Насельніцтва Таліна складае 426 тыс. чалавек, сярэдні заробак у горадзе — 828 еўра «чыстымі».
Эстонскія прафсаюзы сустрэлі Першамай шэсцем і канцэртам у цэнтры Таліна. Па словах старшыні Цэнтральнага саюза прафсаюзаў Пеэпа Петэрсана, галоўная мэта для прафсаюзаў Эстоніі сёння — рост заработнай платы на фоне падаражэння электрычнасці і інфляцыі.
«Самае важнае — гэта зарплата! Палова работнікаў вымушана працаваць за 600 еўра ў месяц. А пры гэтым электрычнасць і ўсё астатняе даражэе. А значыць, заробкі павінны расці» — цытуе словы Петэрсана Postimees.
Для параўнання: сярэдні заробак у Беларусі «бруднымі» ў сакавіку, згодна з Белстатам, складаў 415 еўра (4 692,8 тыс. рублёў), мінімальны заробак у Беларусі складае 1 млн 395 тыс. (123 еўра). Мінімальны заробак у Эстоніі з 1 студзеня 2013 г. вырас з 290 да 320 еўра.
У Эстоніі сярэдні заробак бруднымі, паводле дэпартамента статыстыкі, складае 916 еўра (723 еўра чыстымі),
у Таліне ў 4-м квартале 2012 г. сярэдні заробак чыстымі складаў 828 еўра.
Заробак у сферы электраэнэргіі ў Эстоніі складае 1308 еўра, у сферы харчавання і гасцінічных паслуг — 572 еўра.
Інфляцыя ў Эстоніі за 2012 год склала 3,9%.
