Čamuści artykuł ab «praznaj» moładzi mianie začapiŭ. Moža, tamu što moj ład žyćcia dziesiać hod tamu, kali sama była studentkaj, padychodziŭ pad akreślenuju «praznaść»?
Ci tamu, što ź siońniašnimi «praznymi» davodzicca sustrakacca, naprykład, na kancertach «N.R.M.»? Vy viedajecie, spn.Teda Li, što jany tudy chodziać jak na dyskateku, kab «pakaŭbasicca» i «adarvacca»? I ja ich razumieju. U mianie raście trochhadovaja dačka, jakaja taksama lubić patančyć, asabliva pad «Zet» (ulubionyja pieśni — «Radzima — svaboda» i «Anioł»).
Adnojčy ja čuła, jak adzin chłapiec pytaŭsia ŭ druhoha, čamu na kancertach «N.R.M.» zaŭsiody razhortvajuć bieł-čyrvona-biełyja ściahi. Moža, nia treba ich rasstrelvać za heta? Chaj spačatku znojduć adkaz na svajo pytańnie. Pakul Volski ich vučyć, što «da» pa-biełarusku — «tak».
A ŭ Maskvu jany rvucca nie tamu, što ich «nie chvaluje kraina». Śviežy prykład — Natalla Padolskaja. Jak jana ich usich zrabiła! Niaŭžo vy nie hanaryciesia hetaj biełaruskaj dziaŭčynaj i znojdziecie słovy jaje vinavacić? U tym, što jana zanadta talenavitaja, pracavitaja i ŭpartaja? Mahčyma, niekali jana pryjedzie śpiavać na čarhovym šoŭ «Za Biełaruś», ale heta ŭžo budzie zusim inšaja historyja.
Prynamsi, ja b nie chacieła, kab mianie lačyŭ doktar, jaki b u studenckija hady zamiest biblijateki i «anatamički» chadziŭ na mitynhi.
I jašče cikava daviedacca ŭ Tedy Li, kali, na jaje dumku, čas sapraŭdnym biełaruskim junakam i dziaŭčatam ulublacca adno ŭ adnaho, kab, naprykład, stvaryć siamju, naradzić dzicia?
Adnojčy moj syn, kali jamu było prykładna piać hadoŭ, spytaŭ u mianie: «Mama, a čamu my žyviom u Biełarusi i nie havorym pa-biełarusku?» Nia pamiataju, što ja jamu tady adkazała, ale ciapier ja viedaju, dziela čaho mnie treba zmahacca, i viedaju, što ŭ hetaj baraćbie ja pajdu da kanca. U mianie jość mara — pakinuć dzieciam svabodnuju i biełaruskuju Biełaruś.
Iryna Čatyrka, Miensk
