Uha Čaves pamior 59

Prezident Vieniesueły Uha Čaves pamior, aficyjna paviedamili ŭłady Vieniesueły 5 sakavika. Jon byŭ chvory na rak i pamior ad uskładnieńniaŭ.

Paviedamlajecca, što jon pamior u 23:55 pavodle minskaha času. Infarmacyju pra śmierć abnarodavaŭ pa TV vice-prezident Nikałas Madura.

Pytańnie stanu zdaroŭja prezidenta Vieniesueły abmiarkoŭvałasia na pasiadžeńni ŭrada, što tranślavałasia ŭ žyvym efiry.

Čaves kiravaŭ Vieniesuełaj ad 1999 h. (naradziŭsia 28 lipienia 1954 h.), u 2002 h. byŭ zrynuty, ale viarnuŭsia da ŭłady.

Niekalki razoŭ naviedvaŭ Biełaruś, a Łukašenka niekalki razoŭ Vieniesuełu. Čaves byŭ pryncypovym praciŭnikam kapitalizmu i ZŠA.

U studzieni 2011 hoda Čaves abviaściŭ, što ŭ jaho rak.

Z tych časoŭ jon pieranios čatyry apieracyi, a taksama kursy chimija-i radyjoterapii. Apošnija miesiacy jaho stan zdaroŭja značna pahoršyŭsia.

U kastryčniku 2012 h. Čaves vyjhraŭ čaćviortyja prezidenckija vybary.

* * *

Pra śmierć Čavesa było abvieščana ŭ časie žyvoj tranślacyi pasiedžańnia kiraŭnictva krainy. Tut ža kiraŭnictva armii prysiahnuła na viernaść pierajemniku Čavesa — Nikałasu Madura.

U časie toj samaj tranślacyi Madura zajaviŭ pra vysyłku dvuch amierykanskich ataše, źvinavaciŭšy ich u padryŭnych dziejańniach. I adnačasova jon nazvaŭ vinavatymi ŭ śmierci kamandante «vorahaŭ», jakija «zarazili» jaho hetaj chvarobaj.

Śmierć Čavesa ŭ vyniku ŭskładnieńniaŭ paśla čaćviortaj ankałahičnaj apieracyi jahonyja paśladoŭniki pieratvaryli ŭ telešou, ź jakoha raspačałasia novaja prezidenckaja kampanija ŭ Vieniesuele.

Vybary majuć prajści ciaham miesiaca. Na im sustrenucca vice-prezident Madura, vyznačany Čavesam u jakaści pierajemnika, i adziny kandydat ad apazicyi na minułych vybarach Enrykie Kapryles.

Niekalki miesiacaŭ tamu jon sabraŭ proci Čavesa 45% hałasoŭ — najlepšy vynik apazicyi za hady kiravańnia Čavesa. Hałasy ŭ Vieniesuele pry Čavesu ličyli, u vybarčych kamisijach prysutničaje i apazicyja, ale Čaves abapiraŭsia na tatalny kantrol nad dziaržaŭnymi ŚMI.

U minułuju piatnicu lidar apazicyi Enrykie Kapryles zajaviŭ, što ŭrad paśladoŭna dezinfarmuje vieniesuelcaŭ ab stanie prezidenta i što praŭda vyśvietlicca ŭ bližejšyja dni.

Za dva dni da hetaha były ambasadar Panamy pry Arhanizacyi amierykanskich dziaržaŭ Hiljerma Kočies zajaviŭ, što ŭ Čaviesa jašče dva miesiacy tamu była zafiksavana śmierć hałaŭnoha mozhu, a na dniach jon nibyta byŭ adklučany ad aparata štučnaha dychańnia.

Paśla hetaha ŭ subotu ŭrad upieršyniu zajaviŭ, što kiraŭnik dziaržavy, «zmahajučysia za žyćcio», prachodzić postapieracyjny kurs chimijaterapii. Na nastupny dzień sotni ludziej prajšli maršam pa Karakasie, patrabujučy dokazaŭ taho, što Čavies usio jašče žyvy. Mnohija vieniesuelcy ličać, što čavisty chavali infarmacyju pra śmierć Čavesa, kab dać Madura bolš čas na raskrutku svajoj kandydatury. Telešou ŭ časie "śmierci" Čavesa ŭzmacniła takija padazreńni.

* * *

Pakinuć svaje spačuvańni ŭ suviazi sa śmierciu prezidenta Uha Čavesa možna ŭ sieradu z 12.00 da 18.00, u čaćvier z 10.00 da 13.00 i z 14.00 da 18.00. Paśla vychadnych kniha budzie adkryta jašče ŭ paniadziełak i aŭtorak.

U pasolstvie pakul nie vyznačylisia, ci buduć u Minsku pravodzicca inšyja žałobnyja mierapryjemstvy.

Pasolstva Balivaryjanskaj Respubliki Vieniesueła mieścicca na vuł. Kujbyšava, 14.

nn.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH