Upraŭleńnie Śledčaha kamiteta pa Homielskaj vobłaści pravodzić pravierku pa fakcie śmierci byłoha pieršaha namieśnika staršyni Homielskaha harvykankama Anatola Čyścika.
Jak paviedamiła BiełaPAN aficyjny pradstaŭnik SK pa Homielskaj vobłaści Maryja Kryvanohava, siońnia ranicaj były čynoŭnik byŭ znojdzieny miortvym, u piatli, u kvatery baćkoŭ žonki. Na dumku śledčych orhanaŭ, śmierć nie nosić kryminalnaha charaktaru. Asnoŭnaja viersija zdareńnia — samahubstva.
Pravodziacca pravieračnyja mierapryjemstvy, nakiravanyja na vyśviatleńnie ŭsich abstavinaŭ zdareńnia, u tym liku matyvu samahubstva.
Anatol Čyścik byŭ pryznačany pieršym namieśnikam staršyni Homielskaha harvykankama ŭ lipieni 2012 hoda, paśla skandału, jaki vybuchnuŭ u horadzie ŭ suviazi z machinacyjami ŭpraŭleńnia kapitalnaha budaŭnictva (UKB) harvykankama. Čyścik, jaki da pryznačeńnia ŭznačalvaŭ instytut «Homielhramadzianprajekt», źmianiŭ na pasadzie Alaksandra Rańko.
16 listapada 2012 hoda na pasadu homielskaha horadanačalnika byŭ pryznačany Piotr Kiryčenka, jaki zajmaŭ da hetaha pasadu namieśnika staršyni Homielskaha abłvykankama. Anatol Čyścik zastaŭsia pieršym namieśnikam i, prynamsi, jašče ŭ śniežni 2012 hoda pracavaŭ na hetaj pasadzie.Nieŭzabavie byŭ aryštavany pa «spravie UKB» staršynia Homielskaha harvykankama Viktar Pilipiec, i Anatol Čyścik da pryznačeńnia novaha kiraŭnika horada vykonvaŭ abaviazki staršyni harvykankama.
