Tak, z 1 studzienia pačała dziejničać pastanova Savietu ministraŭ №1579, jakaja ŭvodzić minimalnuju zarpłatu z 1 studzienia ŭ pamiery 128 860 rubloŭ.
U rečyščy zachadaŭ pa ŭzmacnieńni sacyjalnych harantyj było zaćvierdžana j Pałažeńnie ab paradku ŭviadzieńnia źnižak i nadbavak da strachavych taryfaŭ pa abaviazkovym strachavańni ad niaščasnych vypadkaŭ na vytvorčaści j prafesijnych zachvorvańniaŭ (pastanova Saŭminu №1591). Spadarožničaje jamu pastanova №1650 «Ab zaćviardžeńni na 2005 hod pamieraŭ adličeńniaŭ u specyjalny strachavy rezerv i fond papiarednich (preventyŭnych) mierapryjemstvaŭ pa abaviazkovym strachavańni ad niaščasnych vypadkaŭ na vytvorčaści dy prafesijnych zachvorvańniaŭ» (adličvacca musić adpaviedna 89% i 5%).
Dla rabotnikaŭ dziaržaŭnych pradpryjemstvaŭ pavinny być cikavymi navahodnija pamiery pakryćcia vydatkaŭ pry słužbovych kamandziroŭkach (z 1 studzienia sutačnyja składajuć 10 000 rub., sutačnyja pry adnadzionnych słužbovych kamandziroŭkach i kamandziroŭkach u takuju miascovaść, adkul jość mažlivaść štodzionna viartacca da miesca pastajannaha žycharstva, — 5 000 rub., kampensacyja raschodaŭ pa najmie žyłoha pamiaškańnia biez pradjaŭleńnia paćviardžalnych dakumentaŭ — 3 000 rub.).
Pačynaje dziejničać i — «Instrukcyja ab paradku vypłaty hrašovaj kampensacyi siemjam pry naradžeńni bliźniat». Z 1 studzienia na 50% pavialičvajecca taksama pamier adnarazovaje dapapohi pry naradžeńni treciaha j nastupnych dziaciej. Jana maje składać blizu 408 000 rub.
Ź pieršaha studzienia narešcie nabyvaje zakonnuju siłu rasparadžeńnie Ministerstva infarmacyi ab pavieličeńni ŭ radyjoetery abjomu ajčynnaj muzyki da 75%. Pra apošniaje było napisana letaś tak šmat i z roznych bakoŭ, što niama sensu pakidać niejkija admysłovyja kamentary. Chočacca tolki vykazać spadzieŭ, što nadalej hetaja biezumoŭna pazytyŭnaja naveła nia budzie ŭstupać u kalizii z navat nie padzakonnymi, a prosta-taki niezakonnymi aktami, jakija ŭvodziać śpisy «niapravilnych ajčynnych muzykaŭ». Nie zabudźsia vyklučyć pras, biełarusie!
Poŭny varyjant artukułu čytajcie ŭ papiarovaj i pdf-versii haety "Naša Niva"
Uładzisłaŭ Biełavusaŭ i Kirył Kaścian
Aŭtary ahladu — analityki internet-časopisu jurystaŭ i palitolahaŭ «Praŭnik» (praunik.org).
