Ceny na haz stanuć suśvietnymi
«Biełarusi treba być hatovaj da ŭsiaśvietnych cenaŭ na haz, niahledziačy na časovyja pahadnieńni z Rasiejaj, — zajaviŭ ahienctvu «Interfaks» Anatol Paŭłovič, jaki ŭznačalvaje ŭ pałacie pradstaŭnikoŭ kamisiju, što zajmajecca pytańniami pramysłovaści i enerhazabieśpiačeńnia. Paŭłovič skazaŭ, što jak tolki Rasieja dałučycca da Ŭsiaśvietnaj handlovaj arhanizacyi (a heta moža adbycca ŭ 2006-m), jana padymie ceny na haz dla Biełarusi da ŭsiaśvietnaha roŭniu.
Rekanstrukcyja rynkaŭ
U červieni raspačniecca rekanstrukcyja troch mienskich rynkaŭ — Červienskaha, Čyžoŭskaha dy Kurasoŭščynskaha. Tak, Červienski rynak pieratvorycca ŭ šopinh-centar, dzie pad adnym dacham buduć znachodzicca i handlovyja zali, i ofisy, i parkinh. Kaštavać madernizacyja budzie $30 młn, ale pierabudova nie pavinna prypynić pracy handlaroŭ.
Zasolim i pierasolim Rasieju
«Mazyrsol» pašyraje dylerskuju sietku ŭ Rasiei, dzie i pradaje bolšuju častku pradukcyi. Letaś u Rasieju pradali 173 tys. ton soli. Pradpryjemstva rychtujecca zavieści dyleraŭ u tych rehijonach Rasiei, da jakich biełaruskaja sol jašče nie dabrałasia, — na Dalokim Uschodzie i Poŭdni. U hetym vypadku pastaŭki mazyrskaj soli ŭ Rasieju pavysiacca da 190 tys. ton.
Załatyja rejki
Praz rost cen na čorny metał u Rasiei Biełaruskaja čyhunka nia moža nabyć patrebnaj kolkaści rejek. Tona rejek kaštuje $585 (letaś — $394). Užo brakuje tysiačy ton rejek i adpaviednaj kolkaści macavańniaŭ. Praz rost cen budzie nabyta tolki 12 tys. ton zamiest zaplanavanych 30 650 ton.
Prahnozy MVF
Eksperty Mižnarodnaha valutnaha fondu ličać, što sioletni rost biełaruskaj ekanomiki składzie 7,1%. Uradavy prahnoz — 8—10%. MVF ličyć, što inflacyja składzie 12%, a Saŭmin raźličvaje na 8—10%. Pavodle MVF, ekanomika krainy budzie ŭsio čaściej sutykacca z ryzykami praź źmianšeńnie stanoŭčaha ŭpłyvu zamiežnych faktaraŭ — u pryvatnaści, praz padaražańnie rasiejskaha hazu. Praŭda, uličvajučy abiacańnie Kramla nie pavyšać u 2006 h. cany na błakitnaje paliva, prahnozy MVF uradu ŭžo nia strašnyja.
Staŭka źnižana
Nacyjanalny bank źmienšyŭ staŭku refinansavańnia na adzin pracent. Z 6 krasavika jana składaje 15% hadavych. Nacbank raźličvaje na takoje źnižeńnie tempaŭ inflacyi, jakoje dazvolić jamu sioleta davieści staŭku refinansavańnia da ŭzroŭniu 9—12%.
Skardźciesia, na zdaroŭje!
Pałata pradstaŭnikoŭ uchvaliła prezydencki dekret «Ab udaskanaleńni pracy z nasielnictvam». Ciapier nia tolki dziaržaŭnyja arhanizacyi, ale i indyvidualnyja pradprymalniki pavinny buduć mieć knihi skarhaŭ, zaŭvah dy prapanoŭ. Parušeńnie praviłaŭ viadzieńnia knihi moža pryvieści da administracyjnaj adkaznaści. Skarhi pavinny razhladacca ciaham piatnaccaci dzion.
AK, AFN
