Pramysłovaść Biełarusi pakul nie vykonvaje prahnoznyja pakazčyki, paviedamiŭ pieršy vice-premjer Biełarusi Uładzimir Siamaška 27 maja padčas dakłada kiraŭniku dziaržavy.
Jak paviedamlaje pres-słužba prezidenta, na sustrečy Alaksandr Łukašenka pacikaviŭsia ŭ Siamaški prablemami biełaruskaj pramysłovaści. «Bolš za ŭsio ŭ mianie apasieńniaŭ za hety kirunak, asabliva ŭ płanie realizacyi hatovaj pradukcyi. Ja chacieŭ by pačuć mahčymyja prapanovy ŭ suviazi z maimi daručeńniami nakont pastavak na ŭnutrany rynak pradukcyi mašynabudaŭničaha kompleksu. Ale samaje hałoŭnaje — schiemy i sistemy ŭzajemaraźlikaŭ za hetuju pradukcyju», — zaznačyŭ Łukašenka.
Havoračy pra vyniki raboty pramysłovaha kompleksu za minuły pieryjad 2013 hoda i pierśpiektyvy vykanańnia prahnoznych pakazčykaŭ pa hodzie ŭ cełym, Siamaška adznačyŭ, što pramysłovaść Biełarusi pakul nie vykonvaje prahnoznyja pakazčyki. «Ale jość peŭnaja dynamika pa ministerstvach, kancernach i kamitetach, i jość zadańnie, kab usio-taki pa kancy hoda vyjści na tyja prahnoznyja pakazčyki, jakija byli namiečanyja pa pramysłovaj vytvorčaści, — nie mienš čym 107%», — adznačyŭ vice-premjer.
Na jaho dumku, dla vykanańnia hetych zadańniaŭ nieabchodna ŭklučyć «dadatkovyja miechanizmy». «Nichto nie admaŭlaje taho, što situacyja na makraŭzroŭni vielmi niaprostaja. Pa-pieršaje, adbivajecca suśvietnaja recesija. Pa-druhoje, z 1 studzienia Rasija stała členam SHA, a rasijski rynak dla nas adzin z asnoŭnych, asabliva što tyčycca pradukcyi mašynabudavańnia. I my ŭžo ŭ poŭnaj miery zaznali niehatyŭnyja momanty, apynuŭšysia pa fakcie ŭ SHA, bo my znachodzimsia ŭ Mytnym sajuzie», — kanstatavaŭ Siamaška.
«Hetyja dva hłabalnyja pracesy, biezumoŭna, adbilisia na vynikach raboty pramysłovaha kompleksu krainy. Ale zroblenyja zachady i toje, što napracavana, pavinna ŭsio-taki dać nam pa kancy hoda stanoŭčy vynik», — skazaŭ pieršy vice-premjer.
Pavodle słoŭ Siamaški, pramysłovaść Biełarusi na praciahu apošniaha dziesiacihodździa, navat u niaprostyja pieryjady, zaŭsiody pakazvała dastatkova vysokija tempy pryrostu. «Užo jość zadzieł i sistema raboty, tamu dalej my ni ŭ jakim vypadku nie pavinny zbaŭlać tempy», — adznačyŭ jon.
Anastasija Sałanovič, BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
