Z Rasiei pryjšła sumnaja viestka — u noč na 5 kastryčnika pamior, nie dažyŭšy paŭtara miesiaca da 80-hadovaha jubileju, znany archieolah, akademik Rasiejskaj akademii navuk Valancin Vasilevič Siadoŭ.
Usie, chto cikaviacca staražytnaj historyjaj našaha narodu, viedajuć V.Siadova jak aŭtara teoryi pra vyznačalnuju rolu bałckaha substratu ŭ etnahienezie biełarusaŭ. Zhodna z hetaj teoryjaj, usie tyja asablivaści antrapalahičnaha typu, etničnaj kultury i movy biełarusaŭ, jakija adroźnivajuć ich ad inšych słavianskich narodaŭ, skłalisia ŭ vyniku asymilacyi bałckich plamionaŭ, jakija pražyvali na terytoryi našaj krainy da źjaŭleńnia tut słavian. Mienavita za hetuju teoryju kaliści sumna viadomy Łaŭren Abecedarski ŭ svaich lekcyjach u BDU zhadvaŭ V.Siadova razam z «buržuazna-nacyjanalistyčnymi falsyfikatarami historyi Biełarusi».
Tahačasnych praciŭnikaŭ Siadova šakavali jak jaho spasyłki na publikacyi Janki Stankieviča dy inšych zabaronienych u BSSR navukoŭcaŭ, tak i toje, što maskoŭski daśledčyk razhladaŭ etnahienez biełaruskaj narodnaści faktyčna ŭ etničnych miežach pavodle Jaŭchima Karskaha. Rušyłasia aficyjnaja kancepcyja, zhodna ź jakoj asnoŭnyja asablivaści biełarusaŭ skłalisia nie ŭ plemianny jašče peryjad, a značna paźniej, kali našy prodki byli «adarvanyja ad uschodnich bratoŭ i znachodzilisia pad pryhniotam polska-litoŭskich feadałaŭ».
Ź jahonaj śmierciu archiealahičnaja navuka sapraŭdy straciła vielmi šmat.
Edvard Zajkoŭski
