Sapraŭdnym kankurentam Łukašenki budzie palityk, jaki znojdzie ŭ sabie mužnaść nie šukać narodnaj lubovi łukašenkaŭskimi metadami.
Fakt niadaŭniaha supracoŭnictva z režymam u hetym vypadku adydzie na druhi plan. Pradkazać, chto budzie «adzinym», składana. Ale vyłučeńnie Kazulina daje taktyčnyja pieravahi apazycyi. Redaktar časopisu «Arche» Valer Bułhakaŭ kamentuje biahučyja padziei.
«NN»: Nakolki niečakanym dla Vas było dałučeńnie A.Kazulina da abjadnanych sacyjał-demakrataŭ i faktyčnaje vyłučeńnie jaho ad hetaj palityčnaj struktury u kandydaty ŭ prezydenty ad demsił?
Valer Bułhakaŭ: Heta sapraŭdy niespadziavanka. Z hetym vyłučeńniem pieradvybarny landšaft u Biełarusi istotna prajaŭlajecca. Možna kazać, što biełaruskaja apazycyja maje dvuch lideraŭ — Alesia Milinkieviča i Alaksandra Kazulina, jakija zdolny vyjści ŭ finalnuju stadyju pieradvybarnaj honki.
«NN»: Čamu mienavita Kazulin? Dosyć skandalnaja fihura, na dumku niekatorych…
VB: Jon vałodaje ŭnikalnymi palityčnymi resursami. Pa-pieršaje, Kazulin maje peŭnyja suviazi z nacyjanalna śviadomym asiarodździem. Nacyjanalny momant vielmi vyražany ŭ jahonym zvarocie da biełaruskaha narodu padčas zakliku stvarać ruch «Vola narodu». Pa-druhoje, jon maje dosyć niepradkazalnyja suviazi z Rasiejaj. U hetaj kandydatury skancentravana prajaŭlajecca niezdavolenaść Kramla Łukašenkavaj niezhavorlivaściu. Pa-treciaje, jon maje mocnyja suviazi ź biełaruskaj namenklaturaj, a taksama vychady na siłavych čynoŭnikaŭ. Pa-čaćviortaje, jon ciažej paddajecca demanizacyi srodkami aficyjnaj prapahandy jak ahient zachodniaha ŭpłyvu. Hetyja rečy robiać Kazulina favarytam apazycyjnaj kampanii.
Varta adznačyć, što zvarot da biełaruskaha narodu vielmi prafesijna składzieny. Jaho padpisali ludzi samych roznych sacyjalnych słajoŭ. Važna, što Kazulin užo ciapier zaručyŭsia padtrymkaj Natalli Mašeravaj, što dazvalaje jamu raźličvać na vializny elektaralny resurs (15—20% hałasoŭ i bolej).
«NN»: Pra što śviedčyć vyłučeńnie Kazulina?
VB: Nieviadoma, ci pojdzie jon da kanca, nakolki hety kandydat techničny. Z dośviedu minułych hadoŭ viadoma, jak žorstka raspraŭlajecca Łukašenka z kandydatami, jakija vyjšli z namenklatury. Vyłučeńnie Kazulina, kali jano nie było inśpiravana łukašenkaŭskimi palittechnolahami, pakazvaje, što namenklatura da kanca nie baicca Łukašenki. Niezdavolenyja koły namenklatury vyłučajuć sa svaich šerahaŭ adnaho za adnym palityčnych lideraŭ: byli Čyhir, Hančaryk, Marynič, ciapier Kazulin.
«NN»: Dniami Łukašenka na naradzie pa pytańniach baraćby z karupcyjaj zajaviŭ, što apazycyja ŭzdymaje na ščyt niahodnikaŭ, jakija prakralisia. U jakoj miery heta datyčyć Kazulina?
VB: Napeŭna, datyčyć. Była sproba kryminalnaha pieraśledu… Takaja histeryčnaja reakcyja prezydenta daje padstavy mierkavać, što za Kazulinym sapraŭdy prahladajecca rasiejski śled. Palityčnaja hulnia Rasiei śviedčyć, što Maskva pakul nie daje Łukašenku kart-blanš na pieramohu ŭ prezydenckich vybarach i budzie ŭsialak šturchać aficyjny Miensk da vykanańnia pryvatyzacyjnych planaŭ jašče čatyrochhadovaj daŭniny. Sapraŭdny prarasiejski kandydat maje raspłačvacca biełaruskaj majomaściu za padtrymku, adnaho nasadžeńnia rasiejskaj movy ciapier mała. Darečy, demakratam bajacca pierachodu biełaruskaj naftahazachimii pad rasiejski kantrol nia varta. Rasiejski kapitał u hetym planie značna bolš damohsia na Ŭkrainie, što tolki paskoryła kaniec Kučmy i prychod Juščanki da ŭłady.
«NN»: Takim čynam, užo dziasiatak palitykaŭ zajavili pra svaje prezydenckija ambicyi. Chto, pa-Vašamu, maje najbolšyja šancy stać adzinym demakratyčnym kandydatam?
VB: Pradkazać, chto budzie adzinym, uličvajučy dośvied 2001 hodu, składana. Kali paŭtorycca scenar 2001 hodu, u finał vybaraŭ vyjduć dva kandydaty ad demsiłaŭ. Pieršy budzie prezentavać hramadzianskuju supolnaść jak takuju. Heta budzie partyjny lider ci pradstaŭnik treciaha sektaru, naprykład, Milinkievič. Intryha ŭ tym, ci dojdzie da vybaraŭ reinkarnacyja palityka nakštałt Hančaryka — čałaviek z mocnymi namenklaturnymi suviaziami. Kali robicca staŭka na paśpiachovuju baraćbu, miarkujecca, što kandydat pavinien być svaim dla dziaržaparatu.
«NN»: Takim čynam, kandydatam ad hramadzianskaj supolnaści Vy bačycie Alaksandra Milinkieviča?
VB: Nia čas zajmacca futuralohijaj, ale jość peŭnyja znaki, što hety palityk zdolny zaručycca padtrymkaj šyrokich demakratyčnych kołaŭ. Słabaść Milinkieviča ŭ jahonaj małaviadomaści jak publičnaha palityka i amorfnaści jaho palityčnaj prahramy.
Poŭny varyjant čytajcie ŭ papiarovaj i pdf-versii hazety "Naša Niva"
Hutaryŭ Arciom Lava
