Uznaharoda znojdzie svaich hierojaŭ 12.12.2012, kali ŭ klubie Loft adbudziecca padsumavańnie vynikaŭ-2012. Mahiloŭskija muzyki daduć z hetaj nahody vialiki solny kancert. Admysłovym hościem viečaru budzie nadzieja biełaruskaj muzyki Palina Respublika.
Internet-partał Tuzin.fm padvioŭ vyniki 2012 hodu. Na rašeńnie redakcyi najlepšym hurtom hodu pryznany Akute. Sioleta mahiloŭskaja kamanda zaśviedčyła nadzvyčajnuju aktyŭnaść. U lutym jany pradstavili samotnik «Krou EP», u krasaviku vydali svoj druhi studyjny dysk «Nie isnuje», jaki byŭ stanoŭča pryniaty, jak publikaj, tak i ekspertami, a daviaršyli spravu jašče adnym vialikim samotnikam uvosień «Iholki». Jak vynik — ich solnyja vystupy sioleta zaŭždy źbirali anšlahi. Akrom taho Stas Mytnik, Roma Žyharaŭ dy Pavał Fiłataŭ dali jašče niamała nahodaŭ sioleta zhadać ich dobrym słovam — paŭdzielničali ŭ saŭndtreku da filmu «Vyšej za nieba», vyjavili salidarnaść z zabaronienaj «Krambambulaj», vystupili razam z Placebo ŭ Pałacy sportu… Bolš za toje, muzyki rychtujuć jašče adzin siurpryz admysłova da kancertu 12 śniežnia, kali im budzie ŭručana ŭznaharoda ad Tuzin.fm.
U pieršaj častcy viečaryny «Žyvy Tuzin» u klubie Loft svaje pieśni zajhraje Palina Respublika, jakaja taksama dała niamała padstavaŭ sioleta dla taho, kab ź liku nadziejaŭ biełaruskaj sceny pierajści ŭ šerah samych zapatrabavanych ajčynnych vykanaŭcaŭ. Sioleta Palina vydała dva synhły spraviła svajo 18-hodździe šykoŭnym kancertam, zajhrała ŭ jakaści hościa na aŭtarytetnym polskim Halwfay Festival i feście «Piknik.by», a jaje vystup na «Tuzin.Unplugged» vyklikaŭ sapraŭdny furor.
Abodva ŭdzielniki vialikaha «Žyvoha Tuzinu» 12.12.12. raniej užo adznačalisia našym partałam. U 2009 hodzie Akute byli pryznanyja «Adkryćciom hodu», a ŭ 2010 hodzie ich debiutny albom «Dzievački i kosmas» zaniaŭ druhoje miesca ŭ śpisie najlepšych relizaŭ hodu. Palina była pryznanaja adkryćciom hodu ŭ biełaruskaj muzycy ŭ 2011 hodzie.
