Kino nie dla BT: instrukcyja pa karystańni
Anansavany «NN» film «Horad Boha» byŭ u subotu źniaty z efiru — jak zabaronieny dla raspaŭsiudu ŭ Biełarusi. Matyvacyja: u karcinie detalna pakazany praces hatavańnia j spažyvańnia narkotykaŭ. Miž tym karcina była naminavanaja na kinafestyvalach. Heta nie adziny film, zabaronieny da pakazu ŭ Biełarusi.
Usiaho ŭ śpisie Respublikanskaj ekspertnaj kamisii pa praduchileńni raspaŭsiudžvańnia parnahrafii (REK) 61 film: žachi, sacyjalnyja dramy, krychu erotyki. Trapiła tudy i karcina «Hitler. Uzychodžańnie zła». «My nie zabaraniajem filmy pa palityčnych matyvach, — kaža Nina Fralcova staršyńka REK. — «Hitlera» nie dapuścili da raspaŭsiudžvańnia ŭ Biełarusi praz antysemityzm, ź mierkavańniaŭ palitkarektnaści».
Śpis REK niapoŭny: dziaržrehistar moža nia dać filmu licenziju ci pazbavić jaje i biez zvarotu ŭ kamisiju — jak karcinie Andreja Kudzinienki «Akupacyja. Misteryi». Andrej Rasinski pradstaŭlaje čytačam «NN» (najpierš — baćkam) dziasiatku samych zabaronienych filmaŭ.
«Hitler. Uzychodžańnie zła»
ZŠA, 2003, rež. Kryścijan Duhiej.
Pra što: Histaryčnaja drama pra toje, jak vyśpiavaje zło. Hitler Roberta Karłajła — heta parazyt, jaki vykarystoŭvaje čałaviečyja zahany, siłkujecca čałaviečymi słabaściami, spažyvaje čužy žal i kachańnie — i lezie da ŭłady. Mechanizmy tatalitarnaha zła nastolki vidavočnyja, a sposaby supraćdziejańnia nastolki dastupnyja, što zabarona karciny dziŭnaj nie padajecca.
Kamu hladzieć, a kamu nie: Usim kiraŭnikam partyj i «prostym ludziam», jakija ŭpeŭnieny, što ad ich ničoha nie zaležyć. Film nielha hladzieć vysokim asobam, bo lusterki nia kožnamu padabajucca.
Dzie znajści: Karcina ŭ Biełarusi raspaŭsiudžvałasia na DVD i SD. Pytajciesia ŭ pryvatnych handlaroŭ i ŭ Internecie.
«Apramietnaja kanibałaŭ»
Italija, 1980, rež. Rudžera Deadata.
«Kanibały»
Italija, 1981, rež. Umberta Lency.
Pra što: 80-ja hady — roskvit klasyčnaha italjanskaha «kanibalskaha» kino. Karcina Rudžera Deadata stylizavana pad dakumentalnyja zdymki, kali antrapolahi-dakumentalisty źviarejuć u kampanii ź ludažerami — a kamera zdymaje da apošniaha momantu.
Kamu hladzieć, a kamu nie: Asobnym fanatam žachaŭ. Kateharyčna zabaroniena dzieciam, ciažarnym i padčas abiedu.
Dzie znajści: U 2001 h. filmy vypuściła rasiejskaja kampanija «Vikinh Videa». Možacie pasprabavać zamović. «Apramietnuju kanibałaŭ» možna skačać ź Internetu.
«Daberman»
Francyja, 1997, rež. Jan Koŭnen.
Pra što: Jašče ŭ lulcy dziciatku padaryli mahnum. Chłopčyk vyrastaje ŭ sapraŭdnaha hanhstera-dabermana. Videaklipna, nachabna, talenavita, pravakacyjna — chacia j krychu druhasna što da Tarancina.
Kamu hladzieć, a kamu nie: Amataram formy, jakim lepiej zabyć pra źmiest. Milicyjantam pierad sutyčkaj z bratkami — i naadvarot.
Dzie znajści: Raspaŭsiudžvałasia na videa. Možacie pašukać u pryvatnych kalekcyjach, u Internecie.
«Dzietki»
ZŠA, 1995, rež. Łary Kłark.
«Sadyst»
ZŠA, 2001, rež. Łary Kłark.
Pra što: Žorstkija sacyjalnyja dramy pra padletkaŭ.
Kamu hladzieć, a kamu nie: Amataram kino. Padletkam — z papieradžalnym kamentarom seksolaha. Sytym čynoŭnikam — kab žyćcio navokał sucelnym ščaściem nie zdavałasia.
Dzie znajści: U Internecie. U Rasiei karciny vychodzili na videa i DVD.
«Trameo i Džuljeta»
ZŠA, 1998, rež. Łojd Kaŭfman.
Pra što: Šekśpir u najbrutalniejšym vykanańni: sučasnaść, seks, kroŭ, žabractva — i najpahaniejšy hrym, što, jak śćviardžaje Kaŭfman, charakterna i dla pieršych pastanovak Šekśpira.
«Pryz hledačoŭ» na festyvali «Raidance». Pryz «Najlepšy film» na mižnarodnym kinafestyvali fentezi i navukovaj fantastyki ŭ Rymie.
Kamu hladzieć, a kamu nie: Kinahurmanam, amataram Šekśpira, stałym čytačam «Navinak». Astatnim nie rekamendujecca.
Dzie znajści: Rarytet. Pasprabujcie zamović praź Internet (kampanija «Karmen-videa», seryja «Druhoje kino»).
«Pakaleńnie hulni «Doom»
ZŠA, 1995, rež. Hreh Araki.
Pra što: Pieršy hieteraseksualny film Hreha Araki, niaŭrymślivaha avanhardysta j hieja. Da parački zakachanych Emi i Džordana dałučajecca treci — prychavanaje ŭvasableńnie djabła. Złačynstvy, adsiečanaja vanitujučaja hałava j najkašmarniejšy seks u finale. Za ekstremalnym siužetam chavajucca bol i kryk ab praklatym pakaleńni.
Kamu hladzieć, a kamu nie: Usim amataram kino, zdolnym vytrymać. Kateharyčna nielha maładziejšym za 18 hod.
Dzie znajści: Karcinu vydavała rasiejskaja kampanija-dystrybutar «Jekaciarynburh-Art».
«Niezvarotnaść»
Francyja, 2002, rež. Haspar Nae.
Pra što: Aleks pasvaryłasia sa svaim chłopcam i syšła ź viečarynki. U pustym pierachodzie jaje zhvałtavali. Chłopiec Aleks i jaje były muž znachodziać złačyncu — i zabivajuć.
Karcina Haspara Nae idzie ŭ advarotnym nakirunku — ad sceny zabojstva praź dzieviacichvilinnuju j šokavuju scenu hvałtavańnia da idylii i ščaścia.
Naminacyja na «Załatuju palmavuju halinu» Kanskaha kinafestyvalu.
Pryz za najlepšy film MKF u Stakholmie.
Kamu hladzieć, a kamu nie: Amataram kino z mocnymi nervami. Usim prychilnikam Moniki Belučy i Vensana Kasela. Niekatorym hledačam spatrebiłasia medyčnaja dapamoha.
Dzie znajści: U Biełarusi raspaŭsiudžvałasia na videa, jość i na CD.
«Žyvaja miarćviačyna»
Novaja Zelandyja, 1992, rež. Piter Džeksan.
Pra što: Klasyka postmadernisckaha gore («škumatańnika»). Śviatar z pryjomami kun-fu — suprać žyvych mierćviakoŭ, matuliny vušy ŭ supie, esesaviec-veterynar, hazonakasiłka dla naviaźlivych trupaŭ, kroŭ pa kalena — i ščaślivaje kachańnie z pacałunkam u finale.
Kamu hladzieć, a kamu nie: usim amataram kino z pačućciom humaru. Niaviestam u čakańni prynca. Esesaŭcam, niemaŭlatam i čynoŭnikam z kamitetaŭ hladzieć nie pažadana.
Dzie znajści: Karcina pradavałasia na DVD pad nazvaju «Mozh miortvy». Majecca jana i na CD. Pahladzicie i ŭ Siecivie.