Ministerstva infarmacyi vyniesła 13 krasavika papiaredžańnie niedziaržaŭnaj hazecie «Narodnaja Vola». U ministerstvie paličyli, što ŭ publikacyi «Virtualnaja vajna ŭnučki z babulaj» za 3 sakavika byli apublikavanyja nie zavieršanyja vytvorčaściu materyjały sudovaj spravy bieź piśmovaha dazvołu sudździ. A zvarot da voinaŭ-internacyjanalistaŭ lidera ruchu imia Jurja Zacharanki «Abaroncy Ajčyny» Aleha Vołčaka 31 sakavika ministerstva kvalifikavała jak raspaŭsiudžvańnie infarmacyi ad imia niezarehistravanaha abjadnańnia.
Niedziaržaŭnaja hazeta «Volnaje Hłybokaje» atrymała papiaredžańnie 15 krasavika za źmienu movy (biełaruskaja j rasiejskaja zamiest biełaruskaj) bieź infarmavańnia orhanu rehistracyi, parušeńni ŭ vychodnych źviestkach i publikacyju reklamnych abviestak pra licenzavanyja vidy dziejnaści biez ukazańnia numaru licenzii.
15 krasavika papiaredžańnie atrymali j niedziaržaŭnyja «Borisovskije novosti», bo nie paviedamili piśmova pra źmienu terytoryi raspaŭsiudžvańnia, vykarystoŭvali niestandartnyja šryfty (sic!), dapuskali pamyłki ŭ vychodnych źviestkach i źmiaščali reklamnyja abviestki biez ukazańnia licenzii.
9000 asobnikaŭ knihi «Vypadkovy prezydent», zatrymanych milicyjantami ŭ viciebskaha pradprymalnika Barysa Elkina, kanfiskavanyja na karyść dziaržavy. Tak vyrašyŭ 18 krasavika Viciebski abłasny haspadarčy sud.
Kryminalnaja sprava ŭ dačynieńni da Paŭła Sieviarynca i Mikoły Statkieviča ŭ suviazi z vuličnymi manifestacyjami ŭ kastryčniku 2004 h. pieradadzienaja 18 krasavika ŭ sud Leninskaha rajonu Miensku.
19 krasavika prafsajuz REP atrymaŭ ad Ministerstva justycyi adkaz: ministerstva adterminavała rehistracyju źmien i dapaŭnieńniaŭ u statut REP, zapatrabavaŭšy tłumačeńniaŭ, jaki rod dziejnaści jadnaje siabroŭ arhanizacyi. Prajekt źmien prafsajuz nakiravaŭ u Miniust u sakaviku; siarod inšaha praduhledžvałasia mahčymaść ustupleńnia ŭ REP rabotnikaŭ roznych halin pramysłovaści.
Sud Darahičynskaha rajonu pakaraŭ aktyvista PBNF žurnalista niedziaržaŭnaj hazety «Dla vas» Mikałaja Bryča na 2,7 młn rub. pavodle pazovu staršyni j siabroŭ učastkovaj vybarčaj kamisii. Padčas letašnich parlamenckich vybaraŭ jon, jak ćvierdzić Bryč, staŭ śviedkam parušeńniaŭ na vybarčych učastkach z boku niećviarozych pradstaŭnikoŭ kamisii. Vydaleny z učastku žurnalist napisaŭ skarhu prakuroru, ale pad medahlad patrapili zusim inšyja siabry kamisii. Abvinavačanyja ŭ pjanstvie pradstaŭniki kamisii j padali ŭ sud na Bryča.
U Połackim universytecie 21 krasavika prarektary zatrymali padčas raspaŭsiudžvańnia studenckaha biuleteniu «Makasin» studentaŭ Volhu Siemienčukovu i Aleha Viaževiča.
U Aršanskim pedkaledžy padčas raspaŭsiudžvańnia biuleteniu niezarehistravanaha «Maładoha frontu» «Moładź — ZA» i bukletaŭ ZBS 21 krasavika zatrymany kiraŭnik miascovaj Rady moładzievych arhanizacyj Ihar Kazimirčak. Jaho zatrymali pedahohi, jakija j vyklikali milicyju.
21 krasavika Miniust paviedamiŭ, što termin pieravodu arhstruktur partyj i hramadzkich arhanizacyj z žyłoha ŭ niežyły fond padoŭžany da 1 červienia. Zahad padpisany ministram justycyi Viktaram Hałavanavym jašče 5 krasavika.
U Miensku 22 krasavika śpiarša na try hadziny, a potym na troje sutak za arhanizacyju akcyi 25 sakavika zatrymany Andrej Klimaŭ: na jaho zaviedziena kryminalnaja sprava pavodle art.342 KK (arhanizacyja hrupavych dziejańniaŭ, jakija parušajuć hramadzki paradak, abo aktyŭny ŭdzieł u ich). Padčas zatrymańnia milicyjanty zhubili jahony pašpart. Termin zatrymańnia 25 krasavika pieršy namieśnik prakurora Miensku Mikałaj Staravojtaŭ padoŭžyŭ na dziasiaciera sutak. Na Klimava zaviedziena jašče adna kryminalnaja sprava — za paklop i abrazu prezydenta; sudovaje pasiadžeńnie pa joj pryznačana na 19 traŭnia.
Padčas raspaŭsiudžvańnia niezaležnaj hazety «Vybar» 22 krasavika ŭ SŠ №19 Miensku zatrymanyja aktyvistki niezarehistravanaj arhanizacyi «Zubr» Natalla Vuška j Alena Kopač. Milicyjantaŭ vyklikała zavuč. Na ich skłali pratakoły za raspaŭsiud vydańnia biez vychodnych źviestak.
Mašynu, na jakoj viartalisia ŭ Biełaruś udzielniki sustrečy z Kandalizaj Rajs — Ludmiła Piecina, Śviatłana Kalinkina j Hary Pahaniajła, mytniki pieratrasali bolš za hadzinu.
Za vyviešvańnie bieł-čyrvona-biełaha ściaha nasuprać prezydenckaj rezydencyi 22 krasavika zatrymany aktyvistki «Zubra» studentki Ała Kovač i Nadzieja Nosik. Milicyjanty zatrymali ich, kali dziaŭčaty pakidali dach, ale nieŭzabavie adpuścili, bo nia mieli dokazaŭ.
25 krasavika 15 čałaviek prajšli hałoŭnaj vulicaj Horadni. Jany ŭskłali kvietki kala pamiatnaj miaściny pad abłvykankamam. Za akcyjaj sačyli supracoŭniki milicyi, ludzi ŭ cyvilnym i teleaperatary. Šeście pryśviačałasia padziejam 25 krasavika 1999 h., kali niekalki dziasiatkaŭ maładych ludziej u kamuflažnaj formie z zapalenymi pachodniami prajšli pa vulicach horadu, pratestujučy suprać padpisańnia sajuznych pahadnieńniaŭ pamiž Biełaruśsiu i Rasiejaj. Udzielniki toj demanstracyi byli žorstka źbityja AMAPam. Sioleta abyšłosia biez zatrymańniaŭ.
Supołcy Svabodnaha prafsajuzu metalistaŭ pradpryjemstva «Los» (h.Barań Aršanskaha rajonu) nie dali pravieści 23 krasavika demanstracyju j mitynh, pryśviečanyja sacyjalna-ekanamičnym prablemam. Demanstracyju prosta zabaranili, a mitynh dazvolili ŭ chvajovym parku, što zajaŭniki paličyli za abrazu.
U Mahilovie 26 krasavika akcyja «Zubra» skončyłasia zatrymańniami: u pastarunak trapili Andrej Zajcaŭ, Aleh Miacielica, Maksim Dvarecki, Pavał Uhrynovič, Andrej Razumkoŭ, Andrej Pałuda, Jaŭhien Suvoraŭ, Mikałaj Iljin, Hanna Pietrakova, Taciana Jankovič, Volha Rahoŭskaja, Vaładar Turpanaŭ, Uładzisłaŭ Charkievič, Uładzisłaŭ Barodka.
Deputat Łuckaha harsavietu (Ukraina) Ihar Huź byŭ źbity 26 krasavika ŭ Miensku na Čarnobylskaj akcyi. Siarod zatrymanych rasiejskija žurnalisty Alaksiej Amiet («Russkij Newsweek»), Michaił Ramanaŭ («Moskovskij komsomolec»).
27 krasavika sudzili zatrymanych na Čarnobylskaj akcyi ŭ centry Miensku. Kiraŭnik rasiejskaha ruchu «Jakija iduć biaz Pucina» Vadzim Rezvy asudžany na dziasiaciera sutak, kiraŭnik «MF» Źmicier Daškievič — na dvanaccaciera sutak, aktyvist «MF» Siaržuk Lisičonak — na dziasiaciera sutak, aktyvistka AHP Maryna Bahdanovič atrymała 150 bazavych vieličyń štrafu. Zatrymany byli hramadzianie Rasiei Illa Jašyn, Vital Reźnikaŭ, Michaił Piermiakoŭ, Siamion Burd, Pavał Jelizaraŭ, Iryna Varabjova, staršynia BPS Siarhiej Vysocki, aktyvisty «MF» Artur Fińkievič, Aleś Smolski, Siaržuk Muraška, Kiryła Šymanovič. Z nahody zatrymańnia padčas akcyi piaci ŭkraincaŭ MZS Ukrainy nakiravała ŭ Biełaruś notu.
AŠ,
Anton Łabovič, Horadnia
