U časopisie «Managing Offshore» (managingoffshore.com) nadrukavany rejtynh najbujniejšych ekspartna aryjentavanych kampanij śvietu, jakija zajmajucca infarmacyjnymi technalohijami. U jaho trapili dźvie biełaruskija kamputarnyja firmy — «EPAM Systems» (epam.by) i «International Business Alliance» (iba.by).U dziasiatcy najlepšych raspracoŭščykaŭ specyjalizavanaha prahramnaha zabieśpiačeńnia hetyja kampanii zaniali adpaviedna treciaje i siomaje miescy, a ŭ piaciorcy najlepšych kampanij Centralnaj i Ŭschodniaj Eŭropy — pieršaje i druhoje miesca. Dla vyznačeńnia rejtynhu aceńvalisia klijentura kampanij, jakaść pasłuh, kadravaja palityka.
Cikava, što «EPAM Systems» paznačana ŭ rejtynhu jak amerykanskaja kampanija. Adnak pieravažnaja kolkaść z bolš jak tysiačy specyjalistaŭ firmy pracujuć u ofisach «EPAM» na vulicy Charužaj u Miensku, a taksama ŭ Horadni i Homieli.
Prezydent kampanii — kolišni vypusknik BNTU Arkadź Dobkin, jaki nieŭzabavie pa raspadzie SSSR vyjechaŭ u ZŠA, dzie i zasnavaŭ «EPAM Systems».
Letaś jana była adzinaj kampanijaj z Centralnaj i Ŭschodniaj Eŭropy, jakaja ŭvajšła ŭ top-500 softvernych kampanij (355 miesca) časopisu «Software Magazine». Asnoŭnym pakaźnikam pry vyznačeńni hetaha rejtynhu źjaŭlajecca hadavy dachod kampanij.
Siarod klijentaŭ «EPAMu» — suśvietnyja lidery rynku ŭ svaich halinach «SAP», «Microsoft», «Compaq», «Reuters», hihant telekamunikacyjaŭ «British Telecom»; «Procter & Gamble»; Londanskaja fondavaja birža i rasiejski Centrabank; RAT «JEES Rasiei» dy «Rosenerhaatam». Partnery «EPAMu» pa navukovych i prykładnych daśledavańniach — BDU, BNTU, Akademija navuk Biełarusi i niamiecki Manhajmski ŭniversytet.
«IBA» — laŭreat premijaŭ uradu Biełarusi «Jakaść-1999» i «Jakaść-2002». Kampanija była zarehistravanaja ŭ pačatku 1993 hodu jak sumiesnaje pradpryjemstva, zasnavalnikami jakoha vystupili karparacyja «IBM» dy niekalki biełaruskich arhanizacyj. Na čas zasnavańnia ŭ kampanii było kala dziasiatka specyjalistaŭ, ciapier ich bolš za tysiaču.
Biełarusy pryvykli hanarycca svaimi zavodami-hihantami ordena Lenina imia partźjezdu. Ciapier ža najbolš viadomymi ŭ śviecie biełaruskimi pradpryjemstvami akazvajucca kampanii, jakija zajmajucca kamputarnym prahramavańniem. Hihanty našaha mašynabudavańnia vypuskajuć pradukcyju, jakaja kankurentazdolnaja tolki na rynkach treciaha śvietu, u tym liku Rasiei. Infarmacyjnyja ž technalohii — heta supersučasnaja sfera, i biełarusy ŭ ich nie adstajuć ad kankurentaŭ ź Indyi i Irlandyi.
U pradukcyi IT-kampanij najbolšaja dabaŭlenaja vartaść. Hetyja firmy ščylna supracoŭničajuć ź biełaruskimi VNU — mnohija specyjalisty vykładajuć uva ŭniversytetach, takim čynam rychtujučy sabie kadravyja rezervy. Talenavityja studenty dałučajucca da realnych prajektaŭ, pačynajučy z druhoha kursu.
IT-kampanii zabiaśpiečvajuć svaim supracoŭnikam najvyšejšy ŭ Biełarusi ŭzrovień žyćcia. Nizkaja materyjała- i enerhajomistaść ichnaha praduktu taksama roźnić ich ad hihantaŭ savieckaha času, całkam zaležnych ad rasiejskich stali i hazu. U suśvietny top-100 uvachodziać nia prosta dobryja kampanii. Za imi budučynia biełaruskaj haspadarki.
Aleś Piatkievič
