Ceny na staličnuju nieruchomaść padskočyli hetaj viasnoj. Cana kvadratnaha mietra dasiahnuła amal $1700. Praŭda, vyraśli ceny na kvatery, śledam za imi padciahvajecca i rynak damoŭ.
«Naša Niva» skłała rejtynh samaha darahoha žylla Minska. Letaś, kali my publikavali padobny śpis, cana na pryvatnyja damy nie pieravyšała $2 miljony. Ciapier samy darahi katedž pradajecca za $2,2 miljona. Kab sabrać takija hrošy, majučy siaredni zarobak i spłačvajučy padatki, biełarusu daviadziecca pracavać 373 hady!
Novabud z hołymi ścienami na bierazie Cnianskaha vadaschovišča. Cana — $2,2 miljona.
Dom u Navinkach. Cana — $2,2 miljona.
Katedž u Vajskovym zavułku. Cana — $2,1 miljona.
Katedž na Daroŭskim zavułku ź ciopłym basiejnam na dvary. Cana — $1,9 miljona.
Lasny dom u Ždanovičach. Cana — $1,8 miljona.
1. Novabud z hołymi ścienami
Cana — $2,2 miljona.
Dom na pieršaj bierahavoj linii Cnianskaha vadaschovišča pradajecca pa rekordnaj canie. Spačatku treba zapłacić miljony za pryhažość pryrody — pobač les i raka, a paśla jašče ŭkłaści kruhłuju sumu ŭ ramont. Katedž za šalonyja hrošy pradajecca z hołymi ścienami.
U domie ahulnaj płoščaj 767 m2 dva pavierchi, padvał i haraž. Na pieršym paviersie vydzielenaje miesca pad vierandu, kuchniu¬stałovuju i basiejn, na druhim prajekciroŭščyki zapłanavali čatyry žyłyja pakoi, rabočy kabiniet, harderobnuju i try sanvuzły.
Pad ahurki dy pamidory jość jašče 10 sotak.
2. Dom, dzie hości žyvuć asobna
Cana — $2,2 miljona.
U dom u Navinkach možna zasialacca choć adrazu. Prapanova niezvyčajnaja — na ŭčastku płoščaj 20 sotak adrazu dva žyłyja zbudavańni. Heta čatyrochuzroŭnievy katedž haspadaroŭ i dvuchpaviarchovik dla haściej. Ahulnaja płošča — 950 m2!
Na ŭčastku ŭžo papracavaŭ łandšaftny dyzajnier — ručaj, kvietki, kusty i jełka pasiarod dvara. Katedž pradajecca z azdableńniem — ad biljardnaha stała i basiejna da zimovaha sada i spalniaŭ z bałdachinami.
3. Katedž na płoščy Pieramohi
Cana — $2,1 miljona.
Dvuchpaviarchovik u cichim miescy na Vajskovym zavułku — niekalki chvilin pieššu ad płoščy Pieramohi — zapisany ŭ rekłamnych katałohach amal hod. Ale kupcoŭ mała praz zavysokuju canu. Ahulnaja płošča doma składaje 300 m2, heta značyć, kvadratny mietr u im kaštuje $7000.
«Stalinki» ŭ hetym miescy davali čyhunačnamu načalstvu, dźvie¬čatyry siamji na dom. Ale ŭ hetym vypadku ciapierašniamu haspadaru ŭdałosia atrymać va ŭłasnaść abiedźvie kvatery. Pradaŭcy elitnaj nieruchomaści aryjentujucca na rasijskich pakupnikoŭ. Adnak i tyja nie hatovyja płacić za kvatery i katedžy miljony dalaraŭ.
4. Katedž ź ciopłym basiejnam na dvary
Cana — $1,9 miljona.
U hetym katedžy płoščaj 430 m2 na Daroŭskim zavułku z haścioŭni možna skočyć prosta ŭ vadu, choć ekspłuatacyja basiejna ŭ zimovy i viasnovy čas vyklikaje šmat pytańniaŭ. Mebla, technika, saŭna, kinazała dy biljardnaja — u canu ŭklučana ŭsio.
Ale najbolš kaštuje prestyžnaje miesca — pobač Drazdy, namienkłaturny raj łukašenkaŭcaŭ.
5. Lasny dom u Ždanovičach
Cana — $1,8 miljona.
Samy darahi katedž za miežami minskaj kalcavoj znachodzicca ŭ Ždanovičach. Zrešty, heta ŭsiaho za paru kiłamietraŭ ad horada. Tut pradajecca trochuzroŭnievy dom u lesie.
Źviartaje na siabie ŭvahu aryhinalny architekturny prajekt — jarkaja cehła kidajecca ŭ vočy zdalok. Chapaje cikavostak i ŭnutry, naprykład, padviasnaja leśvica na druhi pavierch. U katedžy zrobleny jeŭraramont, adnak mebli pakul mała, daviadziecca dakuplać.
