U 2004/05 navučalnym hodzie ŭ troch mienskich škołach źjaviacca polskamoŭnyja klasy. Dola biełaruskamoŭnych školnikaŭ padaje ŭžo dziesiać hadoŭ.
Sioleta školniki našaj krainy buduć vučycca na šaści movach — biełaruskaj, rasiejskaj, polskaj, habrejskaj, ukrainskaj, litoŭskaj. Pakul što čynoŭniki Minadukacyi nia mohuć dać ani dakładnych, ani prybliznych ličbaŭ nakont padziełu vučniaŭ i škołaŭ pavodle moŭnaj prymiety, kažuć, što ŭsio budzie viadoma tolki pry kancy vieraśnia. Pakul ža jość źviestki tolki pa 2003/04 navučalnym hodzie. Zrešty, i jany dosyć krasamoŭnyja. Biełaruskamoŭnych školnikaŭ usio mienš, i nivodnamu z papiarednich ministraŭ adukacyi nie chapiła voli ci fantazii, kab hetuju tendencyju pierałamić.
Pa stanie na 2003/04 navučalny hod u 2503 ahulnaadukacyjnych škołach i škołach-internatach, pieravažna drobnych i viaskovych (59,5% ad ich ahulnaj kolkaści) navučańnie viałosia na biełaruskaj movie, u 1337 škołach, pieravažna haradzkich i bujnych (31,8%) — na rasiejskaj, u 366 škołach (8,7%) — na dźviuch movach: rasiejskaj i biełaruskaj.
U 186 škołach vykładańnie viałosia na movach nacyjanalnych mianšyniaŭ Biełarusi: 182 z polskaj movaj, 2 ź litoŭskaj i pa 1 — z ukrainskaj i habrejskaj. Pryčym nivodnaj škoły nacmianšyniaŭ niama ŭ Mahiloŭskaj i Mienskaj abłaściach.
Adam Voršyč
