Prezident Sierbii Tamisłaŭ Nikalič vybačyŭsia za masavaje zabojstva baśnijskich musulman u Srebranicy ŭ 1995 h., a taksama za ŭsie złačynstvy, učynienyja sierbami ŭ Bośnii i Hiercahavinie. Takuju zajavu jon zrabiŭ u chodzie intervju baśnijskamu telekanału BHT.
Nikalič adznačyŭ, što jon «na kaleniach prosić daravać Sierbii za złačynstva, ździejśnienaje ŭ Srebranicy». U toj ža čas, prezident zaŭvažyŭ, što treba jašče dakazać, što toje, što adbyłosia sapraŭdy było hienacydam.
Intervju ź Nikaličam pavinna być pakazana ŭ efiry baśnijskaha telebačańnia 7 maja, adnak jaho ŭryŭki ŭžo ciapier dastupnyja ŭ internecie.Čakajecca, što ŭ chutkim časie prezident moža naviedać Srebranicu, adznačaje sierbskaje vydańnie B92.
Raniej Nikalič užo admaŭlaŭsia pryznavać raźniu ŭ Srebranicy hienacydam. U pryvatnaści, u lipieni 2012 hoda jon zajaŭlaŭ, što «niekatoryja sierby» ździejśnili ŭ hetym sieliščy «surjoznyja vajennyja złačynstvy».
U 2010 h.parłamient Sierbii pryniaŭ rezalucyju, jakaja asudžaje raźniu ŭ Srebranicy.Zakanadaŭcy prynieśli spačuvańni svajakam zahinułych. U toj ža čas, złačynstva, ździejśnienaje ŭ 1995 h., u dakumiencie nie nazyvałasia hienacydam, choć Mižnarodny trybunał pa byłoj Juhasłavii i Mižnarodny sud AAN kłasifikavali jaho mienavita tak.
***
U lipieni 1995 padčas vajennaj apieracyi baśnijskija sierby zachapili baśnijski ankłaŭ Srebranica i pakarali śmierciu amal usie jaho mužčynskaje mirnaje nasielnictva. U vyniku byli zabityja da 8 000 čałaviek uzrostam ad 13 da 77 hadoŭ.
Adkaznym za ažyćciaŭleńnie raźni ličycca Ratka Mładzič, były načalnik hienieralnaha štaba ŭzbrojenych sił Respubliki Sierbskaj. U 2011 hodzie jon byŭ aryštavany, jaho sprava razhladajecca ŭ Mižnarodnym trybunale pa byłoj Juhasłavii.
0
0
0
0
0
0
