Śledstva pa spravie žychara Navapołacka,23-hadovaha Andreja Hajdukova, abvinavačanaha ŭ «zdradzie dziaržavie šlacham ahienturnaj dziejnaści», pradoŭžana jašče na miesiac, da 8 maja.
Pra heta paviedamiŭ siabar Hajdukova, lidar niezarehistravanaha hramadskaha abjadnańnia «Sajuz maładych intelektuałaŭ» Jaŭhien Kanstancinaŭ, jakoha raniej KDB dapytała pa dadzienaj spravie ŭ jakaści śviedki. Kanstancinaŭ taksama paviedamiŭ, što jaho nie dapytvali z kanca lutaha. Ab praciahu śledstva stała viadoma ad maci abvinavačanaha. Kanstancinaŭ miarkuje, što heta moža być apošni praciah i da kanca viasny akaličnaści spravy vyśvietlacca.
Nahadajem, Andrej Hajdukoŭ, namieśnik staršyni Sajuza maładych intelektuałaŭ, byŭ zatrymany supracoŭnikami KDB u Viciebsku 8 listapada, pavodle aficyjnaj viersii, «u momant zakładki tajnika sa źviestkami, jakija cikaviać zamiežnyja śpiecsłužby».
Na padstavie art. 356 Kryminalnaha kodeksa (zdrada dziaržavie ŭ formie praviadzieńnia ahienturnaj dziejnaści) jamu pahražaje ad 7 da 15 hadoŭ pazbaŭleńnia voli. 11 listapada Hajdukova pieraviali ź Viciebska ŭ Minsk u śledčy izalatar KDB, 29 listapada — nazad u abłasny centr, a 22 śniežnia — znoŭ u stalicu.
Pavodle słoŭ svajakoŭ, spačatku Andreja ŭtrymlivali ŭ SIZA na vulicy Vaładarskaha, u SIZA KDB jon byŭ pieraviedzieny 27 śniežnia.
20 lutaha pravaabaroncy raspaŭsiudzili zajavu, u jakoj zaklikali ŭłady zabiaśpiečyć infarmavańnie hramadskaści ab chodzie rasśledavańnia i sudovaha razboru pa spravie Hajdukova.