Vysnova z kijeŭskich padziej ad Biełarusi da Kazachstanu adna: dušyć u zarodku. Apazycyi ŭ hetych krainach davodzicca rychtavacca da ciažkich časoŭ. Ale historyi nia spyniš. Nia spynić jaje ni Łukašenka, ni navat Czian Czemiń.
«Aranžavaja revalucyja» va Ŭkrainie pakazała, što i sacyjalnyja pierałomy dapasoŭvajuć svajo abličča da času. U adroźnieńnie ad kolišnich zmaharoŭ z «Salidarnaści», kijeŭskija revalucyjanery ni na sekundu nie zastavalisia sam-nasam z režymam. Złučanyja ŭ adzinuju sietku telekamunikacyjami i padtrymlivanyja zamiežnymi pijar-kansultantami, jany raschistali ŭładu Kučmy.
Infarmacyja ŭ luby čas i ŭ lubym miescy
Aktyvisty «Salidarnaści» byli ŭ mižnarodnaj izalacyi i musili pieraadolvać niečuvanyja kamunikacyjnyja prablemy, u toj čas jak siońniašnija revalucyjanery — ci to ŭ Białhradzie, ci ŭ Tbilisi, ci ŭ Kijevie — vykarystoŭvajuć najsučaśniejšyja srodki kamunikacyi, ličać Internet i mabilnuju suviaź hetkimi ž samo saboj zrazumiełymi rečami, jak kseraks ci faks, i atrymlivajuć mahutnuju padtrymku z Zachadu. Techničnaj ikonaj zmahańnia suprać Jaruzelskaha i jaho tavaryšaŭ byŭ kapijavalny aparat, padryŭny alkaholny pach jakoha ačmuraŭ prahresiŭnaje pakaleńnie taksama j na Zachadzie. U astatnim revalucyjaneram była dastupnaja tolki systema raspaŭsiudu «z vusnaŭ u vusny» dy stacyjanarny telefon. Pakul instrukcyi z prafsajuznaha kaardynacyjnaha centru dachodzili da šarahovych aktyvistaŭ, mahło prajści vielmi šmat času.
Tym časam kali ŭ listapadzie štości zdarałasia ŭ Daniecku, u Kijevie heta viedali ŭžo praz sekundy. Na tradycyjnyja ŚMI pry hetym mała zvažali. Paśla zabojstva žurnalista Hieorhija Hanhadze Internet staŭ dla ŭkrainskaj moładzi symbalem niepadkupnaści. Kantralavanyja ŭradam hazety, jakija tady biessaromna chłusili, da siońnia zastajucca dyskredytavanymi. Praŭdu šukajuć u virtualnaj prastory.
Ideja nadać revalucyi koler, jak praduktu, akazałasia niejmavierna paśpiachovaj. Va Ŭkrainie my ŭbačyli pieršuju «Corporate Revolution». Dastatkova było šalika, kab pakazać jazyk karumpavanamu režymu. Toj, chto nasiŭ aranžavaje, byŭ svaim, revalucyjanery bačyli śviedčańni ŭłasnaj mocy na kožnym kroku, i ŭsio, što j dahetul było aranžavym, — lahatypy firmaŭ, aŭtobusy, uniforma darožnych rabotnikaŭ — mižvoli stała reklamaj. Sučasnaja revalucyja prezentuje siabie lohka i šykoŭna: padspudnaje dzikunstva kolišnich baradatych demanstrantaŭ sastupiła miesca stylovamu imidžu, i mała chto jašče biare ŭ ruki hitaru kala vohnišča ŭ lahiery.
Poŭny varyjant čytajcie ŭ papiarovaj i pdf-versii hazety "Naša Niva"
«Neue Zuercher Zeitung»
