu pieravybrańnie ciapierašniaha albo vybrańnie novaha prezydenta. Dla taho kab adkazać na hetaje pytańnie, zirniem na adroźnieńni ŭ padychodach kandydataŭ da pytańniaŭ zamiežnaje palityki i ekanomiki.
Samaja sprečnaja spadčyna prezydenctva Buša — raskoł pamiž Amerykaj i «staroj Eŭropaj» u irackim pytańni, što daje Bušavamu apanentu šmat padstaŭ dla krytyki. Viadoma, tezys demakrataŭ pra «izalacyju Ameryki» moža być značnym pierabolšańniem, dyj adkaznaść za raskoł u značnaj miery niasuć pa-papuliscku nastrojenyja Bušavy apanenty ŭ Eŭropie. Ale ž zrazumieła, što z prezydentam Kiery, jaki da taho ž vydatna razmaŭlaje pa-francusku, adnosiny Ameryki z tradycyjnymi sajuźnikami ŭ Eŭropie mahli b palepšycca.
Z druhoha boku, samaje nadzionnaje pytańnie — sytuacyja ŭ Iraku — nie pakidaje dla Džona Kiery nadta šmat prastory dla palityčnaha maneŭru. Raniejšyja prapanovy demakrataŭ pra bolš ciesnaje supracoŭnictva z takimi mižnarodnymi strukturami, jak AAN i NATO, Buš užo pačaŭ vykonvać sam.
Adsutnaść jasnaje mižnarodnaje stratehii zaŭsiody była słabym miescam demakrataŭ. Tak, abiacańnie Kiery nia vieści sumnieŭnych vojnaŭ hučyć nia nadta praŭdapadobna, bo sam senatar hałasavaŭ za vajnu ŭ Iraku. A abvieščany demakratami pryjarytetnym multylateralizm (aryjentacyja na sumiesnyja dziejańni mižnarodnaje supolnaści) naŭrad ci moža być palityčnaj samametaj. Dyj profil Buša ŭ zmahańni z teraryzmam pakul što vyhladaje bolš pierakanaŭča. Tak ci inakš, pytańnie miesca Ameryki ŭ śviecie chutčej za ŭsio budzie nieści bolej emacyjnuju, čym racyjanalnuju nahruzku. Bo, zvažajučy na adkryta prapahandysckija vypady nakštałt sprečnaha filmu Majkła Mura «11.09 pavodle Farenhiejta», čakać ad kandydataŭ i ich daradcaŭ abjektyŭnych debataŭ pa hetym pytańni naŭrad ci vypadaje. A padychod jakoha kandydata ŭrešcie pieramoža, budzie zaležać ad samich padziej u vajnie z teraryzmam i ŭ Iraku dy, u pryvatnaści, ad taho, ci ŭdasca novamu ŭradu Iraku za try miesiacy, što zastalisia, minimizavać terarystyčnyja napady i tym samym skaracić straty siarod amerykanskich sałdat.
U druhim važnym pytańni — ekanomicy — Bušaŭ darobak vyhladaje bolš hruntoŭnym. Paśla roskvitu 90-ch hadoŭ haspadarka Złučanych Štataŭ trapiła ŭ 2000—2001 hadach u recesiju, čamu paspryjali vybuch mylnaj burbałki na rynkach akcyj dy šok paśla napadu 11 vieraśnia. Kab ažyvić ekanomiku, Bušava administracyja inicyjavała istotnaje źnižeńnie padatkaŭ dla hramadzian, firmaŭ i ŭładalnikaŭ kaštoŭnych papier. Akramia taho, amerykanski centralny bank radykalna źniziŭ pracentnuju staŭku da niečuvana nizkaha ŭzroŭniu — 1%, tym samym pavialičvajučy likvidnaść i aktyvizujučy investycyi ŭ ekanomiku.
Hetkija reanimacyjnyja miery mieli nieabyjaki efekt — amerykanskaja ekanomika znoŭ pačała raści, a kolkaść navastvoranych pracoŭnych miescaŭ užo dasiahnuła 1,5 miljona. Praŭda, cana, jakuju daviałosia zapłacić za ažyŭleńnie ekanomiki, — vielizarny deficyt biudžetu ŭ vyniku źnižeńnia pastupleńniaŭ ad padatkaŭ, a taksama praz rost vajennych vydatkaŭ.
Poŭnaściu hety artykuł možna pračytać u papiarovaj i pdf-versii "Našaj Nivy"
Siaržuk Vinahradaŭ
